Muqdisho, Khamiis, 12 Febraayo 2026: – Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa caawa ka qaybgalay Baalfurka Buugga “Baadigoobkii Nabadda Geeska Afrika”, kaasi oo iftiiminaya dadaalladii kala dambeeyay ee lagu dhisayey dowladnimada Soomaaliya xilliyadii burburkii iyo marxaladihii kala duwanaa ee ay soo martay.

Ra’iisul Wasaaraha, ayaa xusay in nabadda Soomaaliya ay saameyn ku leedahay guud ahaan gobolka Geeska Afrika, isaga oo tilmaamay in kala qeybinta Soomaaliya ay halis ku tahay amniga iyo xasilloonida Gobolka, loona baahanyahay in la adkeeyo midnimada iyo wadajirka Jamhuuriyadda Federaalka Soomaaliya.

Ra’iisul Wasaare Xamsa, ayaa tilmaamay in Buuggan oo ku qoran luuqadda Soomaaliga uu mudnaan u leyahay bulshooyinka gobolka isaga oo boorriyey ahmiyadda ay leedahay in Gobolka Geeska Afrika la gaarsiiyo Luuqadda Soomaaliga, ayna mudnaan gaar ah siiyaan si loo ilaaliyo Dhaqanka, Afka iyo Diinteenna

Ra’iisul Wasaare Xamsa Cabdi Barre, oo dhiirrigalinaya Akhriska tagtadii shalay iyo taariikhihii kala duwanaa ee lasoo maray ayaa sheegay in bulshadooyinka wax akhriya ay marwalba aragti fog kasii yeeshaan waxyaabaha kusoo socda, isaga oo u mahadceliyay Qoraaga Buugga Danjire Maxamed Cabdi Afey, oo dadaal ku bixiyey uruurinta iyo curintiisa muhiimka ah.

Muqdisho, Febaraayo 12, 2026; Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa qaabilay wafdi sare oo ka socday Boqortooyada Ingiriiska oo ay hoggaaminaysay Wasiiru-dowlaha Arrimaha Horumarinta iyo Afrika Marwo Jenny Chapman.

Madaxweynaha ayaa wafdiga la wadaagay guulaha muuqda ee Soomaaliya ay ka xaqiijisay dowlad-dhiska, ammaanka iyo geeddi-socodka dimuquraadiyadda, isagoo adkeeyey xiriirka istiraatiijiyadeed ee Jamhuuriyadda Federaalka Soomaaliya iyo Boqortooyada Ingiriiska, gaar ahaan dhinacyada amniga, horumarinta iyo kobcinta maalgashiga.

Sidoo kale, Madaxweynaha Jamhuuriyadda ayaa uga mahadceliyey Dowladda Ingiriiska taageerada joogtada ah ee ay la garab taagan tahay Soomaaliya, gaar ahaan dadaallada lagu xoojinayo nabadgelyada, la dagaallanka argagixisada iyo hirgelinta qorshayaasha horumarineed ee mudnaanta u leh shacabka Soomaaliyeed.

Dhankeeda, Wasiiru-dowlaha Arrimaha Horumarinta iyo Afrika ee Boqortooyada Ingiriiska Marwo Jenny Chapman ayaa adkeeysay sida Dowladda Ingiriisku ay uga go’an tahay xoojinta iskaashiga dhow ee kala dhexeeya Soomaaliya, isagoo xusay muhiimadda xasilloonida Soomaaliya ay u leedahay gobolka Geeska Afrika iyo guud ahaan qaaradda.

Mudane Cabdisalaam Cali, Wasiirka Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, ayaa maanta xarunta Midowga Afrika ee Addis Ababa kaga qaybgalay shirka heer wasiir ee Golaha Nabadda iyo Amniga Midowga Afrika (AU PSC), kaas oo diiradda lagu saaray hawlgalka AUSSOM iyo xaaladda dalka Suudaan.

Wasiirku waxa uu uga mahadceliyey hoggaanka Midowga Afrika iyo dalalka ciidamada ku deeqay taageerada ay siiyaan hawlgalka AUSSOM, isaga oo xusay muhiimadda ay leedahay sii wadista xoojinta amniga iyo xasilloonida Soomaaliya.

Sidoo kale, wuxuu carrabka ku adkeeyey muhiimadda doorashooyinka qof iyo cod ee ka qabsoomay Muqdisho, isaga oo ku tilmaamay tallaabo taariikhi ah oo muujinaysa horumarka dalka.

Wasiirka ayaa sidoo kale muujiyey qaddarin ku aaddan doorashada Soomaaliya loogu doortay xubinnimada Golaha Nabadda iyo Amniga Midowga Afrika, isaga oo tilmaamay inay tani ka tarjumayso kalsoonida ay qaaraddu ku qabto Soomaaliya.

