Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa ka qeyb galay furitaanka Meertada 77-aad ee Golaha loo dhan yahay ee Qaramada Midoobey oo lagaga arrinsanayo yareynta saboolnimada iyo xasillooni darrada, horumarinta waxbarashada, shaqo abuurka dhallinyarada, xal u helidda musiibooyinka dabiciiga ah iyo xuquuqda dadka la hayb sooco.

Madaxweynaha iyo Wafdigiisa ayaa soo bandhigi doona aragtida Dowladda Federaalka Soomaaliya ee ku aaddan xasiiloonida iyo nabadda, dagaalka ka dhanka argagixisada, wax ka qabashada abaaraha iyo gurmadka degdegga ah iyo dhammaan caqabadaha ay la tacaalayaan shacabka Soomaaliyeed iyo guud ahaan Shucuubta Gobolka.

Madaxweynaha Jamhuuriyadda iyo wafdigiisa ayaa ka wada Golaha loo dhanyahay ee Qaramada Midoobey Olole ku aaddan aragtida iyo qorshaha dowladda Federaalka Soomaaliya ee la xiriira la dagallanka saboolnimada iyo argagixisada, kuwaas oo shacabka Soomaaliyeed ay kala soo kulmeen dhibaato xooggan, haatanna la joogo xilligii laga gacan siin lahaa dowladda Soomaaliyeed in ay dhibaatadaas ka samata bixiso dadkeeda iyo guud ahaan Geeska Afrika.

Madaxweynaha ayaa kulan doceedyo la yeelan doona Madaxda dalalka ka qeyb galaya Meertadan, hoggaanka hay’adaha iyo ururrada caalamiga ah ee ka soo qeyb galaya Meertada 77-aad ee Golaha loo dhanyahay ee Qaramada Midoobey, si uu u adkeeyo danaha iyo doorka dalkeennu uu ku leeyahay fagaareyaasha caalamiga ah.

Madaxweynaha waxaa ku wehelinayey shirkan, Wasiirka Wasaaradda Arrimaha Dibadda iyo Iskaashiga Caalamiga Mudane Abshir Cumar Huruuse, Wasiirka Wasaaradda Deegaanka iyo Isbeddelka Cimilada Marwo Khadiija Maxamed Al-Makhsuumi, Wasiiru-dowlaha Madaxtooyada Qaranka Mudane Abshir Maxamed Axmed (Bukhaari), Madaxa Ergada Soomaaliya ee Qaramada Midoobey Mudane Abuukar Daahir Cusmaan iyo Agaasimaha Madaxtooyada Mudane Xuseen Sheekh Maxamuud.

MUQDISHO: 19:09:2022, Kulanka oo ka dhacay Xafiiska Wasiiradda ayaa waxa goob joog ka ahaa Wasiir Kuxigeenka & Agaasimaha Guud ee Wasaaradda iyo Xubno socday Guddiga Qaranka Shaqaalaha Rayidka.

Kulanka ayaa waxa looga hadlay dowrka Haweenka ee adeeg bixinta, tayaynta, kordhinta, kobcinta aqoonta & xirfadda Haweenka ku jira Shaqaalaha Rayidka.

Xubnaha ka socday Guddiga ayaa warbixin ka siiyey haweenka ku jira Shaqaalaha Rayidka & dowrkooda ku aaddan adeeg bixinta. Sidoo kale, wafdiga ayaa la wadaagay qorshaha Guddiga ee Horumarinta haweenka ku jira Shaqaalaha Rayidka Dowladda.

Wasiiradda ayaa sidoo kale warbixin ka siisay qorshaha Wasaaradda ee ku aadan kor u qaadidda aqoonta iyo xirfadda haweenka maaddaama ay dumarku laf dhabar u yihiin Bulshada Soomaaliyeed.

Geba-gebadii, labada dhinac ayaaa hoosta ka xarriiqay in ay lagama maarmaan tahay in la iska kaashado arrimaha sare ku xusan.

Ugu dambayn, Wasiiradda iyo musuuliyiinta kale ayaa Guddiga ku ammaanay sida ay markasta u ilaaliyaan xuquuqda Shaqaalaha Rayidka Dowladda iyo fursad siinta haweenka Soomaaliyeed.

Wasiir ku xigeenka Warfaafinta XFS Cabdiraxmaan Yuusuf Sheekh Al Cadaala iyo Xillibaan Saabir Nuur Shuuriye ayaa degmada Baxdo kula kulmay saraakiisha ciidanka iyo dadka deegaanka ee dagaalka kula jira kooxaha argagixisada ah ee Al Shabaab.

Wasiirka wasaaradda dhalinyarada iyo ciyaaraha XFS mudane Xil. Maxamed Barre Maxamuud ayaa labadii todobaad ee la soo dhaafay waday kulamo kala duwan oo uu la yeelanayo qaybaha kala duwan ee dhalinyarada Soomaaliyeed ee Caasimadda Muqdishu ku nool.

Wasiirka ayaa dhalinyarada ka dhegaysanayay waxyaabaha muhiimadda u leh ee ay xukuumadda Dan-Qaran ka doonayaan inay dhalinyarada u qabato.

