Dowlada Federaalka Soomaaliya ayaa fasaxday howlgal qorsheysan oo ciidanka Soomaalida ay la qaadeen ciidamada aan saaxiibada nahay agagaarka Tooro-Toorow oo la rumeysanyahay in lagu dilay mid ka mid ah horjoogayaasha Maleeshiyada Al-Shabaab oo lagu magacaabo Cali Mohamed Xuseen (Cali Jabal).

Cali Jabal ayaa ka mid ahaa horjoogayaasha argagaxisada Al-Shabaab oo mus’uulka ka ahaa qorsheynta dilalka iyo qaraxyada oo dad badan oo aan waxba galabsan ay ku geeriyoodeen Muqdisho.

Dowlada Federaalka Soomaaliya waxaa ka go’an badbaadada shacabka Soomaaliyeed oo Guusha Howlgalkan qorsheysan waa mid yareynaya awooda ay argagaxisada Al-Shabaab ku dili lahaayeen dad aan waxba galabsan ee Soomaaliya, wadamada deriska ah ee Bariga Afrika iyo Caalmka guud ahaan.

DHAMAAD

Muqdisho, 31 Luulyo 2017: Madaxwayanaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa kulan kula qaatay Xarunta Madaxtooyada saraakiisha ciidamada qalabka sida ee dalka.

Kulankan waxaa looga hadlay qorshayaasha guud ee la xiriira tayeynta iyo tababarradda ciidamada, dagaalka lagula jiro argagixisada, xoojinta wada shaqaynta ciidamada iyo hanashada ammaanka guud ee dalka kahor inta uusan soo idlaan howlgalka ciidamada Midowga Africa ee Soomaaliya (AMISOM).

Madaxwaynaha ayaa ku amray saraakiisha ciidamada in ay soo dhisaan guddi ka shaqeeya diyaarinta qorshe midaysan oo ku aaddan xoojinta wada shaqaynta laamaha kala duwan ee ciidamada.

Madaxwayne Farmaajo ayaa u xaqiijiyey sarakiisha ciidamada in ay dowladdu qaadayso tallaabo kasta oo lagu xaqiijinayo tayeynta iyo xoojinta ciidamada.
taliye kuxigeen ciidanka Booliska Soomaaliyeed Sareeya Guuto Bashiir Cabdi Maxamed oo Saxaafadda la hadlay ayaa sheegay in ay dhiseen guddi ka kooban 8 xubnood oo ka kala tirsan saraakiisha ciidamada xoogga dalka, Booliska, Nabad sugidda, iyo Asluubta.

Guddigaan la magacaabay ayaa Madaxwaynaha muddo kooban kadib usoo gudbindoona qorshe midaysan oo ay leeyihiin ciidamada qalabka sida ee Dalka.

DHAMMAAD

Xukunka dilka ah ee maxakamadda ciidamada Qalabka sida ay ku ridday Axmed C/laahi Ceydiid oo ahaa gacan ku dhiig lihii ka dambeeyey dilkii wasiirkii Howlaha Guud ee Dowladda Soomaaliya Marxuum Cabaasi C/llahi Sheekh Siraaji ayaa ka dambeeyey markii uu racfaan ka qaatay xukun dil ah oo ay horey ugu ridday maxakamadda darajada Koowaad ee ciidamada Qalabka sida.

Guddoomiyaha maxakamadda sare ee ciidamada Qalabka sida Sareeyo guuto   Liibaan Cali yarow ayaa ku dhawaaqay xukunka.

Agaasimaha Guud ee Wasaaradda Arrimaha Dastuurka Mudane Maxamed Abuukar Zubeeyr ayaa la kulmay Madaxa Soomaaliya u qaablisan Machadka Doorashooyinka iyo Hanaqaadka Dimuqraadiyadda ee Africa Justin Doua iyo Lataliye sare ee ka socotay Hay’adda Saferworld Marjorie. Kulanka waxaa Agaasimaha Guud ku wehliyay Lataliye sare Faaduma Cabdullaahi iyo Agaasimaha Qorsheeynta iyo Horumarinta Maxamed Bashiir oo labadaba katirsan Wasaaradda Arrimaha Dastuurka.

