Muqdisho (SONNA) Kulanka Golaha shacabka ee Baarlamaanka Federaalka Soomaaliya ayaa maanta Akhrinta 1-aad mariyay Hindise Sharciyeedka Batroolka iyo Macdanta, waxaana kulanka shir Guddoominayay Guddoomiye ku xigeenka Koowaad ee Golaha Shacabka Cabdiwali Shiekh Ibraahim Muudeey,
Wasiirka Wasaaradda Batroolka iyo Macdanta Cabdirashiid Maxamed Axmed ayaa Xildhibaanada Baarlamaanka ka hor akhriyay Muhiimada uu sharcigan dalka u leeyahay iyo marxaladihii uu soo maray, wuxuuna sheegay in lagama maarmaan ay tahay in la helo sharci lagu xakameynayo Batroolka iyo Macdanta, laguna wada qanacsan yahay, isagoo ka codsaday Baarlamaanka in si deg deg ah ay u ansixiyaan sharcigan.
Ka dib Akhrinta 1-aad ee hindise sharciyeedka Batroolka iyo Macdanta dalka ayaa Guddoomiye xigeenka 1-aad ee Golaha Shacabka waxa uu warbaahinta ku wargaliyay in banaanka uga baxaan hoolka Golaha, taasoo uu ku sababeeyay in Mudanayaasha ay leeyihiin kulanka isla xisaabtan ah.
