Wasiiru Dowlaha Arrimaha Dibadda iyo Iskaashiga Caalamiga, Mudane Cali Cumar, ayaa kulan la qaatay Wasiirka ku xigeenka Arrimaha Dibadda ee Boqortooyada Sacuudi Carabiya, Mudane Waleed Elkhereiji. Labada dhinac waxay ka wada hadleen xoojinta iskaashiga ku aaddan xasilloonida gobolka, amniga, iyo kobcinta xiriirka dhaqaale.

Jamhuuriyadda Federaalka Soomaaliya waxay qiimeyneysaa doorka hoggaamineed ee mabda’a ku dhisan iyo dadaallada xasillinta ee ay Sacuudi Carabiya ka waddo gobolka. Labada dhinac waxay mar kale adkeeyeen ka go’naanshahooda horumarinta xiriirka laba geesoodka ah iyo sii qotodheeraynta iskaashiga istaraatiijiyadeed ee ku dhisan dan wadaag iyo barwaaqo la wadaago.

1- Madaxweyne Xasan Sheekh Maxamuud ayaa Madaxtooyada Qaranka ku qaabilay Marwo Sophie (Duchess of Edinburgh) oo ah xubin sare oo ka tirsan Qoyska Boqortooyada Ingiriiska.

2- Ra’iisul Wasaare Xamsa Cabdi Barre, ayaa qaabka fogaan aragga kaga qeybgalay Shir-madaxeedka Meertada 61-aad ee Golaha Xuquuqul Insaanka, isagoo xusay in Soomaaliya ay sii wadi doonto xoojinta horumarka laga gaaray arrimaha la xiriira Xuquuqda Aadanaha, iyo wax ka qabashada caqabadaha caalamiga ah,

3- Ra’iisul Wasaare Xamsa Cabdi Barre, oo kulan afur ah la qaatay mas’uuliyiinta iyo howlwadeennada Xafiiska Ra’iisul Wasaaraha, ayaa ku dhiirrigaliyey dadaalkooda naf-hurka ah ee ay ugu adeegayaan qaranka Soomaaliyeed.

4- Ra’iisul Wasaare Xamsa Cabdi Barre, ayaa kulan looga hadlay ajandayaasha qaran ee hor-u-tabinta leh la yeeshay hoggaanka ururrada siyaasadda ee ka qeybgalay doorashadii goleyaasha deegaanka ee Gobolka Banaadir.

5- Mudanayaasha Labada Aqal ee Baarlamanka Federaalka Soomaaliya ayaa soo gabagabeeyey ka doodista qaar ka mid ah cutubyada Dastuurka KMG ah.

6- Wasiirka Warfaafinta, Dhaqanka iyo Dalxiiska Mudane Daa’uud Aweys Jaamac ayaa ka qeyb galay Madasha Iskaashiga Soomaaliya iyo Turkiga oo diiradda lagu saarey guulaha uu xiriirka labada dal ku tallaabsadey 15kii sanno ee la soo dhaafey.

7- Wasiir ku xigeenka Warfaafinta Soomaaliya oo shir jaraa’id ku qabtay Muqdisho ayaa sheegay in dowladda ka go’antahay sii waddida wadahadalada arrimaha masiiriga, isaga oo tilmaamay in Golaha Mustaqbalka ay Gogasha uga baxeen kadib markii ay la yimaadeen ajande ka baxsan shirka.

8- Wasiirka Awqaafta iyo Arrimaha Islaamka Sheekh Mukhtaar Roobow Cali ayaa furay Tartanka Sanadlaha Heerka Qaran ee Xifdinta Qur’aanka Kariimka, kaasi oo ay ku tartamayaan sanadkii 4-aad, arday ka kala socota Dowlad Goboleedyada dalka.

9- Wasiirka Hawlaha Guud Mudane Ayuub Ismaaciil ayaa kormeeray dhismaha waddooyinka ee ka socda magaaalada Dhuusamareeb ee caasimadda Galmudug

10- Wasaaradaha Cadaaladda iyo Ganacsiga ee Xukuumadda Federaalka Soomaaliya ayaa ka wadahdley ilaalinta nidaamka sharci iyo horumarinta habka garsooridda kiisaska la xiriira ganacsiga.

