Wafdi ay hogaamineyso Wasiirka haweenka iyo horumarinta xuquuqul insaanka ee xukuumadda federaalka Soomaaliya, Mr.’s Xaniifa Maxamed Ibraahim (Xaabsade) ayaa maanta safarkeedii ugu horeeyay tan iyo markii xilka loo magacaabay ku tagtay magaalada Baydhabo.
Wafdiga Wasiirada ayaa waxaa Garoonka diyaaradaha ee magaalada Baydhabo, si weyn ugu soo dhoweeyay Wasiiro xildhibaano iyo qeybaha bulshada ee Maamulka Konfur Galbeed.
U jeedka socdaalka wafdiga ayaa ah u ololeynta xuquuqda haweenka ee siyaasadda dalka iyo xaqiijinta kuraasta dumarka ee golayaasha dowladda gaar ahaan labada aqal ee baarlamaanka federaalka.
Wasiirka haweenka Koofur Galbeed, oo hor kacaysa soo dhoweynta wafdiga wasiirka ayaa sheegtay in ay ku faraxsan tahay soo dhoweynta wasiirka haweenka Soomaaliya.
Soo dhoweynta ka dib, wasiir Xaniifa, oo warfidiyeenka kula hadashay qeybta nasashada garoonka diyaaradaha ee Shaata gaduud ee magaalada Baydhabo ayaa u mahad celisay dadkii soo dhoweeyay, waxayna sheegtay in ay ku faraxsan tahay maanta in ay Baydhabo noqoto meeshii ugu horeysay oo ay timaado tan iyo markii xilka loo magacaabay.
“Ololeynta kuraasta haweenka, maadama wadanka uu galay xilli doorasho, halbeega xukuumadda aan ka tirsanahay ee Ra’iisul wasaare Maxamed Xuseen Rooble ay tahay xaqiijinta kuraasta haweenka, Insha’Allah dhowr maalin ayaa joogi doona, waxaana la kumayaa qeybaha bulshada” ayay tiri wasiir Xaniifa.
Soo dhoweynta wefdiga wasiirka waxaa ka qeybgalay, wasiiro, xildhibaano, maamulka gobolka iyo qeybaha bulshada ee Koofur Galbeed Soomaaliya.
