-Shirkii Aragti Wadaagga Soomaida ee ka socday Dalka Jabuuti oo Maanta lagu soo gaba-gabeeyay Caasimadda Djibouti ayaa waxaa laga soo saarey war-murtiyeed.

Shirka oo socday Saddexdii Maalmood ee la soo dhaafay ayaa waxaa diirrada lagu saaray:

1. Doorka Soomaalidu ka qaadan karto Nabadda Geeska Afrika
2. Qadiyadda Somaliland
3. Horumarinta Ganacsiga iyo Waxbarashada
4. Doorashooyinka ka socda Soomaaliya iyo Somaliland.

War-murtiyeedkii oo kooban:

* Madashu waxay dhiirigalinaysaa dardargalinta wada-hadallada Somaliland iyo Soomaaliya.

* Madashu waxay ku baaqday in dib loo soo celiyo wada-hadlaladii Somaliland oo doorkoodu ahaa isqancinta.

* Madashu waxay walaac ka muujisay xiisadaha siyaasaddeed ee sannadkan ka taagan Soomaaliya.

* Madashu waxay ku baaqday in doorashada Soomaaliya wakhtigeeda lagu qabto

* Madashu waxay walaac ka muujisay xiisadaha Siyaasaddeed ee ka taagan Somaliland gaar ahaan arrimaha dooorashooyinka.

* Madashu waxay Somaliland ugu baaqday in ay sii waddo wada-hadalkii kala dhaxeeyay Soomaaliya si xal looga gaadho arrinta Somaliland.

* Madashu waxay soo dhaweysay ballanqaadkii madaxweyne Cagjar ee ahaa in la xoojiyo Soomaalinimada.

* Kenya: Madashu waxay bogaadinaysaa doorka ay siyaasadda iyo ganacsiga ay ku leeyihiin Soomaalida Kenya.

* Madashu waxay ugu baaqeysaa hoggaanka Soomaalida Kenya in ay wax ka qabtaan burburinta hantida Soomaaliyeed gaar ahaan burburinta hantida shirkadaha isgaadhsiinta.

* Madashu waxay saluug ka muujisay tirada kooban ee ardayda soomaaliyeed iyo tayo xumaanta waxbarashada.

* Madashu waxay soo jeedisay in sannadka 2020 loo aqoonsado sannadka waxbarashada Soomaalida. Hal ku dhigna laga dhigto: “Yaan ubadka looga tagin aqoon la’aan”

* Madashu waxay ugu baaqeysaa qof kasta oo soomaali ah in uu kaalin ka qaato horumarinta caafimaadka waxbarashada iyo caafimaadka.

* Madashu waxay madaxweynaha Jabuuti u aqoonsatay xuddunta Soomaalida.

– Shirka waxaa soo xidhay madaxweynaha Jabuuti Ismaaciil Cumar Geelle oo sheegay in uu aqbalay war-murtiyeedka.

Guddoomiye ku xigeenka 1-aad ee Golaha Shacabka Soomaaliya Mudane; Cabdiwali Ibraahim Sh, Muuddeey iyo wafdi Ballaaran oo uu hoggaaminayo ayaa goordhow Gaaray Magaalada Baydhabo.

Guddoomiyaha iyo wafdigiisa ayaa ka qeyb galaya xuska Sanad guurada 1-aad ee kasoo wareegatay markii la doortay Madaxweynaha Dowlad goboleedka Koonfur galbeed Mudane;  Cabdi casiis Maxamed Xassan (Lafta gareen).

Xuska munaasabaddan oo ku beegan Berri oo ay Taariikhdu tahay 19ka Desembar ayaa lagu wadaa in ay sidoo kale ka qeyb galaan madax kale oo ka kala iman doonto maamul Goboleedyada iyo Caasimadda Dalka ee Muqdisho.

