Wasiirka Wasaaradda Gaashaandhigga Xukuumadda Federaalka Soomaaliya, Mudane Axmed Macallin Fiqi, ayaa tacsi tiiraanyo leh u diray ehelladii, qaraabadii, Ciidanka Xoogga Dalka Soomaaliyeed iyo guud ahaan bahda warbaahinta, geerida ku timid Alle ha u naxariistee L/X/le Maxamed Diiriye Dhakat, Agaasime Ku-xigeenkii Warbaahinta Ciidamada Qalabka Sida.
Marxuum Maxamed Diiriye Dhakat ayaa door muuqda ka soo qaatay tebinta hawlgallada Ciidanka Xoogga Dalka Soomaaliyeed iyo wacyigelinta la xiriirta dagaalka lagula jiro argagixisada.
Wasiirka ayaa Alle uga baryay marxuumka inuu ka waraabiyo Jannatul Firdowsa, ehelladii, qaraabadii iyo dhammaan bahdii uu ka baxayna uu ka siiyo samir iyo iimaan.
