Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa Xarunta Golaha Qaramada Midoobey ee magaalada New York waxa uu kulan doceed kula yeeshay Xoghayaha Guud ee Qaramada Midoobay Mudane António Guterres.

Madaxweynaha iyo Xogahaya ayaa ka wada hadlay xoojinta iyo adkeynta iskaashiga ka dhexeeya Soomaaliya iyo Qaramada Midoobay, gaar ahaan dhinacyada nabadda gobolka, amniga iyo horumar waara.

Madaxweyne Xasan Sheekh ayaa uga mahadceliyey Xoghayaha Guud taageerada joogtada ah ee Qaramada Midoobay ay siiso shacabka iyo dowladda Soomaaliyeed, isagoo uga warbixiyey qorsheyaasha hirgelay ee dowladdu ay ku xaqiijinayso amniga, doorashooyinka iyo dagaalka ka dhanka ah argagixisada.

1- Madaxweyne Xasan Sheekh Maxamuud ayaa khudbad ka jeediyey fadhiga 80-aad ee Golaha Guud ee Qaramada Midoobay, waxaana uu diiradda saaray duruufaha adag ee Soomaaliya ay ka soo gudubtey, dadaalada dowladda ee xaqiijinta amniga, dagaalka ka dhanka argagixisada, xoojinta dimuqraadiyadda iyo dhammeystirka Dastuurka.

2- Madaxweyne Xasan Sheekh Maxamuud ayaa khudbad ka jeediyey dood furan oo Golaha Ammaanka ee Qaramada Midoobay ay kaga arrinsanayeen tiknaloojiyadda casriga ah iyo saamaynta ay ku leedahay ammaanka caalamka.

3- Madaxweyne Xasan Sheekh Maxamuud ayaa kulan-doceed barbar socda Meertada 80-aad ee Golaha Guud ee Qaramada Midoobey la qaatay Dhaxal-Sugaha Boqortooyada Kuwait, Sheekh Sabaax Khaalid Al-Xamad Al-Sabaax.

4- Madaxweyne Xasan Sheekh Maxamuud, ayaa magaalada New York kulan kula qaatey saraakiil ka tirsan Dowladda Mareykanka oo ay ka mid yihiin Madaxa Arrimaha Siyaasadda ee Wasaaradda Arrimaha Dibadda Maraykanka, Marwo Allison Hooker, La-Taliyaha Arrimaha Afrika ee Madaxweyne Donald Trump, Mudane Massad Boulos, iyo Ku-Xigeenka Kaaliyaha Arrimaha Afrika, Mudane Vincent Spera.

5- Madaxweyne Xasan Sheekh Maxamuud ayaa ka qeyb-galay furitaanka Meertada 80-aad ee Golaha Guud ee Qaramada Midoobey.

6- Madaxweyne Xasan Sheekh Maxamuud ayaa magaalada New York uga qeyb-galay shir heer caalami oo looga hadlayay ictiraafka dowladnimada Falastiin iyo xaqiijinta xuquuqdooda taariikhiga ah.

7-Madaxweyne Xasan Sheekh Maxamuud ayaa Villa Somalia ku qaabilay Marwo Ramla Cali oo ah xiddig caalami ah ee tartamada feerka caalamiga ah.

8- Madaxweyne Xasan Sheekh Maxamuud ayaa hambalyo ku aaddan sannad guurada 95-aad ee maalinta Qaranimada Sacuudiga u diray Xaakimka labada Masjid ee Barakeysan, Boqor Salmaan Bin C/casiis Aala Sacuud.

9- Ku-Simaha Madaxweynaha ahna Guddoomiyaha Golaha Shacabka ee Baarlamanka Federaalka Soomaaliya Mudane Sheekha Aadan Maxamed Nuur ayaa wax laga xumaado ku tilmaamay dhacdadii lagu weeraray Saldhiga degmada Warta Nabadda in ay soo abaabuleen siyaasiyiin xilal kala duwan dalka kasoo qabtay, isagoo ka digay in ay arintaas mar kale soo laabato.

10- Ra’iisul Wasaare Xamza Cabdi Barre ayaa falkii lagu weeraray saldhigga Booliiska Degmada Warta Nabadda ku tilmaamy mid xambaarsanaa farriin lagu carqalaydanayo amniga caasimada dalka, loogana hortagayo xaqa dastuuriga ah ee muwaadiniinta ee dhinaca doorashooyinka, laguna xagal daacinayo dagaalka ka dhanka ah Khawaarijta Al Shabab.