Hay’addaha  Ammaanka dowlad goboleedka Puntland ayaa ku guuleystay inay fashiliyeen qaraxyo ladoonayay ay doonayeen in ay ku  waxyeeleyaan Al-shabaab  dadka shacabka ee ku nool  magaaladda Boosaaso ee gobolka Bari.

Ciidamadda  Amniga ee gobolka Bari oo kaa shanayaa dadka deegaanka ayaa ka war helay qaraxyadan lagu xiray bartamaha magaalada Boosaaso oo ay argagaxisadu doonayeen inay ku gumaadaan shacabka Soomaaliyeed.

Qaraxyadda ayaa  lagu soo waramayaa  in la,gaa  soo  saaray agaagarka goobo ganacsi oo ay ku ganacsadaan dad ra’yada ah, iyadoo ay maalmihii lasoo dhaafay ay ka socdeen hawlgal amniga gobolka lagu xaqiijinayo tani iyo markii la doortay madaxweynahaa maamulka Puntland.

Sida uu noo xaqiijiyay wariyaha warbaahinta Qaranka uga soo warama Dhuusamareeb Maxamed Deeq Cabdi Maxamed, waxaa xalay magaalada Dhuusamareeb ka dhacday dil argagax leh kaddib markii nin ka mid ah dadka ku dhaqan xaafadda Waaberi ee degmadaasi uu walaalkiis ku dilay guri ay wada deganaayeen.

Ciidamada ammaanka oo gaaray goobta uu dilku ka dhacay ayaa halkaasi kula ku arkay meydka dhibbanaha iyo gacan ku dhiiglihii oo goobtaasi ka baxsaday, waxeyna ciidamadu billaabeen iney dabagalaan ninka dilay walaalkiis si ay u soo qabtaan sharcigana u horkeenaan.

Si dhab ah looma oga sababta uu ka dhashay dilkan, sidoo kale ma jirto illaa iyo hadda wax hadal ah oo ka soo baxay maamulka degmada Dhuusamareeb iyo hay’adaha amniga kaasoo ku saabsan falkan dilka ah.

Maleeshiyaad ka tirsan argagixisada Shabaab ayaa waaberigii saaka isku dayay in ay weerar gaadmo ah ku soo qaadaan fariisin ay ciidamada XDS ku leeyihiin galbeedka magaalada Balcad, hase yeeshee ciidamada ayaa u lilib dhigay islamarkaana fashiliyay weerarkaasi.

Ciidamada XDS oo ka warhelay una diyaargaroobay weerarkaasi ayaa dilay tiro ka tirsanayd maleeshiyaadkii soo weerar tagay, iyadoo ay ciidamadu halkaasi ku furteen saanad iyo hub farabadan sida ay ku warameen dad beeraley oo halkaasi ka dhawaa.

Maleeshiyaadka argagixisada ah ee banneeystay daadinta dhiigga dadka Soomaaliyeed ee abriyada ah islamarkaana dhac iyo boob ku haya hantida dadka ku dhaqan deegaannada ay dalka kaga harsanyihiin ayaa marar badan ku fashilmay isku dayo noocan oo kale ah oo ay ku doonayeen in ay ku soo weeraraan fariisimaha ciidamada.

Ra’iisul Wasaaraha xukuumadda federaalka Soomaaliya, mudane Xasan Cali Khayre iyo agaasimaha cusub ee qeybta maamulka Bangiga adduunka, Axel van Trotsenburg, ayaa kulan ku yeeshay magaalada Geneva ee dalka Swizerland.

Kulanka oo qeyb ka ahaa kulamada uu Ra’iisul Wasaaruhu la qaadanayo qaar kamid ah madaxda ka qeyb geleysa madasha qaxootiga adduunka ayaa looga hadlay arrima muhiim ah oo ay kamid yihiin dib-u-habeynta dhaqaalaha iyo qorshaha deynta looga cafinayo Soomaaliya.