Wasiirka Cadaaladda iyo Arrimaha Dastuurka ee Xukuumadda Jamhuuriyadda Federaalka Soomaaliya (JFS), Mudane Xasan Macallin Maxamuud, oo booqasho rasmi ah ku jooga dalka Aljeeriya, ayaa booqday xarunta Dugsiga Sare ee Garsoorka ee dalkaas (École Supérieure de la Magistrature).

Booqashadan ayaa qayb ka ah dadaallada lagu xoojinayo iskaashiga dhinaca garsoorka iyo is-weydaarsiga khibradaha u dhexeeya labada dal, gaar ahaan tababarka garsoorayaasha, horumarinta manhajyada waxbarasho, iyo dib-u-habeynta nidaamka caddaaladda.

Wasiirka ayaa warbixin dhammaystiran ka dhageystay mas’uuliyiinta dugsiga, isagoo bogaadiyay doorka ay ka qaataan tayeynta awoodda hay’adaha garsoorka. Sidoo kale, wuxuu carrabka ku adkeeyay muhiimadda xoojinta wada-shaqeynta istiraatiijiga ah ee labada wasaaradood si loo dhiso nidaam caddaaladeed oo ku dhisan mabaadi’da dowladnimada iyo ku dhaqanka sarreynta sharciga.

WAR-SAXAAFADEED

Wasaaradda Gaashaandhigga ee Xukuumadda Federaalka Soomaaliya waxay shacabka Soomaaliyeed la socodsiinaysaa in, kaddib baaritaanno iyo tallaabooyin anshaxeed oo waafaqsan xeerarka iyo nidaamka Ciidanka Xoogga Dalka Soomaaliyeed, ay jiraan tiro askar ah oo laga saaray ciidanka sababo la xiriira anshax-xumo, isticmaalka maandooriyaha, hawl-gudasho la’aan, iyo falal kale oo ka hor imanaya sharciga iyo hab-dhaqanka ciidan.

Wasaaraddu waxay caddaynaysaa in Ciidanka Xoogga Dalka Soomaaliyeed ay xuquuqdooda u helaan si joogto ah, uuna yahay hay’ad qaran oo huwan sharaf, anshax, iyo u adeegidda shacabka, isla markaana aan marnaba la aqbali karin wax kasta oo dhaawacaya sumcadda ciidanka iyo kalsoonida shacabka.

Tallaabooyinkan waxay qayb ka yihiin dadaallada lagu xoojinayo:

– Nidaamka anshaxa iyo isla-xisaabtanka.

– Ka-hortagga isticmaalka maandooriyaha iyo fal-dambiyeedka gudaha ciidamada.

– Tayeynta iyo kor u qaadista xirfadda iyo kartida ciidanka.

– Ilaalinta bedqabka iyo badbaadada shacabka Soomaaliyeed.

Wasaaradda Gaashaandhigga iyo Taliska Ciidanka Xoogga Dalka Soomaaliyeed waxay mar kale adkaynayaan in cid kasta oo ku kacda falal wax u dhimaya anshaxa ciidanka, nabadgalyada, ama sharciga ay wajihi doonto ciqaab waafaqsan xeerarka dalka iyo kuwa ciidamada.

Nairobi, Febraayo 12, 2026 — Waxaa maanta si rasmi ah magaalada Nairobi loogu soo gabagabeeyay Shirkii 5aad ee Madasha Dowladda Federaalka Soomaaliya iyo Dowlad Goboleedyada ee mashruuca SERP (Somalia Enhancing Public Resource Management Project), kaas oo socday muddo saddex maalmood ah.

Shirka ayaa diiradda lagu saaray dib-u-habaynta maareynta adeegyada dadweynaha (Public Sector Management Reform), horumarinta iyo mideynta nidaamka HRMIS (Human Resource Management Information System) ee heer federaal iyo heer dowlad goboleed, dardargelinta hirgelinta howlaha socda, iyo dejinta qorsheyaal hawleedyo mudnaan gaar ah leh.

Intii uu shirka socday, ka-qaybgalayaasha ayaa is-weydaarsaday warbixino la xiriira heerka uu marayo mashruuca, caqabadaha jira, iyo fursadaha lagu xoojin karo wada-shaqeynta u dhexeysa Dowladda Federaalka iyo Dowlad Goboleedyada, si loo helo nidaam maamul oo hufan, isla xisaabtan leh, una adeega danaha shacabka.

Ra’iisul Wasaare Ku-xigeenka Xukuumadda Federaalka Soomaaliya ayaa si rasmi ah u soo xiray shirkii Akadeemiyad Goboleedka Afka Soomaaliga (AGA), kaas oo maalmahan ka socday magaalada, ayna ka qeyb galeen aqoonyahanno, xeeldheereyaal afka ah, iyo mas’uuliyiin kala duwan.

