Muqdisho (SONNA) Ku simaha Ra’iisul wasaaraha ahna Ra’iisul wasaare ku xiggeenka Dalka Mudane Mahdi Maxamed Guuleed (Khadar) ayaa Maanta Xafiiskiisa ku qaabilay Fanaanadda Soomaaliyeed ee caanka ah Maryan Mursal Ciise oo dalka dib-ugu-soo laabatay.
R/Wasaare ku xigeenka Xukuumadda Soomaaliya ayaa sheegay in ay dhiiri gelinayaan Fanaaniinta iyo Abwaanada Soomaaliyeed, isagoo ku tilmaamay in ay yihiin hal doorka Qaranka.
“Fanka Soomaaliyeed wuxuu kamid yahay guulaha ay dadkeenu ku faani karaan, dhammaanteen waxaa waajib inaga saaran yahay inaan xoogga saarno soo nooleynta fankeenii wanaagsanaa kuna faanaa hiddaha iyo dhaqanka qaniga ah ee aynu leenahay”ayuu yiri Ra”iisul Wasaare ku xigeenka Soomaaliya.
Fanaanada Soomaaliyeed ee Maryan Mursal Ciise ayaa uga mahad celisay soo dhoweynta iyo marti qaadka ay ka heshay Xukuumadda Soomaaliya, gaar ahaan ku simaha Ra’iisul wasaraaha ahna R/wasaare ku xiggeenka , iyadoo xustay in ay wado heeso Wadani ah oo lagu baraarujinayo bulshada Soomaaliyeed.
