Muqdisho(SONNA) Kadib kulan ay ku yeesheen magaalada Newyorka ee xarunta QM ayaa laga soo saaray Qaraarkan  looga jawaabayay tijaabadii lixaad uguna awoodda badneyd ee hubka nukliyeerka, hasayeeshee cunaqabateynta lagu soo rogay Pyongyang kuma ay jirto xayiraad dhanka shidaalka ah, taas oo markii hore uu soo jeediyay Mareykanku.

Go’aanadan cusub waxaa kamid ah xannibaad lagu soo rogay dhoofinta waxyaabaha dharka laga sameeyo iyo xakameyn lagu sameeyo saliidda qayriinka ah ee ay soo dhoofsato Pyongyang.

Qaraarkan dib u eegista lagu sameeyay ayaa yimid kaddib markii ay wadahadallo yeesheen dalalka ka tirsan golaha ammaanka ee leh awoodda codka qayaxan sida Mareykanka, Ruushka, Shiinaha, Britain iyo Faransiiska.

Danjiraha  Mareykanka u fadhiya Qaramada Midoobay, Nikki Hayley, ayaa aheyd qofkii ugu horreeyay ee hadlay markii cunaqabateynta codka loo qaaday, waxaanay sheegtay in Mareykanku uu sameyn doono waxkasta oo uu Kuuriyada Waqooyi kaga joojin karo inay wax khaldan sameyso.

Qaraarkan ayaa sidoo kale lahadal hayaa in uu fursad siinayaa in xayiraad dhanka socdaalka lagu soo rogo Kuuriyada Waqooyi, iyadoo liiska xayiraadda lagu daraayo hogaamiyaha dalkaasi Kim Jong Un iyo shirkadda diyaaradaha ee qaranka Kuuriyada Waqooyi.

Geesta kale war  ka soo baxay Wasaaradda arrimaha dibadda ee Kuuroyada Waqooyi ka hor inta uusan Golaha Ammaanku codka u qaadin cunaqabateynta ayaa waxaa lagu sheegay in Mareykanku uu “qiimaha u dhigma” ka heli doono cunaqabateyntan uu dabada ka riixayo.

Muqdisho(SONNA) Wararka ka imaanaya gobolka Hiiraan ayaa sheegaya in xoriyadoda ay dib u heleen gadho u afduubnaa in mudo ah kooxaha argagisada Shabaab gelinkii dambe ee Axaddii, kuwaasi oo howlo samafal ka waday Gobolka Hiiraan.

Sida uu Wakaaladad Wararka Qaranka Soomaaliyeed ee SONNA u sheegay  Aabaha dhalay mid kamid ah Gabdhahaasi oo ka gaabsaday magaciisa, Maleeshiyaadka kooxda Alshabaab ayaa siidaayay labo kamid ah sedax Gabdhood oo u shaqaynayay Hay’adda Hello-Trast oo ka shaqeysa arimaha samafalkakadib markii ay ka qaataan waalidiintooda lacago baad ah oo gaaray min 13,000 kun oo Dollar,waxaana la haystay  muddo labo bilood.

“Muddo kadib ayay Shabaab u afduubnaayeen gabdhahan oo sedex ahaa,alaxadulillah maanat ayaa la soo daayay,waxaa nalaga qaatay lacag dhan min 13,000 kun oo Dollar,waxay ka shaqeynayeen awal howlo samafal oo ay Gobolka kawadaan,waxaana laga afduubtay Deegaanka Farlibaax”, Ayuu yiri Aabaha dhalay gabar kamid ah labadaasi Gabdhood.

Gabdhahan oo ahaa 3 qof ayaa laga afduubtay Deegaanka lagu magacaabo Farlibaax oo katirsan Gobolkaasi Hiiraan, halkaasi oo ay ka wadeen howlo loogu gargaarayo dadka dhibaataysan waxaan weli maqan hal gabar taasi oo aan la ogayn waxa ay ka yeelidoonaan maleeshiyaadkaasi Shabaab.

Waalidiinta Gabdhahaasi oo ahaa dhalinyaro ayaa in muddo ah ka walaacsanaa,afduubka loo haystay gabdhahaan oo lagu hayay Deegaanka Buq-Aqable oo katirsan gobolka Hiiraan,waxaana loo diiday in ay arkaan kadib markii halkaasi ay tageen.

16kii bishii July ee tagtay ayay ahayd markii maleeshiyada Alshabaab ay lacago baad ah ay ku siidaayeen ilaa 7 shaqaale samafal oo u shaqeynayay Hay’adda lagu magacabo Gareedo oo ka howlgasha Gobolka Bay 4 kamid ahna ahaa haween,kuwaasi oo ay ka qafaasheen duleedka magaaladaasi.

Muqdisho(SONNA) Inta la xaqiijiyay qof shacab ah iyo dhagar qabihii gaariga waday ayaa ku geeriyootay 9 qof kalena waa ay ku dhaawacmeen  kadib markii gaari nuuca raaxada ah oo uu watay dhagar qabe ku xirnaa waxyaabaha qarxa uu isku qarxiyay wadada Maka Almukaramah,gaar ahan meel u dhow Hotel Wehliye ee magaalada Muqdisho.