11- Wasaaradda Amniga ayaa war rasmi ah oo ay soo saartay ku fartay Madaxda Hay’adaha Dowladda in ay gawaaridooda ku xiraan taargooyinka si kor loogu qaado hubinta amniga.

12- Madaxweynaha Dowlad Goboleedka Galmudug, Mudane Axmed Cabdi Kaariye iyo Wasiirka Hawlaha Guud ee Soomaaliya Mudane Ayuub Ismaaciil ayaa dhagax dhigay dhismaha waddo laami ah oo 60-km oo laga hirgelinayo Galmudug.

13- Qaar ka mid ah xubnaha Golaha Wasiirada ayaa shir Jaraa’id oo wadajir ah ku qabtey magaalada Muqdisho, iyagoo ka digay lacagaha baadda sharci darrada ah ee Khawaarijta xilligan oo kale isku dayaan in ay ka qaadaan ganacsatada.

14- Hay’adda NISA oo shaacisay in hawlgaladii u dambeeyey ee ay ka fulisay gobolada dalka iyada oo la kaashanaysa saaxiibada caalamka in ay ku dishay in ka badan 23 xubnood oo ka tirsan Khawaarijta.

15- Wasiirka Warfaafinta, Dhaqanka iyo Dalxiiska, Mudane Daa’uud Aweys Jaamac ayaa magaalada Ankara kulan kula yeeshay Wasiirka Warbaahinta ee Turkiga, iyagoo ka wadahadley xoojinta xiriirka labada dal ee dhinaca warbaahinta.

16- Wasiirka Arrimaha Dibadda iyo Iskaashiga Caalamiga Mudane Cabdisalaam Cabdi Cali, ayaa booqday xarunta Hay’adda SoDMA, isagoo ku baaqey in la iska kaashado gurmadka loo fidinayo dadka ay abaaruhu waxyeeleeyeen ee dalka ku dhaqan.

17- Wasiirka Arrimaha Dibadda iyo Iskaashiga Caalamiga Mudane Cabdisalaam Cabdi Cali, ayaa afur ugu sameeyay magaalada Muqdisho diblomaasiyiinta iyo wakillada ururrada caalamiga ah ee ku sugan magaalada Muqdisho.

18- Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macalin Cabdulle, iyo George Conway, Ku-Xigeenka Wakiilka Qaramada Midoobay ee Soomaaliya ee Arrimaha Bani’aadannimada, ayaa qabtay shir jaraa’id oo lagu shaaciyay in xaaladda abaarta dalka ay gaartay heer aad u halis ah, isla markaana ay sii xumaaneyso maalinba maalinta ka dambeysa.

19- Agaasimaha Wakaaladda Wararka Soomaaliyeed ee SONNA Ismaaciil Muqtaar Cumar ayaa ka qeybgalay kulan weynaha Ururka Wakaaladaha Wararka ee dalalka ku bahoobay Ururka Iskaashiga Islaamka oo ka dhacay dalka Sacuudiga.

20- Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macalin Cabdulle, ayaa qaabilay Masuuliyiin ka socday Hay’adda Cuntada iyo Beeraha ee Qaramada Midoobay (FAO), iyagoo ka wadahadley xaaladda Abaaraha Soomaaliya iyo gurmadka loo baahan yahay xilligani.

21- Hay’adaha SoDMA, Oman Charity iyo Maamulka Gobolka Banaadir ayaa si wadajir ah deeq afurin ah ugu qeybiyay qoysas danyar ah oo ku nool degmooyinka gobolka Banaadir.

22- Xildhibaan Mahad Cabdalla Cawad ayaa bogaadiyey amniga iyo horumarrada ka socda caasimadda Muqdisho, isagoo soo dhoweeyey go’aannada Wasaaradda amniga iyo hay’adaha ammaanka ee lagu xoojinayo hubinta amniga.

Wasiiru Dowlaha Arrimaha Dibadda XFS Mudane Cali Maxamed Cumar ayaa Magaalada Jiddah uga kulan looga hadlaayay qodobbo dhowr ah oo ay kamid ahaayeen waxqabadka ururka Ururka Iskaashiga Islaamka iyo xaaladda dadka reer Falastiin.

