Nairobi (SONNA) Dhaawacyaddii Maanta laga qaaday Magaaladda Muqdisho ee ku wajahnaa dalka Kenya, ayaa goor dhoweyd ka degay Garoonka diyaaraddaha Magaaladda Nairobi, halkaasi oo ay kusoo dhoweeyeen Masuuliyiin uu ka mid yahay ku simaha Safiirka Safaaradda Soomaaliya ee Kenya Mudane Cali Bagadi iyo Masuuliyiin Dowladda Imaaraadka ka socda.
Dhaawacyaddaasi gaaray Dalka Kenya, ayaa Magaaladda Muqdisho waxaa ka qaaday Dowladda Imaaraadka, waxaana ay tira ahaan gaarayaan 9 qof oo dhaawacyo kala duwan qaba, iyaddoo horay dowladdaasi ay kenya u geeysay 7 qof oo Bukaan ah, kuwaasi oo dhammaan ku dhaawacmay Qaraxii Maleeshiyada argagixisada ah ee Alshabaab ay ka geeysteen Isgooyska 14 Oktoobar Ex Zoobe ee Muqdisho.
ku simaha Safiirka Safaaradda Soomaaliya ee Kenya, ayaa Dowladda Imaaraadka uga mahad celiyey garab istaaga ay u muujisay Ummadda Soomaaliyeed, isagoo xusay in Safaaradda si dhow ay ula socon doonta Xaaladda Caafimaad ee Bukaanadda Dalka kenya la geeyey.
