Muqdisho (SNTV):- Ergeyga Gaarka ah ee Midowga Afrika u qaabilsan Soomaaliya ayaa cambaareeyay weerarkii argagixisanimo ee Khamiistii ka dhacay caasimadda Muqdisho kaas oo ay ku dhinteen kuna dhaawacmeen  dad shacab ah oo aan waxba galabsan.

Francisco Madeira, oo ah Madaxa Howlgalka AMISOM iyo Wakiilka gaarka ah ee Midowga Afrika u qaabilsan Soomaaliya ayaa sheegay in howlgalka Al-Shabaab ku qaadeen Hotelka Maka Al-mukarama iyo goobaha kale ee ganacsiga ay cadeyn u tahay sida xagjiriintu u ixtiraameyn xuquuda aadanaha ama u tixgelineyn ahmiyada nolosha u leedaha aadanaha.

“Ujeedkooda ugu muhiisam waa iney hoos u dhigaan horumarka ay gaareen Dowladda Federaalka,dowladaha xubnaha ka ah Federaalka,saaxiibadooda ku howlan horumarinta iyo xasilinta Soomaaliya,” ayuu Madeira ku yiri war qoraal ah uu soo saaray.

Ergayga Midowga Afrika u qaabilsan Soomaaliya ayaa muujiyay  taageerada uu u hayo xukuumadda Soomaaliya, wuxuuna tacsi u diray Ehalada dadka waxyeelada soo gaartay.isagoona dadka dhaawaca ah u rajeeyay in si dhaqsi ah u soo bogsadaan.

Muqdisho (SNTV):- Dowladda Qadar ayaa si kulul u cambaareeysay weerarkii argagixisadu ay ku laayeen dad shacab ah,kaasi oo ka dhacay goobo ganacsi oo ku yaalo magaalada Muqdisho.

War qoraal ah oo ka soo baxay Wasaaradda arrimaha dibada dalka Qadar ayaa lagu sheegay in Xukuumadda Dooxa si adag uga soo horjeedo rabshadaha iyo falalka argagixisada ee sida wuxuushnimada ah u waxyeeleeya dadka shacabka ah ee aan waxba galabsan.

Waxayna Dowladda iyo Shacabka Soomaaliyeed uga tacsiyadeysay dadkii waxyeelada ka soo gaartay falkaasi argagixiso ee kooxda nabad diidka ay  habeen ka hor ka fulisay magaalada Muqdisho.

Dowladda Qadar ayaa ku celisay iney garab taagan tahay Dowladda iyo Shacabka Soomaaliyeed,islamarkaana ka taageereyso sidii looga adkaan lahaa kooxaha argagixisada ee u soo tafa-xeetay iney laayaan shacabka Soomaaliyeed.

USA-(SNTV)-Dowladda Maraykanka ayaa cambaarayn xooggan Dusha uga tuurtay Kooxihii ka dambeeyay weerarradi Argagaxiso ee 28-kii Febraayo ka dhacay xarumo ganacsi oo ku yaalla Magaalada Muqdisho.

Xukuumadda Washington DC, ayaa sidoo kale ammaan usoo jeedisay tallaabooyinka geesinimada leh ee ay Ciidamada amniga Soomaaliya nafdooda ugu hureen ka hortagga kooxda weerarka soo qaadday iyo sida ay u dadejiyeen taakuleynta Dadkii dhaawacmay ee ku xannibnaa halka ay wax ka dhaceen,taaso sahashay badbaadinta Naf badan.

Dowladda Maraykanka ayaa tacsi tiiraanyo leh u dirtay Qoysaska iyo saaxiibbada dhibbanayaasha la dilay ama ku dhaawacmay weerarkii bahalnimada ahaa ee ay Argagixisadu geysteen.

War Qoraal ah oo kasoo baxay Xafiiska Safiirka Maraykanka u fadhiya Soomaaliya, Ambassador; Don Yamamoto, ayaa lagu sheegay in ay Al-Shabaab mar kale muujisay in aysan u haynin nolasha Dadka Soomaaliyeed wax tixgilin ah.

Warkan ayaa sidoo kale lagu sheegay in ay Kooxda Argagixisadu leedahay Hal hadaf oo ah in laga hortago horumarka, nabadda iyo barwaaqada ay ku tallaabsanayso Soomaaliya.

“Dowlada Maraykanka waxa ay xaqiijineysaa dedaalka xooggan ee ay siineyso Dadka iyo  xukuumadda Soomaaliyeed, iyada oo Gacan ka geysaneysa ​​dedaallada wadajirka caalamiga ah,  taas oo lagu doonaayo dhisidda Dal xoog leh oo Dadkiisa u horseeda barwaaqo iyo mustaqbal wanaagsan” ayaa lagu yiri warka kasoo baxay Xafiiska Amb; Yamamoto.

Tan iyo markii uu dhacay weerarkii waxashnimada ahaa ee ay Argagixisadu ku qaadeen xarumo ganacsi iyo Guryo Dad Shacab ah oo yaalla Muqdisho Laba Cisho ka hor, waxaa isa soo taraya cambaaraynta kaga imaaneysay dhagar-qabayaasha Beesha Caalamka iyo Bulsho weynta Soomaaliyeed eek u dhaqan daafaha Dunida.