Shil diyaaradeed oo ka dhacay dalka Mexico ayaa ka dhashey dhimashada dad mas’uuliyiin ahaan oo isugu jiray xildhibaan iyo guddoomiye gobol,kadib markii ay burburtay diyaarad ay saarnaayeen.

Guddoomiyaha gobolka Puebla state ee dalkaasi Mexico Martha Erika Alonso,seygeedi Rafael Moreno Valle,2 duuliye iyo qof kale oo diyaaradda saarnaa ayaa ku dhintay shil diyaaradeed oo ka dhacay dalkaasi markii ay burburtay diyaarada nuuca Helcopterka ah oo ay saarnaayeen xili ay ka kacaysay garoonka diyaaradaha caasimadda Puebla .

Madaxweynaha cusub ee dalkaasi Mexico Andrés Manuel López Obrador ayaa xaqiijiyay geerida guddoomiye Martha Erika Alonso iyo seygeeda Rafael Moreno Valle kadib qoraal uu soo dhigay bartiisa Twitterka isagoo adeegsanayay luuqadda Spanishka.

Wuxuuna sheegay in ay jiraan baaritaano ku aadan sababaha dhaliyay shilkaasi.

Miss Martha Erika Alonso ayaa ah haweeneydii ugu horeysay ee guddoomiye ka noqoatay gobolkaasi Puebla Satate ee Mexico kadib markii ay ku soo baxday doorasho adag oo halkaasi ka dhacday dhawaan,waana 45 sano jir ka tirsanayd xisbi u ololeeya xuquuqda aadanaha.

Baarlamaanka maamulkaasi Puebla ayaa horyaala in ay doortaan hogaan cusub oo KMG ilaa doorasho ay ka dhacaysa.

Hooyo Salaado Xuseen Nuur waa Hooyo Soomaaliyeed oo ka shaqeysan jirtay goob shaaha lagu cabo oo ku taalo Taalada Xaawo Taako afaafka hore ee Tiyaatarka Qaranka,isla markaana kala qeybisa Degmooyinka Xamar weyne iyo Warta Nabadda.

Qaraxii 22 December ay Al-Shabaab ka geysteen Taalada Xaawo Taako ayay Qoyska Hooyo Salaado ku noqotay musiibo, kaddib markii ay ku waayeen Walaasheed Farxiyo oo u geeriyootay bir ka gashay dhanka Wadnaha oo jartay xididka halbowlaha, taasi oo ka timid gaariga Al-Shabaab ay ka soo buuxiyeen biraha iyo walxaha qarxa ee ay ugu talagaleen inay Ummadda ku xasuuqaan.

Sidoo kale isla goobta Xaawo Taako waxaa ku dhaawacantahay curudda Hooyo Salaado oo jirta da’da 13-sano, taasi oo u ahayd xoog, maadaama ay shaqadoodu tahay iibinta shaaha, isla markaana aysan ka niyad jebi doonin dib u yegleelidda meheradooda ganacsi.

Qaraxii kan ka horeeyay oo ay argagixisadu ka geysteen isla goobtan waxa ay Hooyo Salaado ku weysay Seeygeeda.

“Anaga masaakiin ayaan iska nahay, goobtan shaah ayaan ku karsan jirnay, mucjisadan ayaa nagu habsatay oo galaafatay Walaasheyda Farxiyo, iyo gabarteeyda curudda ah oo iga dhaawacantay, tani waa qadar Alle ee aan u wada duceyno Farxiyo iyo inta kale ee goobta ku dhimatay” ayay tiri Hooyo Salaado.

Hooyo Salaado iyo Walaasheed Farxiyo subax kasta waxay u soo kalihi jireen in shilin shilin-ka ay goobta ka helaan ku quudiyaan ehelkooda iyo naftooda, balse taa badalkeeda Argagixisada Al-Shabaab ay gaari ka soo buuxiyeen waxyaabaha qarxa oo ku kacaya kumanaan kun oo dollar ay ku holciyeen in ka badan 20  qof oo ay ka mid ahayd Farxiyo.

