Maxamed Axmed Caynab oo ah Guddoomiyaha gobolka ay ka tirsan tahay Caluula ee Puntland oo wareysi siiyey Radio Muqdisho Codka Jamhuuriyadda Soomaaliya ayaa sheegay in dadka deegaanku ay kusoo war geliyeen in markab kuwa dagaalka ah oo taagnaa xeebta Caluula uu markab kale oo dagaal gantaal ku dhuftay ayaga oo taasi ka duulayana ay tageen goobta.
“waxaan tagnay goobta naloogu sheegay in markabka uu ku qarxay, dadku qaar waxeey kuu sheegayaan in markabka uu markab kale gantaal ku dhuftay oo halkaa uu ku quusay balse anagu goobta markii aan gaarnay maanta haba yaraatee kuma aynaan arag wax raad ah oo muujinaya in goobta markab lagu gubay iyo qasaaro kale toona”ayuu yiri Guddoomiye Maxamed Axmed Caynab.
“xeebta badda cas ma ahan sida xeebta badweynta India oo hadii uu markab ku quuso horey laga arkayo oo waa mool aad u dheer,markab quusayna sida alwaax horey lagama arkayo oo dusha sooma fuulayo wuu degayaa oo wuu quusayaa waxaan u baahannahay inaan si qoto dheer u baarno oo Punland ayaan ka codsanay wasaaradaheeda iney berrito soo diraan quburro quusta si hoos loo galo oo gunta loo ogaado, inta ka horeysana baaritaankaas la xaqiijin doono”ayuu hadalkiisa sii raaciyey.
Ugu dambeyntii waxa uu rajo ka muujiyey Guddoomiye Maxamed Axmed Caynab in berrito si dhab ah loo xaqiijiyo jiritaanka warkaasi balse hada aanay jirin xitaa maraakiibtii faraha badneyd ee dagaalka oo xeebaha Caluula joogi jiray in midkoodna aanay joogin.
