Wasiir ku-xigeenka Wasaaradda Arrimaha Dastuurka ahna Ku-simaha Wasiirka Mudane Xuseen Cabdi Cilmi ayaa shaaca ka qaaday in Wasaaraddu ay bilowday Wajiga labaad ee howlaha dib loogu eegayo qabyo qoraalka Dastuurka, kaasi oo lagu tababarayo macalimiintii gaarsiin lahayd dastuurka bulshada Soomaaliyeed.
Wasiirka ayaa sheegay in uu bilowday Tababar socon doono muddo afar maalin ah kaasi oo ay ka qeyb galayaan Xubno ka socda Wasaaraddaha dowlada, maamulka Gobalka Banaadir, Jaamacada Umadda, Dowlad Gobaleedyada iyo Bulshada Rayidka, waxaana looga hadlayaa sidii Dastuurka loo gaarsiin lahaa degmooyinka iyo Deegaanada dalka.
โWaxaan galeynaa wajigii Labaad oo ah sidii bulshada looga dhaadhicin lahaa loona gaarsiin lahaa degmo iyo deegaanada Soomaaliya oo dhan, waxaa noo bilowday Tababar socon doono muddo afar maalin ah kaasi oo lagu diyaarinayo dadkii bulshada qeybaheeda kal duwan gaarsiin lahaa Dastuurka, tababarkan waxaa ka horeeyay mid aan furnay Todobaadkii hore oo la yiraahdo Tababarka Tababarayaasha, dadka la tababaray ayaa laga doonayaa inay gaarsiiyaan deegaanada aan ugu tala galnayโ.
Mudane Xuseen Cabdi Cilmi ayaa tilmaamay in wajigan Labaad ujeedkiisa uu yahay sidii Bulshada loo bari lahaa Dastuurka iyo wuxuu yahay iyo Kaalinta uu kaga jiro dowladnimada.
โDadka waxaa la barayaa Dastuur muxuu yahay, Bulshada baahida ay u qabaan, doorka uu kaga jiro Dowladnimada ka dib Warbaahinta ayaa marsiin doono iyadoo suโaalo la iska weydiin doono laakiin hada wacyi galin ayaan diirada saareynaaโ.
