Wasiirka Amniga Gudaha ee Xukuumadda Federaalka Soomaaliya, Jeneraal Cabdullaahi Sheekh Cismaan (Fartaag), ayaa baaq nabadeed u diray beelaha walaalaha ah ee ku dagaalamaya qaar ka mid ah gobollada dalka. Wasiirka ayaa ku boorriyey dhinacyada isku haya colaadaha in ay joojiyaan dagaalka, islamarkaana ay doorbidaan nabadda iyo wada hadalka.

Jeneraal Fartaag ayaa sheegay in dagaallada sokeeye ay dib u dhac ku keenayaan horumarka iyo wadajirka bulshada Soomaaliyeed. Waxa uu ugu baaqay waxgaradka, culimada, iyo odayaasha dhaqanka in ay ku dhaqaaqaan dedaallo lagu xallinayo khilaafaadka, laguna dhiirri-gelinayo dib-u-heshiisiin dhab ah.

Wasiirka ayaa hoosta ka xarriiqay in dowladda federaalka ay ka go’an tahay sidii nabad waarta looga dhalin lahaa dalka, isagoo xusay in Wasaaradda Amniga ay ku howlan tahay qorshayaal lagu taageerayo heshiisiinta iyo ilaalinta amniga. Waxa uu ku baaqay in si wadajir ah looga shaqeeyo sidii loo soo afjari lahaa colaadaha si bulshada Soomaaliyeed ay ugu wada noolaadaan nabad iyo walaaltinimo.

Ugu yaraan 151 qof ayaa ku dhintay diyaarad rakaab ah oo ku burburtay garoon diyaaradeed oo ku yaala magaalada Muan ee dalka Kuuriyada Koonfureed, sida ay sheegtay wakaaladda dabdamiska qaranka ee dalkaasi.

Hay’adda Dab-damiska ayaa xaqiijisay in 151 qof ay dhinteen, laba qof oo shaqaala ahna la soo badbaadiyay,kadib markii la damiyay dab qabsaday diyaaraddasi oo ku burburtay wadada ay cagadhigtaan diyaaradaha ee Magaalada Muan.

Shilkaan ayaa yimid, iyadoo diyaaradda Jeju Air oo sidday 175 rakaab ah iyo lix shaqaale ah ay ka soo duushay caasimada Thailand ee Bangkok,waxayna ku burburtay garoonka caalamiga ah ee Muan oo qiyaastii 289km koonfur galbeed kaga beegan caasimada dalka Thailand.

Wakaaladda wararka ee Kuuriyada Koonfureed (Yonhap) oo soo xiganaysa saraakiisha wakaaladda dab damiska ayaa sheegtay in ay yartahay rajada laga qabo in la helo dad kale oo badbaaday.

Diyaaraddaasi rakaabka ah ayaa la sheegay in ay ku timid cillad,kadibna iyadoo bilaa taayirro ah ay ku soo degtay garoonka,sida laga soo xigtay Kooxo goobjoogayaal ah.

Roobabki Dayrta ee la filayay in ay da’aan bilihii Sebtembar, Oktoobar iyo Nofembar oo baaqday ayaa sababay abaar saameysay inta badan gobollada dalka oo hore ula daalaa-dhacayay dhibaatooyinka ka dhasha dhacdooyinka cimilo ee soo laalaabtay.

Degaannada Galmudug, gaar ahaan Gobolka Galgaduud, wuxuu qeyb ka yahay goobaha ay abaaruhu sida ba’an u saameeyeen, halkaas oo kumannaan shacab nugul ah ay ku wajahayaan nolol adag oo u baahan jawaab aan daah lahayn.

Hay’adda Maareynta Musiibooyinka oo ka jawaabeysa baahida bulsho ee guud ahaan gobolka iyo goobaha laga xoreeyay argagaxisada ayaa diyaarisay gargaar bani’aadannimo kaas oo 25 gaari oo xamuul ah maalmaha soo aaddan looga qaadi doono keydadka hay’adda ee magaalada Muqdisho.

