Wasiirka Wasaaradda Arrimaha Gudaha XFS xildhibaan Cali Yuusuf Cali (Xoosh) ayaa maanta kormeer ku tagay xaruntii dhexe ee Wasaaradda ee degmada Boondheere oo dib-u-dhiskeeda si buuxda loosoo gabagabeeyey, isla markaana la filayo in dhowaan si rasmi ah xarigga looga jaro.
Kormeerka oo sidoo kale qayb ka ahaa Agaasimaha Guud ee Wasaaradda Cabdulqaadir Cilmi (Cabdul) ayaa inta uu socday waxaa warbixin laga siiyey heerarka kala duwan ee howlaha socda oo ay ka mid yihiin u guurista xarunta cusub, howlaha dhireynta iyo qurxinta deegaanka, qalabeynta xafiisyada iyo heerka diyaar-garowga munaasabadda xarig-jarka ee xarunta cusub.
Wasaaradda Arrimaha Gudaha Soomaaliya oo ah hooyada Wasaaradaha dalka ayaa dhowaan la filayaa in 35 sano kadib u guurto, dib ugu adeegto shacabka xarunteedii dhexe ee Boondheere, taasi qayb ka ah aragtida xukuumadda DanQaran ee dib-u-dhiska xarumaha hay’adaha dowliga ah ee danta guud iyo tayeyntooda.