11- Golaha Wasiirrada Xukuumadda Federaalka Soomaaliya ayaa cod buuxa ku ansixiyay qaraar ku saabsan gunaanadka xilka Xeeldheeraha Madaxabannaan ee Xuquuqul Insaanka Soomaaliya, kaas oo la filayo in si rasmi ah loo soo afjaro dhammaadka bisha Oktoobar 2025.

12- Golaha Wasiirrada ayaa ansixiyey Hindise-Sharciyeedka Machadka Sare ee Arrimaha Sharciga, iyo Hindise-Shrciyeedka Sharciga Badqabka Caanaha, kuwaas oo muhiimad weyn u leh adeegga Bulshada.

13- Ra’iisul Wasaare Xamza cabdi Barre, ayaa qaabilay Agaasimaha Bariga iyo Bartamaha Afrika ee Hay’adda CARE International, Mr Apollo Gabzira, iyaga oo ka wada hadlay dardar-gelinta mashaariicda ay dalka ka fuliso hay’adda iyo sidii ay u waafajin lahaayeen Qorshaha Isbeddelka Qaran (NTP) oo qeexaya barnaamijyada mudnaanta u leh dowladda.

14- Ra’iisul Wasaare Xamza Cabdi Barre, ayaa dhagax-dhigay dhismaha xarunta Wasaaradda Waxbarashada, Hiddaha iyo Tacliinta Sare.

15- Ra’iisul Wasaare Ku-Xigeenka Soomaaliya Mudane Jibriil Cabdirashiid Xaaji Cabdi ayaa Muqdisho ku soo dhaweeyey 151 dhalinyaro Soomaali ah oo dowladda ya ka soo celisay dalka Libya oo ay muddo ku dhibaateysanaayeen.

16- Ra’iisul Wasaare Ku-Xigeenka Soomaaliya, Mudane Jibriil Cabdirashiid Xaaji Cabdi, ayaa guddoomiyey kulanka u diyaar-garowga is-afgaradyada iskaashiga (MoUs) ee Soomaaliya iyo Qatar.

17- Guddoomiyaha aqalka sare ee Baarlamaanka Federaalka Soomaaliya Mudane Cabdi Xaashi Cabdullaahi qaabilay xiddigta feerka caalamiga ah Marwo Ramla Cali.

18- Gudoonka Baarlamanka oo furay kulan ku saabsan geedi socodka dhammaystirka Dastuurka.

19- Guddoomiyaha Maxkamadda Sare ee dalka Mudane Baashe Yuusuf Axmed ayaa guddoomiyey kulan muhiim ah oo lagu soo bandhigay warbixinta xaaladda xabsiyada dalka.

20- Dowladda Federaalka Soomaaliya ayaa cambaaraysay falalka lagu carqaladeynayo amniga caasimadda dalka ee Muqdisho, oo ay siyaasiyiin mucaarad ah ku weerareen Saldhigga Booliska ee Degmada Warta Nabadda.

21- Taliska Ciidanka Booliiska Soomaaliya ayaa si adag u cambaaraayey weerarka xubno mucaaradka ka tirsan ay ku qaadeen Saldhigga Booliska Warta Nabadda xilli ay ku sugnaayeen Taliyaha Booliska Soomaaliya iyo Taliyaha Qeybta Guud ee Gobolka Banaadir.

22- Taliyaha Ciidanka Booliiska Soomaaliyeed S/Guuto Asad Cismaan Cabdullaahi ayaa kulan wadajir ah la qaatay ehalada aabihii ay jirdilka ay u geysteen xubno ka tirsan Ciidanka Amniga, Aabaha ayaa uga mahad celiyay booliska sida ay uga jawaabeen falkii khaldanaa ee lagula kacay.

23- Taliyaha Ciidanka Booliska Soomaaliyeed S/Guuto Asad Cismaan Cabdullaahi ayaa la kulmay Hooyo iyo Aabe Soomaaliyeed oo Ciidamada Amaanka qaybtood oo hadda xiran jirdil u geysteen. Taliyaha ayaa ka raaligeliyay Aabaha iyo Hooyada Soomaaliyeed dhacdada xad gudubka ah ee loo geystay.