Guddoomiyaha Hay’adda SoDMA, Md. Maxamuud Macallin Cabdulle, ayaa gargaarkaan oo loogu tala-galay in ka badan 13,000 oo qoys ku wareejiyay Wasiir ku xigeenka Wasaaradda Gargaarka Galmudug oo ay wehliyaan wasiirro iyo masuuliyiin kale oo ka tirsan Galmudug.

Guddoomiye Maxamuud Macallin ayaa Dowladaha Shiinaha iyo Turkiga kaga mahad-celiyay deeqdaan oo ay ugu tala-galeen in Dowladda Soomaaliya gaarsiiso dadka nugul, isagoo madaxda iyo shacabka Galgaduud ugu baaqay in gargaarkaan bani’aadannimo wadajir loogu hubiyo gacmaha dadka duruufaha nololeed heystaan ee loogu tala-galay.

Machadka Diblomaasiyadda iyo Tababbarrada ee Wasaaradda Arrimaha Dibadda iyo Iskaashiga Caalamiga ah ayaa maanta qabtay imtixaanka tijaabada ah ee loogu talagalay xulashada dufcaddii ugu horreysay ee baranaysa Dibloomada Sare ee Diblomaasiyadda iyo Xiriirka Caalamiga (Postgraduate Diploma – PGD).

Koorsadan muhiimka ah ayaa lagu wadaa inay si rasmi ah uga bilaabato Machadka bisha Janaayo ee sannadka cusub.

Imtixaanka waxaa ka qeyb galay 30 arday, iyadoo la filayo in ardayda soo gudubta ay helaan fursad gaar ah oo ay ku bartaan xirfadaha diblomaasiyadeed iyo xiriirka caalamiga ah.

Taliyaha Ciidanka Booliiska Soomaaliyeed Sarreeye Guuto Asad Cismaan Cabdullaahi ayaa maanta Xeebta Liido ee degmada Cabdicasiis waxa uu waqti kula qaatay Shacabka Muqdisho oo maalmaha fasaxa u damaashaad taga Xeebta .

Shacabkii iyo masuuliyiin kala duwan oo uu Taliyuhu Xeebta kula kulmay ayuu si farxadi ku dheehan tahay waqti kula qaatay, waxaana uu shacabka ku booriyey in nabadooda ilaashadaan maadama nabaddu fure u tahay nolosha.

Maamulka Shirkadda Rotana oo ah shirkad maamusha hoteello badan oo ku yaalla dunida ayaa ku dhawaaqday dhismaha Hotelkii u horreyay oo Five Star ah oo laga hirgallinaayo Magaalada Muqdisho.

Safiirka Soomaaliya u fadhiya Imaaraadka Carabta Amb Xuseen Cabdi Xalane iyo Mas’uuliyiinta ayaa goobjoogayaal ka ahaa saxiixa heshiiskaasi oo dhexmaray Maamulaha Premier Bank Jabriil Hassan Mohamed iyo madaxda shirkaddaasi.

Mashruuca lagu dhisayo Hotelka Rotana iyo adeegyada kale ee casriga ah ee uu yeelanayo Mashruuca Gateway Complex ayaa noqon doona mid taariikhi ah oo daabooli doona baahida kala duwan ee dhanka ganacsiga iyo adeegyo bulsho sida hoolalka shirarka,cisbitaal,dugsi,qolal la jiifto iyo mool.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa dhawaan Muqdisho ka daahfurtay Mashruuca Gateway Complex, kaas oo muhiim u ah dowlad dhiska casriga ah ee Soomaaliya.

Shirkadda Rotana Hotel Management Corporation PJSC waa shirkad maamusha huteello badan oo ku yaal qaar kamid ah dalalka  Bariga Dhexe,kuwa Balkanska, Afrika, iyo Turkiga.

1- Madaxweyne Xasan Sheekh Maxamuud oo dalka dib ugu soo laabtey kadib kulan miradhal ah oo uu magaalada Asmara kula soo yeeshay Madaxweynaha Eritrea Isaias Afwerki.