Afhayeenka Ciidanka Booliska Soomaaliyeed Qaasim Axmed Rooble oo warbaahinta kula hadlay goobta falkaasi uu ka dhacay ayaa faah faahin ka bixiyay khasaaraha ka dhashey qaraxaasi.

“Qarax ay soo maleegeen kooxihii dhagar qabayaasha ayaa halkani ka dhacay,waxaana ku dhintay 1 qof oo shacab ah iyo dhagar qabihi gaariga qarxay waday,runtii lama yaqaano halka uu u socday, balse ma uu san gaarin hadafkiisa uu damacsanaa”, Ayuu yiri Qaasim Axmed Rooble.

Xiliga qaraxa uu dhacayay oo ahayd abaaro 5:00 Galabnimo oo 30 daqiiqo dhiman,ayaa waxaa goobtaasi ku sugnaa dad badan oo shacab ah,gaariga nuuciisu waxaa lagu sheegey in uu yahay nuuca raaxadda ah in kastoo uu basbeeley ayna adagtahay in sirasmi ah loo ogaado.

Dadka dhaawacyada ka soo gaarey qaraxaasi ayaa durba loola cararay isbitaalada magaalada Muqdisho, goobta qaraxaasi uu ka dhacay ayaa kamid ah meelaha ugu mashquulka badan ee magaalada Muqdisho.

Tani ayaa qeyb ka ah dhibaatooyinka ay maleeshiyada Shabaab ku hayaan bulshada Soomaaliyeed,iyo beegsiga dadka waxgalka u ah bulshada.

Muqdisho(SONNA) Daqiiqado ka hor ayaa Qarax waxaa uu ka dhacay Wadada maka Al-Mukarama, kaasi oo ka dhashey gaari laga soo buuxiyay waxyaabaha qarxa.

Goobjoogayaal ayaa SONNA u sheegay in uu jiro qasaare, balse aan la xaqiijin Karin inta uu la egyahay, gaadiidka gurmadka deg degga ayaa goobtaasi gaarey kuwaasi oo daabulayay dadka waxyeelada soo gaartey.

Waxaa goobtaasi gaarey mas’uuliyiin iyo saraakiil iyadoo ciidamada amaanka ay wadaan howlgalo amnga lagu sugayo.

Dadka waxyeelada soo gaartay ayaa ah dad shacab ah oo gaarkooda wadada marayay, halka qaarna ay ku sugnaayeen qar kamid ah maqayadaha lagu qaxweeyo ee kuyaala ag agaarka wadada Dabka.

Wixii ku soo kordha kala soco SONNA.SO

Waxaa maanta Magaalada Muqdisho ka dhacay Munaasabad uu xilka kula wareegayay Agaasimaha Guud ee Wasaaradda Waxbarashada hidaha iyo tacliinta sare Mudane Xasan Maxamed Cali.

Wasiir ku xigeenka Wasaaradda Waxbarashada Faysal Cumar,  Wasiiru Dowlaha Wasaaradda iyo Marti sharaf kale ayaa ka soo qeyb galay Munaasanada.

Xasan maxamed Cali Agaasimaha guud ee wasaaradda Waxbarashada hidaha iyo tacliinta sare  ayaa xilka waxuu kala Wareegay Maxamed Cabduqaadir Nuur oo ahaa Agaasimaha Waxbarshada Aas aasiga iyo Ismaaciil Yuusuf Cusmaan oo ahaa Agaasimaha hidaha iyo taclinta Sare.

Wasiir ku xigeenka Wasaaradda Waxbarshadda hidaha iyo taclinta sare Faysal Cumar oo halkaasi ka hadlay ayaa sheegay in looga fadhiyo Agaasimaha cusub in uu sii ambaqaado horu socodka shaqada wasaaradda.

Agaasimaha Wasaaradda Xasan maxamed Cali oo la kulmay shaqaalaha ayaa wuxuu balanqaaday in uu u shaqeyn doono si cadaalad ah, islmarkaana wuxuu shaqaalaha ka codsaday in ay la shaqeeyaan.

Muqdisho (SONNA) Ururka Gabdhaha Aqoonyahanada Soomaaliyeed ee Ugaaso oo ay ku mideysan yihiin gabdhaha wax ka bartay Jaamacadaha kala duwan ee dalka ayaa deeqdan raashinka ah gaarsiiyey gabdhaha kujira Xarunta Xanaanada Gabdhaha Agoonta Soomaaliyeed ee degmada Boondheere.

Xamdi Maxamed Cali Guddoomiyaha Ururka Ugaaso ayaa sheegtay in deeqdan ay ugu talo galeen gabdhaha Agoonta ah oo xiligan u baahan garab istaag iyo in lala socdo noloshooda.

Maamulaha Xarunta Xanaanada Gabdhaha Agoonta Soomaaliyeed Nuurto Maxamed Cadow ayaa muujisay in deeqdan raashinka ah ay ka turjumeyso doorka gabdhaha Aqoonyahanada ah ay ku leeyihiin u sama falka dadka mudan in la caawiyo oo agoontu ay ugu horeeyaan.