24- Taliyaha Ciidanka Boliiska Soomaaliyeed S/Guuto Asad Cismaan Cabdullaahi ayaa saraakiisha iyo Ciidanka Booliska farey inay si xilkasnimo leh u gutaan waajibaadkooda shaqo, kana fogaadaan dhibaateynta shacabka.

25- Guddoomiyaha Maamulka Gobolka Banaadir ahna Duqa Magaalada Muqdisho, Dr. Xasan Maxamed Xuseen (Muungaab), ayaa cambaareeyay falkii abaabulnaa ee lagu weeraray Saldhigga Booliska Degmada Warta Nabadda.

26- Wasiirka Amniga Gudaha Mudane Cabdullaahi Sheekh Ismaaciil (Fartaag), ayaa guddomiyay shir looga hadlayey amniga caasimadda oo ay yeesheen hay’adaha amniga iyo Maamulka Gobolka Banaadir.

27- Wasiirka Gaashaandhigga Mudane Axmed Macallin Fiqi ayaa magaalada New York kula kulmay Agaasimaha Fulinta ee Xarunta Dadka Rayidka ah ee Xilliyada Colaadaha (CIVIC), Mudane Hichem Khadhraoui.

28- Madaxweynaha Dowlad Goboleedka Galmudug Mudane Axmed Cabdi Kaariye ayaa ka qeybgaley saxiixa qandaraaska dhismaha waddada Dhuusamareeb ilaa Qiridhi uu goob joog ka haa Wasiirka Hawlaha Guud ee XFS Dr Cilmi Maxamuud Nuur.

29- Wasiirka Hawlaha Guud iyo Guriyeeynta Soomaaliya Dr Cilmi Maxamuud Nuur ayaa magaalada Dhuusamareeb ku soo xiray shirka guddiga sare ee Mashruuca Horumarinta Waddooyinka Soomaaliya oo ay isugu yimaadeen Wasiirradda Hawlaha Guud ee Dowlad Goboleedyada dalka ka jira.

30- Wasiirka Warfaafinta, Dhaqanka iyo Dalxiiska Mudane Daa’uud Aweys Jaamac ayaa ka tacsiyeeyay geerida Marxuum Eng Maxamuud Cali Guuleed oo ka mid ahaa farsamayaqaanadii ugu horeeyay ee Radio Muqdisho.

31- Wasiirka Arrimaha Dibadda iyo Iskaashiga Caalamiga ah Mudane Cabdisalaan Cabdi Cali ayaa magaalada New York kula kulmay Wasiirka Arrimaha Dibedda ee Baxrayn Mudane Dr. Abdullatif bin Rashid.

32- Wasiirka Arrimaha Gudaha, Federaalka iyo Dib u Heshiisiinta Mudane Cali Yuusuf Cali-Xoosh ayaa sheegay in baraha bulshada ay ka socoto dhaqan aan wanaagsanayn, oo ay soo badanayaan dadka xumaanta iyo iskudirka wada, wuxuuna odeyaasha dhaqanka ku booriyay in ay kaalintooda ka qaataan, bulshadana ay wacyi geliyaan.

33- Wasiirka Awqaafta iyo Arrimaha Islaamka ee XFS, Mudane Sheekh Mukhtaar Roobow Cali, ayaa qaabilay Safiirka Turkiga ee Soomaaliya, Danjire Alper Aktas, iyo U-Qeybsanaha arrimaha Diinta Turkey, Cumar Faaruq Arslan.

34- Wasiirka Arrimaha Dibadda iyo Iskaashiga Caalamiga, Mudane Cabdisalaan Cabdi Cali, ayaa magaalada New York kula kulmay Wasiirka Arrimaha Dibedda ee Serbia Marko Đurić, iyagoo kala saxiixday iskaashi diblomaasiyadeed oo lagu xoojinayo xiriirka labada dal.

35- Wasiirka Gaadiidka iyo Duulista Hawada, Mudane Maxamed Faarax Nuux, ayaa kulan la yeeshay Wakiilka Hay’adda Qaramada Midoobay u qaabilsan Horumarinta (UNDP) ee Soomaaliya Md. Lionel Laurens,

36- Wasiirka Isgaarsiinta iyo Tiknoolajiyada Mudane Maxamed Aadan Macallim ayaa saxiixay dhammaan heshiisyada iyo shuruucda wax ka beddelka lagu ansixiyey Shirweynaha 28-aad ee Ururka Boostada Adduunka (UPU), oo ka dhacay magaalada Dubai.

