Wasiirka Wasaaradda Caafimaadka iyo Daryeelka Bulshada Xukuumadda Federaalka Soomaaliya H.E Dr Ali Haji Adam, ayaa si rasmi ah u daah-furay Shir-Cilmiyeedka 1-aad ee Ururka Dhakhaatiirta Soomaaliyeed.
Shirkan ayaa diiradda lagu saaray qodobo muhiim ah oo ku saabsan horumarinta caafimaadka dalka, kuwaas oo ay ka mid yihiin Muhiimadda cilmi-baarista caafimaadka, gaarsiinta adeegyada caafimaadka ee bulshada, Kobcinta awoodda shaqaalaha caafimaadka, Caafimaadka hooyada iyo dhallaanka iyo horumarinta daryeelka la xiriira.
Wasiirka oo khudbad ka jeediyey shirka, ayaa hoosta ka xarriiqay muhiimadda shirkan uu u leeyahay kor u qaadidda iskaashiga iyo wada shaqaynta dhakhaatiirta iyo hay’adaha caafimaadka ee dalka. Waxa uu sidoo kale xusay in shirka uu yahay tallaabo muhiim ah oo lagu dhiirrigelinayo horumarinta adeegyada caafimaadka iyo xallinta caqabadaha jira.
Munaasabadda ayaa isu keentay dhakhaatiir iyo khubaro caafimaad oo kala duwan kuwaasi oo iskugu yimid si ay u wadaagaan fikrado iyo xalal wax ku ool ah oo lagu horumarinayo nidaamka caafimaadka ee Soomaaliya.