Kulanka labada dhinac waxa uu gogol-xaar u ahaa shir horaanta bisha Agoosto ka dhici doona Muqdisho oo lagu diyaarin doono Istiraatijiyooyinka Waxbarashada Madaniga, Latashiyada Dadweynaha, iyo Isticmaalka Warbaahinada kala duwan ee Geedi-socodka dib-u-eegista Dastuurka.

Shirka dhici doona horaanta Agoosto oo ay iska kaashanayaan Wasaaradda, Macahadka EISA, iyo Hay’adda Saferworld ayaa ah mid ay ka soo qaybgeli doonaan aqoonyahano ka kala socda Dawlad Goboleedyada, Bulshada Rayidka, iyo Quburo ku xeel-dheer Arrimaha Waxbarashada Madaniga, Latashiyada Dadweynaha, iyo Isticmaalka Warbaahinada kala duwan.

Ugu dambayn, labada dhinac ayaa isla meel dhigay sidii shirkaa uu u noqon lahaa mid ku soo dhamaada guul ayna ka soo baxaan Istiratiijiyooyin wax ku ool ah oo door wayn ka qaata Geedi-socodka dib-u-eegista Dastuurka

Wafdi uu hogaaminayo Wasiirka Amniga Gudaha Xukuummadda Federaalka Soomaaliya Maxamed Abuukar Islow Ducaale ayaa goordhow gaaray magaalada Jowhar ee xarunta Maamulka Hirshabeelle.

Wasiirka ayaa ka qeyb galaya shir lagu heshiisiinayo labo beelood oo ku dagaalamay deegaan hoostaga Degmada Cadale ee Gobolka Shabeelaha dhexe.

Madaxweyne ku xigeenka maamulka Hirshabeelle Cali Cabdullaahi Xuseen Guudlaawe ayaa maalin ka hor u qabtay shir hordhac odayaasha ka soo jeeda deegaanka lagu dagaalamay, waxaana la isku afgartay in xalka laga gaaro dagaal beeleedkaasi.

Sargaal ka tirsan Maleeshiyada Al-shabaab ayaa waxaa lagu dilay deegaanka kuunyo barow ee Gobolka shabeellada hoose waxaana jira Maxaabiis laga sii daayay deegaankaasi.

Gudoomiyaha Degmada Baraawe ee Xaruunta Maamulka Koonfur galbeed Soomaaliya Aadan madoobe oo la hadlay Radio Muqdisho Codka Jahmuuriyadda Soomaaliya ayaa sheegay in duqeyn Diyaarado dagaal ka fuliyeen Gobolka Shabeellada hoose gaar ahaan deegaanka Kunyo Barrow lagu dilay Sargaal sare oo Magaciisa lagu soo gaabshay dheere oo ka mid ahaa Hor-joogayaasha kooxdaas ee Buuraleyda Gal-gala.

Muddooyinkii la soo dhaafay ayaa waxaa deegaanno ka tirsan Koofurta iyo bartamaha Soomaaliya duqaymo ay iska kaashanayeen Ciidamada Kumaandooska Soomaaliya iyo kuwa Maraykanka lagu dilay horjoogayaal ka tirsan kooxda argagixisada ah ee A-lshabaab.

Xigasho SONNA

Munaasabadda xiritaanka tartan cilmiyeedka  bisha Ramadaan ee warbaahinta Qaranka waxaa ka qeybgalay ra’iisul Wasaare ku xigeenka X.F.S Mahdi Max’ed Guuleed, Wasiirka Warfaafinta En. C/raxmaan Cumar Cismaan Yariisow, Wasiirka Dhalinyarada iyo Ciyaarah, Marwo Khadiijo Max’ed Diiriye, Guddoomiyaha Gobolka Banaadir Taabid Cabdi Max’ed Agaasimaha Guud ee wasaraadda iyo Agaasimayaasha waaxyaha.