37- Wasiirka Dekedaha iyo Gaadiidka Badda, Mudane Abdulkadir Mohamed Nur, ayaa magaalada Istanbul kulan kula yeeshay Wasiirka Warshadaha iyo Tiknoolajiyada ee Jamhuuriyadda Türkiye, Mudane Mehmet Fatih Kacir.

38- Wasiirka Gaashaandhigga Soomaaliya Mudane Axmed Macallin Fiqi, ayaa magaalada Beijing kulan doceed kula yeeshay Wasiirka Difaaca Jamhuuriyadda Shiinaha, Admiral Dong Jun, xilli uu ka qayb-galay Madasha Caalamiga ah ee Difaaca ee Xiangshan.

39- Wasiir-Ku-Xigeenka Warfaafinta, Dhaqanka iyo Dalxiiska Soomaaliya, Mudane Cabdiraxmaan Yuusuf Al-Cadaala, ayaa booqasho rasmi ah ku tegay Aqalka Sharci-dejinta ee gobolka Minnesota, halkaas oo ay ku soo dhoweeyaan Xildhibaan Samakaab Xuseen oo ka tirsan Baarlamaanka gobolkaas.

40- Ciidanka Hay’adda Sirdoonka iyo Nabadsugidda Qaranka (NISA) iyo saaxiibada caalamka ayaa howlgallo ka dhacay gobollada Hiiraan, Galgaduud iyo Shabeellaha Hoose, waxay ku dileen 24 xubnood oo ka tirsan Khawaarijta Al Shabab. Argagixisada la laayey ayaa waxaa ku jiray 3 horjoogayaal oo uu ka mid yahay Horjooge Cabdi Xiiray.

41- Taliyaha Ciidanka Booliska S/Guuto Asad Cismaan Cabdullaahi ayaa si rasmi ah u soo xiray tababar ay qaateen cutubyo ka tirsan ciidanka gaarka ah ee Galeyr oo qeyb ka ah Ciidanka Booliska oo ay tabbabarkooda taageertay Dowladda Mareykanka.

42- Agaasimaha Guud ee Hay’adda Socdaalka iyo Jinsiyadda Mudane Mustafa Dhuxulow ayaa furay tababar ku saabsan baarista iyo hubinta dukumentiyada, kaas oo ay ka faa’iideysanayaan 30 sarkaal oo ka kala socda waaxyaha kala duwan ee Hay’adda,

43- Wasiiru Dowlaha Caddaaladda iyo Dastuurka Mudane Ilyaas Sheekh Maxamed ayaa ka qeyb galay kulan dadweyne oo hay’adaha u xilsaaran dib-u-eegista Dastuurka ay ku qabteen magaalada Muqdisho oo looga hadlayay doorka haweenka Soomaaliyeed ee ka-qaybgalka geeddi-socodka dhameystirka dastuurka.

44- Wasiirka Gaadiidka iyo Duulista Hawada Mudane Maxamed Faarax Nuux, ayaa magaalada Nairobi ku soo xiray shir-hawleed ballaaran oo muddo toddobaad ah socday, kaasi oo ay yeesheen kooxo farsamo oo ka kala socday Wasaaradda Gaadiidka iyo Duulista Hawada Soomaaliya iyo Bankiga Adduunka.

45- Jaaliyadda Soomaaliyeed ee ku nool gobolka Minnesota ee dalka Maraykanka ayaa si diirran u soo dhaweysay Wasiir Ku-Xgeenka Warfaafinta Soomaaliya, Mudane Cabdiraxmaan Yuusuf Al-Cadaala, iyo wafdi uu hoggaaminayay oo hawlo shaqo u jooga dalka Maraykanka.

46- Taliyaha Ciidanka Xoogga Dalka S/Gaas Odowaa Yuusuf Raage, ayaa la kulmay Taliyihii hore ee Hay’adda Nabadsugidda iyo Sirdoonka Qaranka (NISA), haatanna ah Wakiilka Soomaaliya u fadhiya Isbahaysiga Ciidamada Wadamada Islaamka ee La-dagaallanka Argagixisada (IMCTC), General Cabdiraxmaan Maxamed Tuuryare isaga oo ka dhegeystay warbixin la xiriirta kaalinta isbahaysiga.