2- Madaxweyne Xasan Sheekh Maxamuud oo kulan casho sharaf la qaatay ganacsatada Soomaaliyeed ayaa ku bogaadiyey kaalintooda ku aaddan hirgelinta qorshaha Muqdishada cusub oo beddeli doonta muuqaalka caasimadda.

3- Madaxweyne Xasan Sheekh Maxamuud ayaa Madaxtooyada ku qaabilay Wasiirka Tacliinta Sare ee Jamhuuriyadda Aljeeriya Mudane Kamel Badari iyo wafdi uu hoggaaminayo.

4- Madaxweyne Xasan Sheekh Maxamuud ayaa qaabilay Danjiraha Talyaaniga u fadhiya Soomaaliya Pier Mario Daccò Coppi.

5- Madaxweyne Xasan Sheekh Maxamuud ayaa Ciidanka Booliska Soomaaliyeed ugu hambalyeeyay munaasabadda xuska sannad guurada 81-aad ee ka soo wareegtay aasaaskii ciidankaasi.

6- Madaxweyne Xasan Sheekh Maxamuud ayaa caddeeyay in 56-sanno, kadib, dalka doorasho qof iyo cod ah ay ka dhaceyso, wuxuuna ciidamada BooliIska Soomaaliya ku boorinyeey in ay adkeeyaan amniga iyo nabad galyada muuwaadiniinta codeyneysa.

7- Ra’iisul Wasaare Xamsa Cabdi Barre ayaa isku shaandheyn kooban ku sameeyay Golaha Wasiirrada.

8- Ra’iisul Wasaare Xamsa Cabdi Barre ayaa kulan la yeeshay Guddiga Doorashooyinka iyo Soohdimaha, isagoo farey inay degdeg uga hawlgalaan hirgelinta doorashooyinka.

9- Ra’iisul Wasaare Xamsa Cabdi Barre oo Ciidanka Booliska Soomaaliyeed ugu hambalyeeyay xuska sannad guurada 81aad ee ka soo wareegtay aasaaskooda.

10- Ra’iisul Wasaare Ku-Xigeenka Soomaaliya Mudane Saalax Axmed Jaamac ayaa kormeer shaqo ku tagey Wasaaradaha, Qorsheynta Qaranka, Ganacsiga iyo Warshadaha, Gaadiidka iyo Duulista Hawada, Maaliyadda, iyo Bankiga Dhexe halkaasina warbixin kaga dhageystay madaxda hay’adahaasi.

11- Guddoomiyaha Golaha Shacabka Sheekh Aadan Maxamed Nuur (Madoobe) ayaa hambalyo ku aaddan xuska sanad guuradii 81-aad ee ka soo wareegatay aas-aaska Ciidanka Booliiska Soomaaliyeed u diray guud ahaan Ciidamada Booliiska.

12- Ciidamada Qalabka Sida oo kaashanaya saaxiibada caalamka ayaa hawlgal ay fuliyeen ku dilay Maxamed Mire Jaamac (Abuu Cabdiraxmaan) oo ahaa horjooge sare oo ka tirsanaa Khawaarijta Al Shabab.

13- Wasiirka Amniga Gudaha Soomaaliya Mudane Jeneraal Cabdullaahi Sheekh Ismaaciil Fartaag ayaa booqday dugsiga tababarka ciidamada ee degmada Garbahaarey, isagoo ku guda jira booqaso shaqo oo uu ku joogo Gobolka Gedo.

14- Masuuliyiin ka tirsan Dowladda Soomaaliya ayaa Masjidka Isbaheysiga Islaamka uga qeybgalayay salaadda janaasada Sheekh Muuse Nuur Sheekh Muuse Cadde oo dhowaan geeriyooday.

15- Dowladda Soomaaliya ayaa dowladda Rwanda kala wareegtay Hoggaanka Ciidanka Heeganka ee Bariga Afrika (EASF) oo waajibaadkiisu yahay kor u qaadista nabadda iyo ammaanka gobolka.

16- Wasiirka Amniga Gudaha Mudane Cabdullaahi Sheekh Ismaaciil (Fartaag) ayaa kulamo la qaatay odayaasha dhaqanka, dhallinyarada iyo ururrada haweenka degmada Garbahaarey ee Gobolka Gedo.