Kulankaasi waxaa isugu yimid Wasiirada Arimaha Dibadda ee Ururka Iskaashiga Dalalka Islaamka OIC kaas oo wadahadal dheer iyo dodo waxgal ah ,kadib laga soo saaray qodobbo muhiim ah oo taageeraya qadiyadda Falastiin,isla markaana Israel ugu baaqaya in ay joojiso dagaalada Gaza iyo barakicinta dadka reer Falastiin.

Wasiiru Dowlaha Arrimaha Dibadda iyo Iskaashiga Caalamiga JFS Mudane Cali Maxamed Cumar oo ka hadlay kulankaasi ayaa warbaahinta qaranka u sheegay in uu halkaasi ku gudbiyay mowqifka Dowladda Soomaaliya ee ku aadan taageerada dadka Falastiin iyo in la helo dowlad ay leeyihiin Falastiin.

Wasiiru Dowlaha ayaa mudadii uu socday kulankaasi waxa uula kulmay R/Wasaare ku xigeenka Pakistan,ahna Wasiirka Arrimaha Dibadda,Wasiir ku xigeenka Arrimaha Dibadda ee Sacuudi Carabiya iyo mas’uuliyiin kale.

Kulankaasi waxaa wasiiru dowlaha kala qeybgalay xubnaha joogtada ee Soomaaliya ku matalaya Ururka Iskaashiga Islaamka.

INNAA LILLAAHI WA INNAA ILEYHI RAAJICUUN.

Wasiirka Wasaaradda Warfaafinta, Dhaqanka iyo Dalxiiska Soomaaliya Mudane Daa’uud Aweys Jaamac, Wasiir Ku-Xigeenka Wasaaradda Warfaafinta Mudane Cabdiraxmaan Yuusuf Cumar (Al-Cadaala), Agaasimaha Guud ee Wasaaradda Mudane Cabdullaahi Xayir Ducaale, Agaasimeyaasha Waaxyaha iyo dhammaan hawlwadeennada Wasaaradda Warfaafinta, Dhaqanka iyo Dalxiiska JFS, waxay tacsi tiiraanyo leh u dirayaan qoyskii, qaraabadii, asxaabtii iyo guud ahaan ummadda Soomaaliyeed ee uu ka baxay Allaha u naxariistee Saciid Maxamuud Axmed (Saciid Sonna).

Marxuumku waxa uu ahaa saxafi iyo masuul sare oo caan ka ahaa warbaahinta Soomaaliya. Waxa uu soo noqday Agaasimihii hore ee Wakaaladda Wararka Soomaaliyeed (SONNA), isaga oo door muuqda ka qaatay hoggaaminta, dib-u-habaynta iyo horumarinta wakaaladda. Saciid Sonna waxa uu kale oo uu ka mid ahaa shaqaalihii ugu horreeyay ee lagu aasaasay SONNA, taasoo muujinaysa kaalintiisa taariikhiga ah ee dhismaha warbaahinta qaranka.

Intii uu ku guda jiray mihnaddiisa saxafinimo waxa uu si weyn ugu caan baxay falanqaynta arrimaha amniga qaranka iyo mowqifyo adag oo uu ka qaatay la-dagaallanka kooxaha xagjirka ah. Waxa uu si joogto ah uga hadli jiray maslaxadda guud, midnimada iyo xasilloonida dalka, isaga oo raad muuqda ku reebay saxaafadda Soomaaliyeed.

Wasaaraddu waxay Alle uga baryaysaa inuu marxuumka ka waraabiyo Jannatul Fardowsa, dambigiisana dhaafo, samir iyo iimaan ka siiyo qoyskii, qaraabadii iyo dhammaan ehelkii uu ka tagay.

Waxaa si rasmi ah u furmay Tartanka Sanadlaha Heer Qaran ee Xifdinta Qur’aanka Kariimka, kaas oo ay ka qeybgalayaan arday ka kala yimid gobollada dalka. Tartankan oo ah mid sanad walba la qabto ayaa lagu dhiirrigeliyaa horumarinta barashada iyo xifdinta Qur’aanka Kariimka, isla markaana lagu abaalmariyaa ardayda ku guuleysta.

