Shirkaan oo ay soo qaban qaabisay Wasaaradda Warfaafinta Soomaaliya ayaa waxaa ka qeyb galaya wasiirka Wasaaradda Warfaafinta Soomaaliya Eng: C/raxmaan Cumar Cismaan “Yariisow” agaasimeyaasha waaxyaha wasaaradda, wasiirada warfaafinta maamul-goboleedyada dalka ka jira iyo agaasimeyaashooda.
Shirka oo socon doona mudo sadex maalin ah ayaa diiradda lagu saari doonaa qodobo ay kamid yihiin in si wadajir ah warbaahintu ay uga qeyb qaadato wacyi galinta barnaamijka la dagaalanka Argagixisada, oo wasaaradda warfaafintu ay ku howlantahay.
Sidoo kale shirka ayaa dhinacyada ka qeyb galaya isku soo hadal qaadi doonaan arimo la xiriira dib u eegista xeerka Saxaafadda, iyo hadii ay suura gal tahay wax ka badal lagu sameeyo qaar kamid ah qodobada ku jira xeerka.
Masuuliyiinta Wasaaradda Warfaafinta Soomaaliya ayaa u xaqiijiyey Wakaaladda Wararka Qaranka Soomaaliyeed ee SONNA in masuuliyiinta shirka ka qeyb galaya ee matalaya dowlad-goboleedyada ay ka dhageysan doonaan talooyin iyo fikrado ka qeyb qaadanaya horumarinta warbaahinta Soomaaliyeed, taasi oo ay hormuud ka yihiin masuuliyiinta Wasaaradda Warfaafinta Soomaaliya.
Sanadkii hore ayaa magaalada Muqdisho waxaa ku qabsoomay shir sidaan oo kale ay soo agaasintay Wasaaradda Warfaafinta Soomaaliya, kaasi oo looga hadlay Istiraatiijiyadda Warbaahinta Qaranka.
Xigasho: SONNA