17- Wasiirka Arrimaha Gudaha Cali Yuusuf Cali Xoosh ayaa ka daahfuray kulan lagu soo bandhigay Qorshaha Istaraatiijiyadda Hannaanka Dhab-u-Heshiinta ee Qaran.

18- Dawladda Soomaaliya ayaa si’ adag u cambaaraysay fal xadgudub ah oo ay Ciidamada Itoobiya ka geysteen magaalada Doolow ee Soomaaliya.

19- Bayaan ka soo baxay Wasaaradda Amniga Gudaha ayaa lagu sheegay in Eadeysane Axmed Maxamed Islaam uu kula kacay tacadiyo ka dhan ah shacabka degaannada Jubbaland ku dhaqan .

20- Wasiirka Arrimaha Dibadda Danjire Axmed Macallin Fiqi ayaa magaalada Qaahira kulan muhiim ah kula yeeshay Dr. Badr Abdel Aty Wasiirka Arrimaha Dibadda ee dalka Masar.

21- Wasiirka Isgaarsiinta iyo Tiknoloojiyadda Maxamed Aadan Macallin ayaa ka qeybgaley shirka sannadlaha ee xirfadleyda tiknoloojiyadda oo lagu qabtey Muqdisho.

22- Guddoomiyaha Gobolka Banaadir, ahna Duqa Magaalada Muqdisho, Mudane Maxamed Axmed Amiir ayaa magaalada Muqdisho kula kulmey Guddiga Doorashooyinka iyo Soohdimaha.

23- Taliyaha Ciidanka Dhulka ee Xoogga Dalka Soomaaliya Sareeye Guuto Sahal Cabdullaahi Cumar ayaa gaaray deegaanka Xawaadley Gobolka Shabeellaha Dhexe,halkaas oo jab xooggan lagu gaarsiiyay Khawaarijta.

24- Horjooge Dooyow Cismaan Cali oo ka tirsanaa Khawaarijta ayaa isku soo dhiibay Ciidanka Booliska Gaarka ah ee Dowlad Goboleedka Koonfur Galbeed ee ku sugan degmada Buur-Hakaba ee gobolka Bay.

25- Guddiga Doorashooyinka Qaranka iyo Soohdimaha ayaa kulamo wadatashi la yeeshay qaar ka mid ah laamaha dowladda, culumaa’udiinka iyo ururrada bulshada , iyagoo kala hadlay doorka kaga aaddan arrimaha doorashooyinka .

26- Taliyaha Ciidanka Booliiska Soomaaliyeed Sarreeye Guuto Asad Cismaan Cabdullaahi ayaa Xarunta Akadeemiyada ee Generaal Kaahiye tababar ugu soo xiray ciidamo ka tirsan Booliiska.

27- Wasiirka Arrimaha Dibadda Danjire Axmed Macallin Fiqi, ayaa wadahadal khadka telefoonka kula yeeshay Wasiirka Arrimaha Dibadda ee Jamhuuriyadda Dimuqraadiga ee Congo, Thérèse Kayikwamba Wagner.

28- Ciidamada ammaanka Galmudug ayaa gacanta ku soo dhigay nin loo heysto inuu dil u geystay L/Xidigle Xasan Quuri oo ahaa sarkaal ka tirsan Booliska Soomaaliya, qeybta Galmudug.

29- Wasiiru Dowlaha Arrimaha Dibadda Cali Maxamed Cumar ayaa magaalada Addis Ababa kulan laba geesood ah kula yeeshay Wasiiru Dowlaha Arrimaha Dibadda ee Jamhuuriyadda Federaalka Dimuqraadiga Itoobiya, Danjire Mesganu Arega.

Safiirka Soomaaliya ee dalka Uganda Amb. Fardowsa Maxamed Qanyare, ayaa ka qayb gashay daawashada tartanka feerka ee heerka dhexe,kaas oo uu wiil Soomaali ah ka galay kaalinta labaad tartan ka dhacay Magaalada Kampala ee dalkaasi.

