Madaxweynaha Dowlad Goboleedka Koonfur Galbeed Soomaaliya Mudane Shariif Xasan Sheekh Aadan iyo wafdi uu hoggaaminayo, ayaa safar labo maalin qaatay oo dhanka dhulka ah ku tegay Degmadda Bardaale ee Gobolka Baay, Shacabka iyo ma’uuliyiinta Degmada ayaa meel dhowr KM u jirta Bardaale ugu hormiyid Madaxweynaha iyo Wafdigiisa, kadibna u galbiyay hoyga loogu tala galay.
Dhanka kale Madaxweynaha Koofur Galbeed, ayaa Degmada Bardaale kaga qeyb galay xafladda caleemo saarka Guddoomihaya degmadaasi iyo kuxigeenkiisa, wuxuuna kulan laqaatay Golaha Deegaanka, isaggoo sidoo kale dhagax-dhigay Saldhiga iyo isbitaalka Degmada Bardaale.
Madaxweyne Shariif Xasan, ayaa sheegay in safarkaasi uu ahaa mid guul iyo hormar u ah Shacabka Reer Koonfur Galbeed Soomaaliya, waxaana uu bogaadiyey Saraakiisa Ciidamada kala duwan ee Koonfur Galbeed, Police-ka dowladda dhexe, NISA iyo AMISOM.