Dhalinyarada oo isugu jira kooxo kala duwan oo qayb walba ay goonideeda u abaabulan tahay ayaa isku mid ka ahaa inta badan baahiyaha dhalinyarada haysta oo ay shaqo la’aanta iyo duufsiga kooxaha xagjirka ahi ugu horeeyaan.

Kooxaha dhalinyarada ah ee wasiirku la kulmay waxaa ka mid ahaa dhalinyarada baahiyaha gaarka ah qaba oo iyaguna soo gudbiyay baahiyaha ay la wadaagaan dhalinyarada Soomaaliyeed iyo kuwa iyaga khaaska u ah ee ay ka rabaan xukuumadda Dan-Qaran inay ahmiyad gaar ah siiso.

Wasiirka wasaaradda dhalinyarada iyo ciyaaraha mudane Maxamed Barre Maxamuud ayaa dhalinyarada uga sheekeeyay qorshaha xukuumadda Dan-Qaran ee Raisul Wasaare Mudane Xamsa Cabdi Barre uu hogaamiyo ay ku doonayso in lagu jiheeyo si waxtar lehna looga faa’iidaysto awoodda dhalinyarada iyo in kor loo qaado ka qayb-galkooda siyaasadda iyo dib u dhiska dalkeenna.

Wasiirka ayaa balan qaaday inuu xukuumadda hor-gayn doono qorsheyaal lagu hormarinayo dhalinyarada Soomaaliyeed wuxuuna dhalinyarada ku baraarujiyay halganka dib u xoraynta ah ee dalka ka socda iyo sida loogu xisaabtami awoodda dhalinyarada.

Dhalinyarada ayaa wasiirka iyo xukuumadda Dan-Qaran u balan qaaday garab istaag buuxa iyo inay diyaar uyihiin sidii ay usoo ceshan lahaayeen magacooda sida xun looga faa’iidaystay.

Ciidanka xoogga dalka oo kaashanaya dadka deegaanka ayaa galabta jab culus gaarsiiyay Maleeshiyaadka argagixisada ah ee Al Shabaab, kuwaasi oo ku sugnaa deegaanada Camal iyo Xalaaleey oo ku dhow deegaanka Halgan ee gobolka Hiiraan.

Ciidanka xoogga dalka oo kaashanaya Shacabka ayaa ka furtay Maleeshiyaadka Argagaxisada ah ee Al Shabaab hub farabadan ayaga oo goobta uga cararay rag dhintay.

Ciidanka xoogga dalka iyo dadka deegaanka ayaa gacanta ku haaya deegaanada dirirta ka dhacday galabta waxaana ay sii daba joogaan firxad ka Argagixisada.

Guddiga Gurmadka Abaaraha Gobalka Mudug ee Galmudug ayaa maanta kulankoodii ugu horeeyay la qaatay Qaar ka mida Bulshada Gaalkacyo.

Ra’iisul Wasaaraha Xukuumadda Federaalka Soomaaliya Mudane Hamza Abdi Barre, ayaa guddoomiyey kulanka Tiirka Xorreynta iyo Sugidda Amniga, kaas oo loogaga arrinsanayey howlgallada socda ee ka dhanka ah argagixisada Alshabaab iyo kacdoonka dalka lagaga xoreynayo.

Kulanka ayaa lagu soo bandhigay qorshaha dib-u-xoreynta deegaannada ay ku sugan yihiin Argagixisadu iyo xasilinta goobaha la xoreeyo, si loo gaarsiiyo dowladnimada iyo adeegyada bulshada ee ay nabad-diidka ka curyaamiyeen.

Ra’iisul Wasaaraha ayaa boggaadiyey ciidamada geesiyaasha ah oo kaashanaya bulshada ee ku guuleystay xoreynta deeganno ay ku dhuumaaleysanayeen nabad-diidka, isagoo tilmaamay muhiimadda baraarugga shacabku uu u leeyahay qorshaha xoreynta dalka.

Ra’iisul Wasaare Xamse Cabdi Barre ayaa uga mahadceliyey Hay’adaha Amniga iyo ciidamada Soomaaliyeed dadaalka ay ugu jiraan habeen iyo maalin xaqiijinta amniga shacabka, waxa uuna sheegay in Xukuumadda ka go’an tahay in guud ahaan dalka laga xorreeyo nabad-diidka Al-shabaab.

Wasiir ku xigeenka wasaaradda Warfaafinta XFS Cabdiraxmaan Sheekh Yuusuf Al Cadaala iyo Xildhibaan Cabdi Saabir Nuur Shuuriye ayaa maanta gaaray magaaladda Cadaado ee gobolka Galgaduud ayada oo ay halkaasi kusoo dhaweeyeen maamulka degmada Cadaado.

Ujeedka Socdaalka wasiir  Cadaala iyo xildhibaan Saabir Nuur Shuuriye ayaa waxaa uu yahay dardargalinta kacdoonka shacabka ee argagixisada looga xoreynayo degaanada Galmudug isla markaana loo dhiiri-galin lahaa shacabka iyo ciidanka xoogga ee u istaagay in ay iska dulqaadaan cadowga arxanka daran ee Argagixisada Al Shabaab.