Ururka Gabdhaha Aqoonyahanada Soomaaliyeed ee Ugaaso ayaa ka shaqeeya sare u qaadista iyo horumarinta gabdhaha, caawinta dadka danta yar iyo sameynta Barnaamijka ka qeyb qaadanaya horumarinta Waxbarashada.

Ra’isul wasaaraha xukuumadda federaalka Soomaaliya ayaa kafaala qaaday in 100 arday oo ka baxay dugsiyada sare ee magaaladda Baydhabo uu ka bixin doono waxbarasho Jaamacadeed.

Xildhibaan Idiris Cabdi Dhakhtar oo ka tirsan golaha shacabka JFS oo shir jaraa’id  ku qabtay magaaladda Muqdisho ayaa sheegay in ra’iisul wasaaraha uu balan qaaday inuu bixin doono kharashka ku baxaya waxbarashada Jaamacadeed ee ilaa 100 arday oo dhameystay waxbarashada dugsiyada sare ee magaaladda Baydhabo.

Sidoo kale, xildhibaanka waxa uu sheegay in booqasho uu ku tagay deegaano ka tirsan gobolka Baay uu ku soo arkay xaalado bani’aadanimo oo ka jira deegaano ka tirsan gobolkaasi.

Xildhibaan Idiris, ayaa tilmaamay in biyo la’aan daran ay ka jirto degmada Buurhakaba ee goboka Baay isla markaana kala hadleen xukuumadda Soomaaliya, isagoona xusey in dowladda u balan qaatay in ay biyo dhaamin loo sameyn doono dadka ku dhaqan deegaanada biyo la’aanta daran ka jirto.

Muqdisho(SONNA) Mudanayaasha  aqalka  sare ee Baarlamaanka Soomaaliya ayaa oo maanta kulan ku yeeshey magaalada Muqdisho ayaa waxaay go’aamiyeen in dib loo dhigo Ajandihii ku saabsanaa arrinta Qalbi Dhagax.

Fadhiga oo uu shir Guddoominayay Mudane Cabdi Xaashi C/llaahi ayaa waxaa qaar kamid ah xildhibaanadu ay horgeeyeen dalab ah in dib loo dhigo arrintaasi,iyadoo guddoonka uu cod geliyay.

Waxaa ogolaatay in dib loo dhigo Ajandahaasi, 21 mudane, 11 kale waa ay diideen, halka 4 kale ay ka aamuseen.

Guddomiyaha Aqalka sare mudane Cabdi Xaashi C/llaahi oo coddeynta ka dib hadlay ayaa sheegay in dib loo dhigay, maadaama xildhibaanadu ay codkoodii uu u batay dib u dhigista.

Muqdisho (SONNA)- Madaxda Ururka Iskaashiga Islaamka ayaa soo saaray baaqyo looga codsanayo Madaxda dalka Myanmar inay joojiyaan xadgudubyada ka dhanka ah muslimiinta dalkaasi ee Rohinga ,oo sababtay inay kumaanaan kun qof ay ka barakacaan degaanadooda ,una gudbaan dhanka xadka ay Burma la wadaagto dalka Baangaladesh.

Baaqaan ayaa sidoo kale Madaxda iyo Xukuumadaha Islaamka iyo Carabta ay ku tilmaameen xadgudbyada Ciidamada dalka Burma ay ku hayaan muslimiinta Rohinga in ay yihiin kuwo halis ah isla markaana ka hor imaanaya Qaanuunka Dowliga, loona baahan yahay in si deg deg ah wax looga qabto.

Sidoo kale baaqan ka soo baxay Madaxda Ururka Iskaashiga islaamka waxaa lagu soo dhaweeyay dadaalka Madaxweynaha dalka Turkiga Recep Tayyip Erdoğan ee ku wajahan Xukuumadda Mayanmar inay joojiso tallaabo kasta ee ka dhan ah Muslimiinta laga tirada badan yahay ee dalkaasi.

Ururka Iskaashiga Islaamka,waxa ay ku baaqeen in loo dhega nuglaado baaqayda Caalamiga ah ee Golaha amaanka iyo kan Mujtama Dowliga ah.

Muqdisho (SONNA) Aragagaxisada Al shabaab ayaa laga saaray Degmada Baladxaawo ee Gobolka Gedo oo saaka ay kula dagaalameen Ciidamada Daraawiishta Jubbaland sida Wakaalada Wararka SONNA ay u xaqiijiyeen dadka deegaanka.

Maleeshiyada Aragagaxisada Al shabaab ayaa saaka gudaha u galay Baladxaawo, waxaana Madaafiic ay ku rideen goobo ay ku sugan yihiiin dad rayid ah oo waxyeelo ay ka soo gaartay, iyagoo Sidoo kale guryahooda ku dhex dilay Labo wiil oo dhalinyaro ah.

Jawiga Magaalada Baladxaawo ayaa hada degan, wixii warar ah ee soo kordha goordhow ayaan idin soo gudbin doonaa.