Ku-simaha Ra’iisul Wasaaraha ahna Ra’iisul Wasaare ku-xigeenka Xukuumadda Federaalka Soomaaliya, Mudane Saalax Axmed Jaamac, ayaa maanta magaalada Muqdisho ka daahfuray wareegga toddobaad ee Sahanka Tusayaasha Badan ee Soomaaliya, oo ay soo qabanqaabisay Hay’adda Istaatistikada Qaranka.
Ra’iisul Wasaare ku-xigeenka ayaa sheegay in xogta cusub ee sahankan uu soo saari doono ay door weyn ka ciyaari doonto qorsheyaasha dowladda ee la xiriira yareynta saboolnimada iyo horumarinta adeegyada aasaasiga ah ee bulshada.
Sahankan ayaa lagu ururinayaa xog dhammaystiran oo la xiriirta caafimaadka, waxbarashada, nafaqada, ilaalinta carruurta, biyaha iyo nadaafadda. Xogtan ayaa dowladda ka caawin doonta in ay qaadato go’aanno xog ogaal ah oo ku saleysan baahiyaha dhabta ah ee bulshada.