Agaasimaha Radio Muqdisho C/fataax Daahir Jeyte oo ku hadlayay magaca agaasimayaasha waaxyaha ee Wasaaradda ayaa uga mahadceliyay dhamaan ka qeybgalayaasha iyo guddiga qaban qaabada Tartan Cilmiyeedka bisha Ramadaan ee Warbaahinta Qaranka isagoo rajo wanaagsan ka muujiyay horumar kan ka ballaaran in la gaaro sanadkan sanadkiisa.

Agaasimaha Guud ee wasaaradda warfaafinta Mudane C/raxmaan Sheekh Yuusf Al-Cadaala ayaa halkaasi kahadlay.

“Anigoo ku hadlaya maamulka wasaaradda waxaan jeclahay in halkani aan idinkugu soo dhaweeyo, barnaamijka, Runtii wuxuu kamid yahay barnaamijkan dardargelinta howlihii bulshadu ay ka sugayeen, oo ah wacyigelinta bulshada, sanadkan soo socoda waxaan ku dadaali doonaa horumar kan ka duwan”, Ayuu yiri Agaasime Cadaala.

Guddoomiyaha Gobolka Banaadir ahna Duqa magaalada Muqdisho Mudane Taabid Cabdi Max’ed ayaa munaasabadda ka sheegay in maamulkiisa uu dadaal u galidoono sidii dugsiyo waxbarasho oo lacag la’aan  ah looga hirgelin lahaa magaalada Muqdish.

“ka maamul ahaan waxaan ku dadaalaynaa sidii iskuulaad waxbarasho oo lacag la’aan ah uga sameyn lahayn Muqdisho, hadda labo Degmo ayaan ka hirgelinay waxaan doonaynaa in Degmo kasta laga helo hal iskuul oo si lacag la’aan ah wax loogu barto.

Mudane C/raxmaan Cumar Cismaan En. Yariisow Wasiirka Warfafunta Xukuumadda Federaalka Soomaaliya ayaa bogaadiayay kaalinta warbaahinta Qaranka ay ka qaadanayso wacyigelinta bulshada.

“Maanta runtii xafladani waa xaflad Taariikhi ah, ka sokow tartankan oo aan ugu mahadcelinayno maamulka Gobolka Banaadir waxaa jiray tartamo kale sida,  Koob loo qabtay 15 May iyo Maalmaha Xoriyadda  kaasi oo ay ku guuleysatay kooxda Banaadir, sidoo kale waxaa jiray tartan kale sports oo ka socoday Degmada Warta-Nabadda oo ay ku guuleysatay  Warbaahinta Qaranak, waxaana rajeynaynaa in aad nala xoojisaan hiigsigan”, Sidaasina waxaa yiri Wasiirka warfaafinat XFS.

Marwo Khadiijo Max’ed Diiriye Wasiirka Dhalinyarada iyo ciyaaraha Xukuumadda Federaalak Soomaaliya oo halkaasi ka hadashay ayaa dhiiro gelisay kaalinta dhalinyarada ay ku leeyihiin horumarka dalka ayadoo ku amaantay maamulka gobolka gaar ahaan dowrkii uu gabdhaha dhalinyarada ah ka siiyay talada maamulkiisa.

Ra’iisul Wasaare ku xigeenka Xukuumadda Federaalka Soomaaliya ayaa ku amaanay warbaahinta Qaranak dowrka ay ka qadanayso wacyigelinta bulshada.

Waxaa geba gebadii halkaasi shahaadooyin lagu Guddoonsiyay Tarmayaasha Degmada Wartanabadda ee Muqdisho iyo degmada Dhahar ee gobolka Sanaag oo iyana gashay kaalinta labaad iyo sidoo kooxo ku guuleystay tartamo sports  sida koox u dheeleysay Warbaahinta Qaranka oo ku guuleystay tartan ka dhacay degmada Warta nabadda, Koobka 15 May oo ay qaaday koxda Banaadir.