Mas’uuliyiinta ka hadlay furitaanka tartanka ayaa ku boorriyay ardayda inay muujiyaan dadaal, anshax iyo tartan hufan, iyagoo xusay in Qur’aanku yahay iftiinka iyo hanuunka ummadda. Waxay sidoo kale tilmaameen in tartankani door weyn ka qaato kobcinta jiilka ku barbaara barashada Kitaabka Alle.

Tartamayaasha ayaa lagu qiimeyn doonaa tayada xifdinta, saxnaanta akhriska iyo tajwiidka, iyadoo guddiga garsoorka ay ka kooban yihiin culimo iyo macallimiin khibrad u leh culuumta Qur’aanka.

Ugu dambeyn, waxaa la guddoonsiin doonaa abaalmarinno kala duwan ardayda ku guuleysta kaalmaha hore, si loo sii xoojiyo dhiirrigelinta iyo horumarinta barashada Qur’aanka Kariimka dalka oo dhan.

Guddoomiyaha Dalladda Culimada Dowlad Goboleedka Galmudug, Sheekh Muxudiin Yuusuf Barre, ayaa ugu baaqay ganacsatada Soomaaliyeed inay si gaar ah sanadkan u bixiyaan Sakadooda, isla markaana ay gaarsiiyaan dadka ay abaaruhu sida daran u saameeyeen.

Sheekhu wuxuu tilmaamay in abaaraha ka jira qeybo badan oo dalka ka mid ah ay sababeen biyo la’aan iyo cunno yari, taasoo saameysay qoysas badan oo danyar ah. Wuxuu adkeeyay in waajibka Sakadu uu yahay mid Alle faray, islamarkaana ay muhiim tahay in la gaarsiiyo dadka ugu baahida badan, gaar ahaan xilliyada adag.

Sidoo kale, Guddoomiyuhu wuxuu ku boorriyay ganacsatada iyo bulshada inteeda kale inay muujiyaan isku duubni iyo is-garab istaag, si loo yareeyo dhibaatada ka dhalatay abaarta. Wuxuu xusay in Sakadu aysan ahayn oo kaliya waajib diin ah, balse ay sidoo kale tahay gargaar bulsho oo lagu badbaadin karo nolosha dad badan.

Ugu dambeyn, Sheekh Muxudiin Yuusuf Barre ayaa ku baaqay in la dardargeliyo gurmadka loo fidinayo dadka ay abaaruhu saameeyeen, si rajo iyo nolol cusub loogu abuuro qoysaska tabaaleysan.

Ankara, 25 Febraayo 2026: Wasiirka Warfaafinta, Dhaqanka iyo Dalxiiska Xukuumadda Federaalka Soomaaliya, Mudane Daa’uud Aweys Jaamac, oo uu wehliyo Wasiirka Gaadiidka Badda iyo Dekedaha, Mudane Cabdulqaadir Maxamed Nuur, ayaa magaalada Ankara kulan kula yeeshay Wasiirka Warbaahinta iyo Xiriirka Dadweynaha ee Turkiga, Mudane Burhanettin Duran.

Kulanka ayaa diiradda lagu saaray xoojinta iskaashiga dhinacyada kala duwan ee u dhexeeya Soomaaliya iyo Turkiga, gaar ahaan doorka warbaahintu ka qaadan karto muujinta guulaha iyo horumarka iskaashiga labada dal oo heer wanaagsan maraya.

Labada dhinac ayaa isku afgartay in la abuuro wadashaqeyn istaraatiijiyadeed oo lagu wajahayo wararka been abuurka ah, isla markaana la iska kaashado horumarinta xirfadaha iyo aqoonta warbaahinta casriga ah.

Wadahadalkan ayaa qeyb ka ah shir caalami ah oo looga hadlayo xoojinta xiriirka iyo saaxiibtinimada Turkiga iyo dalalka Afrika, gaar ahaan iskaashiga sii kobcaya ee Soomaaliya iyo Turkiga.

Shirka ayaa waxaa ka qeybgalay diblomaasiyiin, aqoonyahanno iyo khubaro ka doodayay iskaashiga labada dal ee dhinacyada amniga, dhaqaalaha, arrimaha bulshada, sayniska iyo isdhexgalka bulshada.