47- Taliyaha Ciidanka Booliska S/ Guuto Asad Cismaan Cabdullaahi ayaa Saraakiil dalacaad loo sameeyey u soo xiray tababar aqoon kororsi oo la xiriira Shuruucda iyo Nidaamka Maamulka.

48- Taliyaha Ciidanka Booliika S/Guuto Asad Cismaan Cabdullaahi ayaa Jaamacadda Umadda Qeybteeda 21 Oktobar ka daah furey Imtixaan Leyli Sarkaalnimo u gelayaan ardey ka qalin jabiyey Jaamacadaha si ay uga mid noqdaan dhiigga cusub ee ku biiraya Ciidanka Booliska.

Wasiirro iyo Xildhibaanno ka tirsan Dowladda Federaalka Soomaaliya ayaa magaalada Muqdisho uga qeybgalay xaflad lagu maamuusayay abaalmarinta shirkado ganacsi oo ku guuleystay kobcinta tayada adeegyada loo qabto shacabka Soomaaliyeed.

Xafladdan oo ay soo qabanqaabiyeen maamulka Hey’adda Tayodhowrka Qaranka, waxaa sidoo kale ka qeybgalay maamulayaasha shirkadaha wax soo saarka, aqoonyahanno, ganacsato iyo marti sharaf kale.

Wasiirka Isgaarsiinta iyo Tiknolojiyada XFS, Mudane Maxamed Aadan Macallin, oo ka hadlay munaasabadda, ayaa ka warbixiyay muhiimadda tartamada ganacsiga iyo doorka ay shirkaduhu ku leeyihiin tayeynta adeegyada la siiyo bulshada.

Xoghayaha Guud ee Hey’adda Tayodhowrka Qaranka, Guuleed Cabdirashiid, ayaa isna sheegay in tartanka shaqooyinka la qabto uu dhiirrigelinayo adeegyo tayo leh oo wax u tara ummadda.

Agaasimaha Machadka Tayada Qaranka, Abuukar Axmed Culusoow, ayaa sheegay in shirkado dhowr ah oo abaalmarin la siiyay loo doortay inay Soomaaliya ku matalaan tartamada Ururka Iskaashiga Dhaqaalaha ee Bulshada Bariga Afrika.

Ciidanka Hay’adda Sirdoonka iyo Nabadsugidda Qaranka (NISA) iyo saaxiibada caalamka ayaa howlgallo qorsheysan oo lagu beegsaday horjoogayaal iyo maleeshiyaad ka tirsan Khawaarijta ka fuliyay gobollada Hiiraan, Galgaduud iyo Shabeellaha Hoose.

Howlgalka gobolka Hiiraan:

Waxaa lagu dilay horjooge Cabdi Xiiray iyo labo horjooge oo kale oo ku sugnaa degmada Moqokori. Cabdi Xiiray, oo muddo lagu raad joogay, ayaa ahaa dhiigyo-cab abaabulay dhagarro badan oo lagu waxyeelleeyay shacabka deegaannada Hirshabeelle.

Howlgalka gobolka Galgaduud:

Illaa 11 xubnood oo ka tirsan Khawaarijta Al-Shabaab ayaa lagu dilay deegaanka Nooleeye, kadib markii la helay xog muujinaysay in halkaasi lagu abaabulayay maleeshiyaad.

Howlgalka gobolka Shabeellaha Hoose:

In ka badan 10 xubnood ayaa lagu dilay tiro kalena waa lagu dhaawacay, howlgal lagu beegsaday tuulada Tugaarey oo hoos timaadda degmada Awdheegle.

Howlgalladan bartilmaameedka ah ayaa qayb ka ah dadaallada joogtada ah ee lagu naafaynayo Khawaarijta, loogana hortagayo khatar kasta oo ay ku hayaan shacabka Soomaaliyeed.

Kusimaha Madaxweynaha Jamhuuriyadda ahna Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe),ayaa maanta xafiiskiisa ku qaabilay Safiirka Dowladda Suudaan u fadhiya Soomaaliya, Danjire Abdelrahman Khalil Ahmed Afandi.

Kulanka ayaa diiradda lagu saaray adkaynta iyo dardargelinta xiriirka taariikhiga ah iyo walaaltinimada ku dhisan ee ka dhexeeya labada dal ee Soomaaliya iyo Suudaan.