Shirkan ayaa diiradda lagu saaray horumarinta, ilaalinta iyo kobcinta Afka Soomaaliga, iyadoo si gaar ah loo falanqeeyay tayeynta higgaadda, kobcinta cilmi-baarista, iyo sidii Af-Soomaaliga loogu waafajin lahaa horumarka tiknoolajiyadda iyo waxbarashada casriga ah. Intii uu socday shirka, waxaa la soo bandhigay daraasado iyo talooyin la xiriira caqabadaha jira iyo fursadaha lagu horumarin karo adeegsiga afka hooyo.

Ra’iisul Wasaare Ku-xigeenka oo khudbad ka jeediyay munaasabadda xiritaanka ayaa ku ammaanay doorka Akadeemiyadda ee ku aaddan ilaalinta hidaha iyo afka, isaga oo carrabka ku adkeeyay in dowladdu ay ka go’an tahay taageeridda dadaallada lagu horumarinayo Afka Soomaaliga. Wuxuu sidoo kale ku boorriyay hay’adaha waxbarashada iyo bulshada inteeda kale inay xoojiyaan isticmaalka afka hooyo.

Gabagabadii, shirka ayaa lagu soo gabagabeeyay warmurtiyeed ka kooban qodobbo muhiim ah oo la xiriira qorshayaasha mustaqbalka ee horumarinta Afka Soomaaliga iyo xoojinta wada-shaqeynta hay’adaha ku howlan arrimaha afka.

Muqdisho, Feberaayo 11, 2026; Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa hambalyo iyo bogaadin u diray shacabka Soomaaliyeed iyo guud ahaan hay’adaha Qaranka, taas oo ku aaddan guusha taariikhiga ah ee dalkeennu uu ku hanatay kursiga Golaha Nabadda iyo Amniga Midowga Afrika, muddada 2026–2028.

Madaxweynaha ayaa tilmaamay in guushan ay astaan u tahay horumarka diblomaasiyadda Soomaaliya iyo dib u soo kabashada doorka hoggaamineed ee dalkeennu uu ku leeyahay heer qaaradeed iyo heer caalam iyo shaqada wanaagsan ee ay qabatay Wasaaradda Arrimaha Dibadda iyo Iskaashiga Caalamiga ah ee dalkeenna.

“Kalsoonida iyo taageerada ay Soomaaliya ka heshay dalalka xubnaha ka ah Midowga Afrika waxay caddeyn u tahay isbeddelka togan ee dalka ka socda iyo xiriirka iskaashi ee sii xoogeysanaya. Horey waxaan xubin uga noqonay Golaha Ammaanka Qaramada Midoobey, maanta waxaynu fadhinnaa Golaha Amniga iyo Nabadda Afrika”.

Madaxweyne Xasan Sheekh Maxamuud ayaa si gaar ah ugu mahadceliyay dhammaan dalalkii taageeray una codeeyay Soomaaliya, isagoo xusay in guushan ay ka tarjumeyso wadajir, saaxiibtinimo iyo aragti mideysan oo ku aaddan Afrika nabad ah, xasilloon, isla markaana horumar leh.

Muqdisho, Arbaco, 11 Febraayo 2026: – Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa maanta xafiiskiisa ku qaabilay Safiirka Dowladda Ciraaq u qaabilsan Soomaaliya Mudane Dr. Qahtan Taha Khalaf Al-Janabi, wax ayna ka wada hadleen xoojinta xiriirka taariikhiga ah iyo iskaashiga laba geesoodka ah ee ka dhexeeya labada dal ee walaalaha ah.

Kulanka ayaa diiradda lagu saaray horumarinta iskaashiga dhinacyada siyaasadda, amniga, dib-u-dhiska, iyo gargaarka bani’aadannimada iyada oo la adkeeyey muhiimadda ay leedahay in la ballaariyo fursadaha wada shaqeyneed si ay uga faa’iideystaan labada shacab.

Ra’iisul Wasaaraha ayaa bogaadiyey doorka Dowladda Ciraaq ee ku aaddan taageerada midnimada iyo madaxa-bannaanida dhuleed ee Jamhuuriyadda Soomaaliya, isaga oo xusay in Soomaaliya ay mudnaan gaar ah siinayso xoojinta xiriirrada diblomaasiyadeed iyo iskaashiga dalalka Carabta.

Dhankiisa, Danjire Dr. Qahtan, ayaa caddeeyey sida ay dowladdiisu uga go’an tahay garab istaagga Soomaaliya, isla markaana ay sii kordhin doonto taageerada dhinacyada horumarinta iyo maalgashiga.