Allaha u naxariistee Farxiyo waxa ay ifka kaga tegtay hal canug, halka Hooyo Salaado ay iminka korineyso 6- carruur ah oo midi kamid ah ay ku dhaawacantahay qaraxii musiibada ahaa, kuwaasi oo isugu jira agoon iyo carruur ay Aabahood kala tageen.

Hooyo Salaado Xuseen Nuur inkasta oo uu dhibkan gaaray hadana hankeedu waa kii shalay, iyadoo si murugo ku dheehantahay ula hadlaysay bulshadana waxa ay ka codsatay inay gacan ku siiyaan sidii ay markale meheraddii ka bur burtay u dhisan lahayd, maadaama ay ka soo jeeddo qoys sabool ah, una baahantahay kaalmo dhinac waliba leh.

W/D: Maxamed Macalin Xasan

Ra’iisul wasaaraha dalka Mudane Xasan Cali Kheyre ayaa maanta kormeeray Golaha Murtida iyo madadaalada Qaranka oo ay ka socdaan howlo dib u dhis ah.

Xilligii uu Ra’iisul waasraha ku guda jiray kormeerka ayaa waxaa goobta ku sugnaa shaqaalaha wasaaradda Warfaafinta,Dhaqanka iyo dalxiiska Xukuumadad Soomaaliya oo halkaasi ka waday shaqa Maalmeedkooda Is-xilqaan, taasoo qayb ka ah qorshaha ay hay’adaha Dowladda kaga qayb qaadanayaan ololaha Is-xilqaan oo uu Madaxweynaha JFS ku dhawaaqay.

Ujeedka ugu weyn ee Ra’iisal wasaare Kheyre u kormeeray Golaha Murtida iyo madadaalada Qaranka ayaa waxay tahay inuu u kuurgalo howsha is-xilqaan iyo siday u socoto,wuxuuna warbixin ka dhageystay Maareeyaha Tiyaatarka Qaranka Abwaan Cismaan Cabdullaahi Guure iyo Injineerada wax ka dhisaya xarunta.

Maareeyaha Tiyaatarka Qaranka Abwaan Cismaan Cabdullaahi Guure ayaa sheegay iney aad ugu faraxsan yihiin inuu soo booqdo Ra’iisal wasaaraha Soomaaliya xilli ay ku guda jiraan howsha is-xilqaan ee dib loogu dayactirayo Golaha Murtida iyo Madadaalada Qaranka,islamarkaana uu Ra’iisal wasaaraha qeyb ka noqdo barnaamijka is-xilqaan ee maanta ka socoto xarunta Tiyaatarka Qaranka.

Waxaa meel wanaagsan maraya dib u dhiska iyo dayac-tirka golaha murtida iyo wacyi gelinta Qaranka Soomaaliyeed oo dhawaan la billaabay.

Hooyo Suldaano Muuse Caddow, waxay ka mid ahayd Macalimiinta Soomaaliyeed ee mudada dheer waqtigooda u huray waxbarista, iyo kobcinta garaadka dadka Soomaaliyeed ee waxbaranaya.

Halganka Nolosheeda iyo hamiga wayn ay ka laheyd soo saarista Bulsho waxbaratay oo leh maskax nadiif ah ayaa waxaa hor istaagay maleeshiyada Al-Shabaab oo Qarax ku dilay 22-kii Bishaan December, xili ay u socotay Jaamacadda Ummadda Soomaaliyeed oo ay ka tirsanayd.

Hooyo Suldaano in ka badan 10-sano ayay ka shaqaynay howlaha Waxbarashada, iyadoo waqtiga uga badan ay ahayd Macallim waxbara Ubadka Soomaaliyeed.

Waxay mudo dheer ka soo shaqaysay oo macallim ay ka ahayd Machadyo kala duwan oo ku yaala magaalooyinka Maka iyo Madiina ee dalka Sacuudiga.

Sidoo kale waxay macallim ka soo noqotay qaar ka mid ah Jaamacadaha ku yaala dalka, sida ay inoo sheegeen dadkii ay aadka isku garanayeen Suldaano Allaha u naxariistee.

2015-kii ayay Suldaano Muuse ku biirtay Jaamacadda Ummadda Soomaaliyeed oo dib loo howlgaliyay 2014-kii.