Bangiga adduunka ayaa taageera hey’adaha dowladeed ee dalka si loo dhiirri geliyo dowlad wanaagga, loona karaariyo dib-u-kabashada dhaqaalaha iyo shaqo abuurka

Ra’iisul Wasaaraha ayaa intii uu joogay Geneva waxa uu kulamo gaar gaar ah la qaatay madaxweynaha Turkiga, Recep Tayyip Erdoğan iyo wasiirka arrimaha dibadda Sweden.

Dowladda Soomaaliya oo  qorsheyneysa in ay qunsulyaddo ka furato qaar ka mid ah magaalooyinka Mareykanka,

Danjiraha Soomaaliya u fadhiya Washinton  Cali Shariif oo ka hadlay xaflad ka dhacday gobolka Minnesota ayaa tilmaamay in qorshahaas uu u gudbiyey madaxda sare ee dowladda Soomaaliya.

“Waxay kaloo safaaradda ay ku talajirtaa, talana aan ku siinay madaxdeena,  in magaalooyinka ay ku badanyihiin Soomaalida laga furo Qunsiliyado si adeegga ay uga baahanyihiin Washinton uga haleen halkooda.” Ayuu yiri Danjire Cali Shariif.

Soomaalida oo kamid ah dadyowga qaxooti ahaan ku galay  Mareykanka ayaa waxay safka hore kaga jiraan Jaaliyadaha ugu tiradda badan ee ku nool dalkaasi.

Dowladda Soomaaliya ayaa bishii September, ee sanadkan 2019, ku guuleysatay in ay iibiso dhismaha safaaradda ee  Washington.

Ra’iisul Wasaaraha Soomaaliya, mudane; Xasan Cali Khayre,  ayaa Magaalada Geneva ee Dalka Swizerland kulan gaar ah kula qaatay Wasiirka arrimaha dibedda Dalka Sweden, ann christin linde.

Ra’iisul Wasaare Xasan Cali Khayre iyo Wasiirka arrimaha dibedda Sweden ayaa kulankooda uga wada hadlay barnaamijka deyn cafinta, xoojinta xariirka labada Dowladood iyo taageerada Sweden ee dib-u-kabashada iyo qorshayaasha dib-u-habeynta.

Labada mas’uul auaa hoosta ka wada xarriiqay  in ay jirto baahi weyn oo loo qabo in si dhaqsa ah guul looga gaaro hadafyada ku xeeran barta go’aan gaaridda ee barnaamijka deyn cafinta.

Ra’iisul Wasaaraha Dalka ayaa horay kulan gaar ah ula yeeshay Madaxweynaha Dalka Turkiga Recep Tayyip Erdoğan, iyagoo ka wada hadlay xoojinta xariirka, iskaashiga dhaqaalaha iyo ganacsiga,

Dowladda Sweden ayaa Soomaaliya ka taageertaa barnaamijyada dib-u-kabashada, dib-u-habeynta iyo dib-u-dhiska Dalka.

Kulanka ayaa qeyb ka ah shirar doceedyada uu Ra’iisul Wasaaruhu la qaadanayo qaaar kamid ah madaxda ka qayb galeysa madasha Qaxootiga ee lagu qabtay Magaalada Geneva ee Dalka Swizerland.

Qaban-qaabadii ugu dambeysay ee xareynta Odayaasha dhaqanka ee soo xulaya Xildhibaannada Barlamaanka dowlad Gobolleedka Galmudug ayaa ka soconta magaalada Dhuusamareeb ee xarunta Galmudug.

Guddiga farsamada maamul u sameynta Galmudug ayaa dadaal ugu jira sidii loo dhameystiri lahaa odoyaasha dhaqanka ee soo xulaya Xildhibaannada, iyagoo guddiga hoosta ka xariiqay in muddo saddex cisho ah ay u qabteen xalinta ciddii cabasho ka qabta soo xulista odayaasha dhaqanka.

Ilo wareed ku dhow dhow Odayaasha ayaa xaqiijinaya in ay meel gabo gabo ah mareyso xareynta odoyaasha soo xuli doono xildhibaannada ka mid noqonaya Baarlamaanka Dowlad Gobolleedka Galmudug.

