Masuuliyiinta dalka Mali iyo kooxaha wax faalleeya ayaa sheegaya in kooxaha Islaamiyiinta ee dalkaas ka dagaalamaa, inay maalmihii ugu dambeeyey ku sii siqayaan dhinaca bari ee dalka Mali iyaga oo qabsaday deegaano cusub. Kooxaha Islaamiyiinta ayaa waxay laayeen boqolaal qof oo rayid ah halka ay kumanaan kalena ku khasbeen inay guryahooda ka caraaraan.
Guulaha cusub ee ay gaareen kooxaha Islaamiyiinta ee ka dagaalama dalkaas, ayaa markhaati fur u noqonaya culayska dalka Mali ka haysta in uu buuxiyo booskii ay banneeyeen ciidamada dalka Faransiiska iyo kuwa reer Yurub ee dalkaas ka baxay, iyada oo dhinaca kalena uu xumaaday xidhiidhkii Mali ay lahayd dalka Niger, taasoo keentay inay joogsadaan hawlgalladii milateri ee wada jirka ahaa ee ay ka samayn jireen meelaha u dhow xuduudda ay wadaagaan Niger iyo Burkina Faso.
Dagaal culus oo u dhexeeya kooxaha gooni u goosadka ah ee Tuareg iyo kooxda isku magcawda dawladda Islaamiga ah ee Saxaraha (ISGS) ayaa laga soo sheegayaa gobolka Menaka, halkaas oo ay ciidamada Mali kala wareegeen ciidamada Faransiiska bishii June.
Tan iyo markii ay baxeen ciidamada Faransiisku waxaa soo culays badani uu soo fuulay dawladda Mali, iyada oo kooxaha Islaamiyiintuna ay dardar geliyeen hawlgalladooda.
Tan iyo bishii March, waxa la dilay boqollaal qof oo u badan dad rayid ah, iyada oo kooxaha Islaamiyiintu ay gulufkooda ku ekeeyeen gobolka Menaka iyo gobolka kale ee la deriska ah ee Gao, sida laga soo xigtay warbixinta ACLED oo dusha kala socota xasaradaha hubaysan ee gobolkaas ka socda.