Waxay haatan sidoo kale la shaqaynaysay Wasaaradda Waxbarashada Soomaaliya sida uu Radio Muqdisho u sheegay saygeeda Eng. Axmed Calasow.

Alla ha unaxariistee Hooyo Suldaano waxay xilligaan ahayd Madaxa qaybta Tababarrada ee Jaamacadda Ummadda Soomaaliyeed, sidoo kalana waxayd ahayd Macalimad dhigta luuqada English-ka.

Suldaano Muuse Caddow da’deeda waxay ahayd 54, sano jir, waxayna ku dhalatay Gobalka Shabeellaha Hoose Sanadka markuu ahaa 1964-tii.

Waxbarashadeeda Hoose, Dhexe iyo Sare waxay ku qaadatay Magaalooyinka Golwayn, Marka iyo magaalada Muqdisho ee Caasimadda Soomaaliya.

Sido kale degree-ga koowaad ee Jaamacadd waxay ka qaadatay Universiti Putra Malaysia (UPM) waxayna ka baxday kuliyadda luuqadaha.

Shaadada master-ka ee heerka labaad ee Jaamacadda waxay ka qaadatay Lincoln University oo ku taala dalka Malaysia, iyadoo baratay cilmiga maaraynta Ganacsiga.

Waxay ahayd Hooyo dhashay Saddex caruur ah, waxaana haatan ay ifka uga tagtay oo kaliya Hal wiil oo ay dhashay iyo labo caruur ah oo uu dhalay.

“Waxay ahayd qof naxariis badan, oo aad uga war haysa dadka ay isku shaqada yihiin duruufaha iyo culaysyada ay dareemayaan, sidoo kale aad ayay ugu fir fircoonayd shaqada, waxayna ahayd qof aad iyo aad u jecel horumarka iyo isbadalka,” Sidaasi waxaa Radio Muqdisho u sheegay qof ka mid ah dadkii ay isla shaqaynayeen.

W/D Maxamed Kaafi Sheekh Abuukar

(SNTV):-Wasiirka Wasaaradda Awqaafta iyo Arrimaha Diinta Soomaaliya Xildhibaan, Sheekh Nuur Maxamed Xassan ayaa dalka sacuudiga waxaa uga bilowday booqasho rasmi ah oo uu maalmo kujoogi doono halkaasi.

Wasiirka iyo wafdigiisa waxaa sidiirran u qaabilay Wasiirka Xajka iyo Cumrada Sacuudiga Dr. Maxamed Salalax Bin Dahir Bintin, iyo Wasiirka ku xigeenka Wasaaradda Xajka & Cumtrada Dr. Cabdilfataax Mashaad,

Masuuliyiintan ayaa yeeyashay kulan saacado qaatay waxaana looga wada hadlay Arrimaha Xajka, iyadoo Wasiirka Awqaafta XFS  laga dhageystay warbixinno kusaabsan arrimaha xajka sanadkii hore sida ay ahayd, waxyaabihii ka dhinaa iyo faa’iidooyinkii lagaaray.

Dowladaha Soomaaliya iyo Boqortooyada Sacuudiga ayaa ku hishiiyay in tirada dadka soomaaliyeed ee sanadka soo socda xajin doona lagu daro, Labo kun iyo Labo Boqol (2,200 ) oo xaaji, taas oo ka dhigan in tirada xujayda Soomaalida sanadkan noqota Kow iyo Toban kun iyo Shan Boqol (11,500 ) oo Qof, halka sanadkii hore ay aheyd, Sagaal kun iyo Sedex Boqol (9,300 ) oo Qof, sida uu sheegay Wasiirka Awqaafta iyo Arrimaha Diinta XFS.

Wasiirka Wasaaradda Awqaafta iyo Arrimaha Diinta Soomaaliya Xildhibaan, Sheekh Nuur ayaa sidoo kale sheegay in la isla-gartay in aad loo wanaajiyo adeegyada la siiyo soomaalida, haddey ahaan lahayd, deegaannada gaadiidka  iyo cunnada intaba, iyadoo lagu ballamay in lada-dajiyo soo saarista Fiisayaasha xajka iyo adeegyada kale ee xajka.