Waxaa la dareemayaa xowliga ergada kusii qul qulaysa magaalada Dhuuso-mareeb iyadoo maalinnimadii shalay ay xildhibaanno ka tirsan Goleyaasha Shacabka iyo Aqalka ee dalka ay gaareen magaaladaasi.

Wafdiga Wasaaradda Boostada, Isgaarsiinta iyo Teknolojiyadda ee uu hoggaaminayo Wasiirka, Mudane Eng C/di Cashuur Xasan oo booqasho ku jooga dalka Sacuudi Carabiya ayaa kulamo la qaatay Masuuliyiinta Ururka Dayax-gacmeedka Carbeed ee ARABSAT oo xaruntiisu kutaalo magaalada Riyaadh ee Dalka Sucuudiga.

Madaxweynaha ahna Agaasimaha Guud ee ARABSAT Mudane Eng. Khalid A. Balkheyour oo ku soo dhoweeyey wafdiga xarunta Ururka ayaa waxa uu sheegay in ay soo dhoweynayaan ka qeyb qaadashada firfircoon ee soomaaliya ee howlaha Ururka ARABSAT maadaama dalkeenu uu ka midyahay saamileydii asaastay Ururka, kulamadan labada dhinaca oo ku soo dhammaadey is-afgarad ayaa waxaa sidoo kale looga hadlay sidii dowladda Soomaaliya uga faa’iideysan lahayd adeegyada ARABSAT iyo sidii dalkeena loogu caawin lahaa kaalmo farsamo oo la xiriirka dhinaca horumarinta Isgaarsiinta.

“Waxaa naga go’an in aan si firfircoon uga qeybqaadano dhammaan howlaha Guddiyada, Hay’addaha iyo Urrurada Gobol, Qaaradeed iyo Caalami ee isgaarsiinta iyo Tiknolojiyadda, kuwaas oo aannan badankood ka dhex muuqan muddo, taasna waxa ay muhiim u tahay wadaagista khibradaha iyo mideynta dadaalada,” ayuu yiri wasiir Cashuur oo intaasi ku daray “iskaashiga iyo isku-xirnaanshaha adduunka gaar ahaan dhinaca tiknolojiyadda waxa uu marayaa maanta heer aysan suurto-gal ahayn in aan gooni u socono, daddaaladan dhamaantoodna waxa ay leeyihiin hal ujeedo oo ku saabsan fulinta qeybaha kala duwan ee Siyaasada iyo Istaraatiijiyadda Qaran ee Isgaarsiinta iyo Tiknolojiyadda’’ ayuu hadalkiisa ku soo gabagabeeyay Wasiirku.

Sidoo kale wafdiga Wasiirka Boostada Isgaarsiinta iyo Tiknolojiyadda ayaa waxa ay booqasho ku tageen xarunta safaaradda dalkeena ee Magaalada Riyaad halkaas oo ay kula kulmeen diblomaasiyiinta ka howlgesha safaaradda, Wasiirka ayaa waxa uu warbixin ka siiyey diblomaasiyiinta xaaladda dalka, howlaha Tubta horumarinta dhaqaalaha dalka gaar ahaan howlaha ay sida gaarka ah ugu xilsaarantahay Wasaaradda.

Wafdiga Wasaaradda oo uu ka mid yahay Maareeyaha Hay’adda Isgaarsiinta Qaranka Mudane Cabdi Sheekh Axmed ayaa muddada ay joogaan dalka Sacuudigaa waxa ay ka qeybgali doonaan Shirka Wasiirrada Isgaarsiinta iyo Tiknolojiyadda dalalka carbta, waxa ayna sidoo kale kulamo gaar ah la yeelan doonaan masuuliyiinta Wasaaradda Isgaarsiinta iyo Tiknolojiyadda dalka Sacuudiga.