Xiritaankii tartankaasi kadib,Safiirka ayaa Kulan dhiirigalin ah la qaadatay Cabdi Mudalib oo ku guuleystay kaalinta labaad ee feerka dhexe,waxayna intaa ku daray in guushaasi ay Soomaaliya uga dhigan tahay kaalinta koowaad.

Fardowsa Maxamed ayaa sheegtay in ay ku faraxsan tahay dhallinyarada Somaaliyeed ee dadaalka ugu jira horumarkooda,iyadoo xustay in ay garabtaagan tahay cid kasta oo dooneysa in ay guul u soo hooyaan dalka.

Cabdul Mudalib waxa uu ka qeybgalay 12 tartan oo xagga feerka ah,wuxuuna kaligii dadaal ku bixiyay Sidii guul u qalanta Soomaaliya uu u keeni lahaa.

Wasaaradda Arrimaha Dibadda iyo Iskaashiga Caalamiga ee Soomaaliya, ayaa qabatay kulan heer sare ah oo ay ka soo qeybgaleen aqoonyahanno Soomaali ah,kaas oo khuseeyay Baaqkhii Ankara ee u dhexeeya Soomaaliya iyo Itoobiya:

Kulankaan xasaasiga ah waxaa isugu yimid mas’uuliyiin iyo khubaro caan ah si ay u qiimeeyaan saameynta Baaqa Ankara ku leeyahay iskaashiga gobolka, iyadoo diiradda la saarayo dhinacyada dhaqaalaha, amniga iyo diblomaasiyadda.

Soo bandhigidda fikradaha kulankaasi  oo uu daadihinayay Agaasimaha Xafiiska Qurbajoogta Ibraahim Guure Maxamed, ayaa lagu muujiyay sida hagar la’aanta ah ee ay Soomaaliya uga go’an tahay xoojinta iskaashiga gobolka iyo horumarinta hadafka istiraatiijiyadeed ee siyaasadda dibadda.

Kulankaasi oo inta badan lagu fallanqeeyay Isbarbardhigga nuxurka uu xambaarsan yahay Baaqii Ankara waxaa Ka qaybgalay Danjire Axmed Macalin Fiqi, Wasiirka Arrimaha Dibadda iyo Iskaashiga Caalamiga,Wasiir ku xigeenka Isaaq Maxamuud Mursal,Xoghayaha Joogtada ah Xamza Aadan Xaadoow iyo Ku-simaha Safiirka Suudaan danjire Ammar Ahmed Babiker

Howlgal gaar ah oo si weyn loo qorsheeyay oo ay iska kaashadeen Ciidanka Qaranka iyo Saaxiibada Caalamka oo ka dhacay deegaanka Kuunyo Barrow ee Gobolka Shabeellaha Hoose, ayaa lagu qaarajiyay Horjooge Maxamed Mire Jaamac (Abuu Cabdirahmaan) oo ahaa horjoogihii Khawaarijta u qaabilsanaa Gobollada.

Horjooge Abuu Cabdirahmaan, ayaa ka mid ahaa horjoogeyaasha ugu sareeya Khawaarijta 15-kii sano ee ugu dambeysay, asagoo horjooge ka soo noqday qaybaha boobka iyo baadda shacabka iyo qaybta maleeshiyaadka, waxaana lagu xasuustaa inuu ahaa aas-aasihii Jabhadii Caanoole oo si qasab ah ugu biirtay Khawaarijta Al-Shabaab 2009-kii.

Dowladda Soomaaliya iyo Saaxiibada Caalamka,ayaa in muddo ah ku raad-joogay horjoogahaan iyo horjoogayaal kale oo dhiigyo cab ah, kuwaas oo dhammaantood la haayo macluumaadkooda oo dhamaystiran.

Tallaabadan waxay qeyb ka tahay qorshaha dowladda Soomaaliya ee Khawaarijta looga ciribtirayo deegaannada ay ku hareen, sidoo kalana looga dulqaadayo ciqaabta iyo dhibaatada ay ku hayaan bulshada Soomaaliyeed.