W/Q Cali C/qaadir Cali 

Ra’iisul Wasaare ku xigeenka Xukuumadda Federaalka Soomaaliya Mudane Mahdi Max’ed Guuleed Qadar oo ka hadlayay munaasabad lagu soo xirayay tartan Cilmiyeedka Bisha Ramadaan ee Warbaahinta Qaranka ayaa sheegay in Dowladad Soomaaliay ay ku guuleysatay ladagaalanka Musuqa.

“Sida aad la socotaan Ra’iisul Wasaaraha Soomaaliya waxaa uu hirgeliyay tiirarkii muhiimka u ahaa Dowladda kuwaasi oo horey uu u balanqaaday Madaxweynaha JFS, Waxaa lagu guuleystay in wax badan laga qabto ladagaalanka Musuqa, qofkii qalin wax ku dhacana sharciga ayaa la horkeenaya”,Ayuu Raiisul Wasaare ku xigeenka dalka.

Mudane Mahdi Max’ed Guuleed ayaa  Sidoo kale ugu baaqay shacabka Soomaaliyeed in ay bixiyaan Canshuurta maadaama Dowladda Soomaaliya ay ka soo baxday dowrkeedii ahaa ladagaalanka Musuqa, taasi oo keeneysa in lacagaha laga qaado bulshada loogu adeego Dalka iyo Dadkaba.

Mudadii ay jirtay Dowladda uu madaxweynaha ka yahay Max’ed C/laahi Farmaajo waxaa la dareemayaya horumaro balaaran oo isugu jira dhinacyada Ammaanka, Dhaqaalaha, ladagaalanka Musuqa iyo xiriirka dhinaca diblomaasiyadda.

Madaxweynaha JFS Mudane Maxmed Cabdullahi Farmaajo ayaa hadda  kulan la leh saraakiisha hay’adaha Ammaanka, kaasi oo ku saabsan Amniga guud ee Dalka.

Kulanka oo ka soconaya Xarunta Aqalka Madaxtooyada Villa Soomaaliya ayaa waxaa goob joog ka ah dhamaan saraakiisha laamaha Ammaanka ee Dowladda Federaalka Soomaaliya Cali Baashi C/llahi Cabdi wariyaha Warbaahinta Qaranaka u qaabilsan Madaxtooyada Soomaaliya uu soo sheegayo in uu kulanku yahay mid looga Arinsanaayo Amaanka Dalka.

Ujeedad kulanka ayaa ah sidii loo xoojin lahaa sugidda Ammaanka guud ee Dalka gaar ahaan Caasimadda iyo sidii ay u wadashaqeyn lahaayeen dhamaan laamaha Ammaanka Dowladda Federaalka Soomaaliya.

Laamaha Amaanka Dalka ayaa dadaal  xoogan ugu jira sidii ay u hanan lahaayeen Nabad galyada Dalka loona Cirib tiri lahaa haraadiga maleeshiyaadka Nabad diidka ah ee Al shabaab.

Ra’iisul Wasaaraha dalka Mudane Xasan Cali Khayre ayaa uga tacsiyadeeyey Qoysaska, Qaraabada iyo dhammaan shacabka Soomaaliyeed qaraxii kooxada nabad diidka ay ka geysteen wadada Makkah Al-mukarama ee magaalada Muqdisho.

“Waxaan tacsi u dirayaa ehellada iyo qaraabada ay ka geeriyoodeen dadkii ku dhintay qaraxaas, waxaan sidoo kale ALLAH uga baryayaa kuwa dhaawacmay inuu caafimaad deg-deg ah siiyo ” ayuu yiri R/W Khayre.

Ra’iisul Wasaaraha ayaa ugu baaqay shacabka Soomaaliyeed in hal dhinac looga soo wada jeesto ficillada foosha xun ee kooxaha Argagixisadu ay la beegsanayaan shacabka aan waxba galabsan.

“Waa inaan meel uga soo wada jeesanaa Argagixisada liddiga ku ah jiritaanka iyo qaranimada ummadda Soomaaliyeed” ayuu raaciyey Ra’iisul Wasaare Xasan Cali Khayre.

W/Q Cali C/qaadir Cali