Maxkamadda ciidamada qalabka sida ayaa xukun lix bilood ah ku ridday ganacsade Cabdifitaax Yuusuf Xersi (Cagaweyne) oo garsoor u doontay khawaarijta.
Ganacsade Cagaweyne, ayaa lagu eedeeyey in maxkamad beenaadka Khawaarijta ee deegaanka Gendershe ee gobolka Shabeellaha hoose uu ka dacweeyey Afar qof, kuwaasi oo uu ku lahaa lacago deyn ah.
Eedeysanaha oo ah Ganacsade leh dukaan lagu iibiyo raashinka ayaa ka hor inta uusan u tagin Khawaarijta waxa uu afarta qof ka dacweeyey maxkamadda degmadda Kaxda, taasi oo u xukuntay in lacagaha uu ku lahaa raggaasi ay siiyaan, balse mid kamid ah afartii uu dacweeyey ayaa qaatay racfaan, waxaana kiiskooda loo wareejiyey maxkamadda gobolka Banaadir.
Eedeysanaha ayaan tagin Maxkamadda gobolka Banaadir, taas beddelkeeda uu u dhaqaaqay in khawaarijta uu u dacwoodo, waxaana markii uu soo laabtay ay hay’addaha ammaanka ka qabteen degmadda Kaxda 17-kii sebtembar ee 2024.
Marxalada kala duwan iyo baaris dheer ka dib ayuu garsoorka maxkamadda ciidamada qalabka sida maanta ku xukumay Cabdifitaax Cagaweyne 6 bil oo xabsi ah.