Danjire Abdelrahman ayaa uga mahadceliyay Kusimaha Madaxweynaha ahna Guddoomiyaha Golaha Shacabka soo dhoweyntiisa diirran, isagoo xusay in Dowladda Suudaan ay ku faraxsan tahay xiriirka qotada dheer ee ay la leedahay Soomaaliya, waxa uuna sidoo kale ku bogaadiyay doorka muhiimka ah ee Golaha Shacabka ku leeyahay xoojinta wadashaqeynta labada dal.

Kusimaha Madaxweynaha Jamhuuriyadda ahna Guddoomiyaha Golaha Shacabka Mudane Sheekh Aadan Maxamed Nuur (Madoobe) ayaa caddeeyay in Soomaaliya iyo Suudaan uu ka dhexeeyo xiriir walaaltinimo oo soo jireen ah, kaas oo ku dhisan is-ixtiraam iyo iskaashi, isagoo tilmaamay in shacabka Soomaaliyeed iyo dowladdooda ay mar walba abaal weyn u hayaan taageerada iyo garab istaagga shacabka iyo dowladda Suudaan.

Wasiir-ku-xigeenka Wasaaradda Warfaafinta, Dhaqanka iyo Dalxiiska Soomaaliya, Mudane Cabdiraxmaan Yuusuf Al-Cadaala, ayaa maanta booqasho rasmi ah ku tegay Aqalka Sharci-dejinta ee gobolka Minnesota, halkaas oo si sharaf leh loogu soo dhaweeyey Xildhibaan Samakaab Xuseen, oo ka tirsan Baarlamaanka gobolkaas.

Kulanka labada masuul ayaa diiradda lagu saaray muhiimadda kobcinta dalxiiska Soomaaliya iyo kaalinta dimuqraadiyaddu ku leedahay horumarinta dalka. Wasiir Al-Adala ayaa Xildhibaan Samakaab gudoonsiiyey Shahaado Sharaf, isaga oo uga mahadceliyey kaalinta uu ka qaatay xoojinta xiriirka bulshada Soomaaliyeed ee Minnesota iyo dalkii hooyo.

Wasiirku wuxuu caddeeyey in Soomaaliya ay leedahay fursado badan oo dalxiiseed oo u baahan in la soo bandhigo, isagoo xusay in qurba-joogtu ay door muuqda ku yeelan karaan dhiirrigelinta dhaqaalaha dalxiiska. Sidoo kale wuxuu sheegay in dimuqraadiyaddu tahay tiir muhiim u ah dowlad-dhisidda, isla markaana mudan in laga faa’iideysto casharrada laga baran karo nidaamka sharci-dejinta Minnesota.

Dhankiisa, Xildhibaan Samakaab Xuseen ayaa Wasiirka ku soo wareejiyey xafiisyada Aqalka Sharci-dejinta Minnesota, isagoo uga warramay taariikhda dhismaha Golaha, habraacyada sharci-dejinta, iyo sida dimuqraadiyaddu ugu adeegto bulshada gobolka.

Kulanka ayaa lagu tilmaamay mid muhiim u ah xoojinta xiriirka iskaashi ee u dhexeeya dowladda Soomaaliya iyo qurba-joogta, gaar ahaan dhinacyada dalxiiska, dhaqanka iyo dimuqraadiyadda.

Ra’iisul Wasaare Xamse Cabdi Barre ayaa si adag u cambaareeyay weerarkii lagu qaaday saldhigga booliiska degmada Yaaqshiid, isagoo ku tilmaamay fal liddi ku ah xasilloonida iyo horumarka caasimadda. Wuxuu sheegay in weerarkaas uu xambaarsanaa farriin muujinaysa in Muqdisho aan loo oggolaan horumar, nabad iyo dowladnimo ka hirgasha.

Ra’iisul Wasaaruhu wuxuu si cad u sheegay in falkaasi uu ka dhan yahay dadaallada dowladda ee ku aaddan in shacabka loo sugo adeegyada dowliga ah, la dagaallanka Khawaarijta iyo xaqiijinta xuquuqda dastuuriga ah ee muwaadiniinta Soomaaliyeed.

Waxa uu faray hay’adaha amniga inay adkeeyaan ilaalinta ammaanka shacabka, isla markaana si degdeg ah uga hortagaan cid kasta oo isku dayda inay fowdo ka abuurto magaalada.

