Waxaa maanta ka dhacay caasimadda Uganda ee Kampala shirka Guddiga Joogtada ah ee Soomaaliya iyo Uganda (JPC) kaasoo loogu diyaar-garoobayo Shirka-Madaxeedka labaad Soomaaliya – Uganda ee Maalgashiga iyo Ganacsiga, kaas oo dhici doona 7–8 Oktoobar 2025 Kampala. Shirkan ayaa loogu talagalay in lagu xoojiyo iskaashiga labada dal ee dhinacyada maalgashiga, ganacsiga iyo dalxiiska.
Intii lagu guda jiray soo bandhigista shirkan ayaa Prof. Sam Tulya-Muhika, oo ah Danjiraha Uganda ee Soomaaliya ayaa ku boorriyay shirkadaha ganacsiga ee gaarka loo leeyahayinay ee Uganda ka faa’iidaystaan fursadaha ganacsi iyo maalgashi ee Soomaaliya ka jira. Wuxuu xusay taariikhda dheer ee xiriirka labada dal oo soo bilaabatay 1920-meeyadii, isagoo carabka ku adkeeyay baahida loo qabo in la dhiirrigeliyo maalgashi isdhaafsi ah oo dheelitiran.
Dhankiisa, Lataliyaha koowaad ee Safaaradda Soomaaliya ee Uganda, Mudane Cabdilatiif Maxamuud Cali ayaa sheegay in shirka labaad ee JPC uu yahay tallaabo taariikhi ah oo muujinaysa xiriirka qotada dheer ee labada dal. Wuxuu caddeeyay in Uganda mar walba garab istaagto Soomaaliya, ayna shacabka Soomaaliyeed abaalkaas u haayaan.
Shirka-Madaxeedka labaad Soomaaliya – Uganda ee Maalgashiga iyo Ganacsiga ayaa lagu wadaa in lagu saxiixo heshiisyo cusub oo ku saabsan waxbarashada, shaqada iyo socdaalka, iyo sidoo kale amniga, caafimaadka iyo arrimaha qaxootiga.
