Wasiir ku-xigeenka Wasaaradda Shaqada iyo Arrimaha Bulshada XFS, Xildhibaan Aamino Xuseen Cali, ayaa ka qeyb gashay xaflad lagu xusayay 12-ka June, oo ah Maalinta Caalamiga ah ee ka-hortagga ku shaqeysiga carruurta. Intii lagu guda jiray munaasabadda, waxay ka warbixisay tacadiyada kala duwan ee carruurta loo geysto iyo baahida loo qabo in xal waara loo helo.
Wasiir ku-xigeenka ayaa sheegtay in dowladda ay ka go’an tahay wax ka qabashada xadgudubyada iyo tacadiyada carruurta gaar ahaan kuwa la shaqaysiiya, iyadoo ugu baaqday bulshada in ay door ka qaataan badbaadinta ubadka oo ah mustaqbalka dalka.
Maalinta 12-ka June, oo ay qabanqaabiso Ururka Shaqaalaha Adduunka (ILO), ayaa sanad walba loogu talagalay in lagu xasuusto dhibaatada carruurta ay kala kulmaan shaqooyinka adag, iyadoo lagu baaqo in la ciribtiro xadgudubyadaas.