Masuuliyiin ka tirsan Xukuumadda Federaalka Soomaaliya ayaa maanta shir jaraa’id ay qabteen uga hadlay tallaabooyinka lagu wiiqay dhaqaalihii baadda ahaa ee ay kooxda khawaarijtu ka qaadi jireen muwaadiniinta Soomaaliyeed.

Wasiir Cadaala oo ka hadlay shirka ayaa sheegay in kulanka uu diiradda saaray sidii loo curyaamin lahaa ilihii dhaqaale ee ay ku tiirsanaayeen khawaarijtu, isagoo xusay in guul weyn laga gaaray dadaalladaas. Wasiirku wuxuu tilmaamay in Dowladda Federaalka Soomaaliya ay xoojisay qorshayaasha lagu joojinayo baadda sharci darrada ah ee shacabka laga qaadi jiray.

Dhankiisa, Wasiir Farataag ayaa caddeeyay in lacagaha ay qaadaan khawaarijtu aysan ahayn sako, balse ay tahay baad ay ku dhibaateeyaan shacabka Soomaaliyeed. Wuxuu sheegay in arrintan si cad loo iftiimiyay, loona baahan yahay in bulshada laga wacyigeliyo.

Sidoo kale, Wasiir Ku-xigeenka Wasaaradda Awqaafta iyo Arrimaha Islaamka XFS, Cismaan Axmed, ayaa adkeeyay in baadda ay qaadaan khawaarijtu aysan wax shaqo ah ku lahayn sakada Islaamka, isla markaana aysan jirin wax sharci ah oo ay ku saleysan tahay.

Wasiir Xasan Macallin ayaa isna sheegay in argagixisadu ay shacabka ku disho maal ay si qasab ah uga qaaddo, taas oo muujinaysa halista dhaqaale iyo mid amni ee ay ku hayaan bulshada Soomaaliyeed.

Ugu dambeyn, Wasiir Jamaal ayaa ugu baaqay ganacsatada Soomaaliyeed in ay ka feejignaadaan bixinta lacagaha ay kooxdaasi ku sheegto canshuur, isagoo ku tilmaamay baad sharci darro ah oo lagu dhibaateynayo shacabka.

  WAR-SAXAAFADEED

Muqdisho, February 24, 2026: Ciidanka Hay’adda Sirdoonka iyo Nabadsugidda Qaranka (NISA) oo kaashanaya saaxiibada caalamka, ayaa afar howlgal oo qorsheysan oo toddobaadkan ay ka fuliyeen deegaanno ka kala tirsan Gobollada Hiiraan iyo Shabeellaha Dhexe, ku dilay in ka badan 23 dhagar-qabe oo ka tirsanaa Maleeshiyaadka Khawaarijta, kuwaas oo isu diyaarinayay in ay falal amni darro ka fuliyaan degmooyin ka tirsan Dowlad Goboleedka Hirshabeelle.

Howlgalladan, oo ahaa kuwo ka hortag ah, ayaa yimid kaddib markii NISA ay heshay xog sirdoon oo muujinaysay in kooxda Khawaarijtu ay maleeshiyaad ku abaabulayeen deegaannada Waab-weyn iyo Goobo, oo hoostaga Degmada Maxaas, islamarkaana uu hoggaaminayay horjooge lagu magacaabo Mustaf Caato, iyo maleeshiyo kale oo lagu uruurinayay deegaanka Maxaa Saciid ee Gobolka Shabeellaha Dhexe.

Weeraradan, oo kii ugu dambeeyay uu dhacay xalay gelinkii dambe, ayaa sidoo kale lagu burburiyay xero ku taallay degmada Moqokori ee Gobolka Hiiraan oo ay ku sugnaayeen maleeshiyaad u badnaa kuwa ay ugu yeeraan Xisbada, kuwaas oo qeyb ka ahaa fulinta weerarro ay Argagixisadu u maleegayeen deegaanno ka tirsan Gobolka Hiiraan.

Hay’adda Sirdoonka iyo Nabadsugidda Qaranka (NISA) waxa ay xoojisay howlgallada ka hortagga iyo ciribtirka Argagixisada si loo xaqiijiyo amniga iyo xasilloonida guud ee dalka.

Fadlan muwaadin, wixii khatar amni ah ama macluumaad la xiriira Al-Shabaab/Daacish la wadaag NISA: 199 / 0770747474 / 0620545454