Wasiirka Wasaaradda Waxbarashada, Hiddaha iyo Tacliinta Sare ee Xukuumadda Federaalka Soomaaliya, Mudane Farah Sheekh Cabdulqaadir, oo booqasho ku jooga dalka Thailand, ayaa kulan la qaatay Madaxa Hay’adda Iskaashiga Caalamiga ah ee Thailand (Thailand International Cooperation Agency – TICA), Mudane Chulvat Narinthrangura, iyo mas’uuliyiin kale oo ka socday hay’adaha u qaabilsan horumarinta iyo iskaashiga dalka Thailand.
Ugu horreyn, Wasiirka ayaa dowladda Thailand uga mahadceliyay kaalmada waxbarasho ee ay siiso ardayda Soomaaliyeed.
Kulanka ayaa looga hadlay sidii loo sii xoojin lahaa xiriirka iskaashi ee u dhexeeya Soomaaliya iyo Thailand, iyo muhiimadda ay leedahay sare u qaadista iskaashiga horumarineed ee labada dal, gaar ahaan dhinacyada horumarinta karaanka aadanaha, waxbarashada, horumarinta xirfadaha farsamada, iyo kalluumeysiga.