Taliyaha Ciidanka Booliiska Soomaaliyeed, Sarreeye Guuto Asad Cismaan Cabdullaahi, ayaa Jaamacadda Ummadda, qeybteeda 21 Oktobar, ka daah furay imtixaan leyli sarkaalnimo oo ay gelayaan arday ka qalin jebisay jaamacadaha, si ay uga mid noqdaan dhiigga cusub ee ku biiraya Ciidanka Booliiska.

Taliyaha ayaa masuuliyiinta imtixaanka qaadaya u jeediyay dardaaran, wuxuuna ardayda u sheegay in imtixaanku yahay mid daahfuran, qof walbana uu ku gudbi karo heerkiisa aqooneed, iyadoo laga fogaanayo eex iyo nin-jecleysi.

Waxaa maanta si weyn loogu soo dhaweeyay xarunta Safaaradda Soomaaliya ee magaalada Nairobi kooxda Mogadishu City Club, kuwaas oo magaalada u jooga tartanka CAF ee qaaradda Afrika.

Joogitaankooda iyo ka-qaybgalka tartanka wuxuu muujinayaa adkaysiga ciyaareed ee shacabka Soomaaliyeed iyo riyooyinka ay matalayaan kumannaan taageerayaal ah oo ku kala sugan daafaha dalka iyo dibadda.

Ciyaartii ugu dambeysay ee ay Mogadishu CC la ciyaartay kooxda Kenya Police Football Club ayaa keentay xiisad dareen abuurtay, kadib markii dhalinyaro Soomaaliyeed oo ka qaybgalay ciyaartaasi ay ku kaceen falal laga xumaaday oo ay ku dhaawaceen calanka dalka Kenya. Arrintaas waxay keentay falcelin laga yaabo inay dhibaato dhaliso.

Kooxda Mogadishu CC iyo diblomaasiyiinta safaaradda ayaa qabtay kulan warbaahineed oo lagu xallinayo xiisadda, iyadoo Danjiraha Soomaaliya ee Kenya, Mudane Jabril Ibraahim Cabdulle, uu ka hadlay.

Danjiraha ayaa yiri “Waxaan halkan ku caddeynayaa waxaannu si adag u cambaareynaynaa falalka ay sameeyeen tiro yar oo dad ah xilligii ciyaartu socotay, taas oo nasiib darro dabooshay ciyaartii wanaagsanayd ee labada koox soo bandhigeen.”

Waxa uu intaas ku daray:

“Xiriirka Soomaaliya iyo Kenya wuxuu marayaa heer taariikhi ah, oo ku saleysan iskaashi dhanka ganacsiga, waxbarashada, amniga iyo dhaqanka. Wada-shaqeyntan sii kobcaysa waxa ay ka tarjumeysaa kalsooni iyo aragti mideysan oo salka ku haysa nabadda, xasilloonida, iyo barwaaqada Geeska Afrika.”

Tababaraha kooxda Mogadishu CC ayaa isaguna uga mahadceliyay Dowladda Kenya iyo safaaradda soo dhoweyntooda, isagoo sheegay inay ka xun yihiin falka dhacay, ayna diyaar u yihiin in la xalliyo wixii khalad ah.

Ugu dambeyn, bulshada Soomaaliyeed iyo tan Kenya ayaa loogu baaqay inay ilaaliyaan nabadda, is-qadarka, iyo walaaltinimada, iyadoo la xasuusinayo in kubadda cagtu tahay buundo bulshada isku xirta, saaxiibtinimo dhalisa, una taagan midnimo iyo is-dhexgal.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa khudbad ka jeediyey dood furan oo Golaha Ammaanka ee Qaramada Midoobay ay kaga arrinsanayeen tiknaloojiyadda casriga ah iyo saamaynta ay ku leedahay ammaanka caalamka.

Madaxweynaha ayaa sheegay in garaadka macmalka ah uu yahay xaqiiqo casri ah oo si degdeg ah u beddelaysa nolosha, dhaqaalaha iyo qaababka ammaanka caalamiga ah, isagoo tilmaamay in ay leedahay fursado waaweyn oo lagu xoojin karo nabadda iyo horumarka, balse sidoo kale ay wadato khataro culus.

Madaxweyne Xasan Sheekh ayaa soo bandhigay muhiimadda dejinta shuruuc iyo siyaasado caalami ah oo lagu hago adeegyada garaadka macmalka ah ee AI, isagoo xusay in loo baahan yahay in la xaqiijiyo in si siman ay tiknaloojiyadda casriga ah u gaarto dalalka caalamka oo idil.