Muqdisho (SNTV);-  Munaasabadda Daah-furka Habkan cusub oo lagu heli doona Visaha Xajka waxaa goob joog ahaa Ra’iisul wasaare ku-xigeenka, Dalka Madaxda wasaradda, xildhibaanno iyo culimaa’udiin kale,waxaana halkaasi lagu faah faahiyay muhiimadda arrintani ay leedahay.

Guddoomiyaha guddiga Cadaaladda,Owqaafta iyo arrimaha Diinta ee Aqalka Sare Shariif Sheekuna maye ayaa goobtaasi ka sheegay in ay tahay horumar dalka uu ku talaabsaday,marba hadii Visaha Xaji dalka gudihiisa laga qaadanayo,iyadoo loo doonan jiray wadamo kale sida jabuuti.

Wasiirka Owqaafta iyo arrimaha Diinta Sheekh Nuur Maxamed Xasan oo ra’iisul wasare kuxigeenka dalka u sharaxay dadaalkii loo soo maray hirgelinta in dalka gudihiisa laga qato viisaha Xajka ayaa xusay in dadaalo badan lagu bixiyay ugu dambeyna laga miro dhaliyay.

Waxaa si rasmi ah u dahfuray habkaasi cusub oo dalka looga qaadan karo Visaha Xajka Mudane Mahdi Maxamed Guuled, wuxuuna xusay in ay qeyb ka tahay barnaamijyada horumarineed ee adeegyada bulshada oo ay waddo Xukuumadda Soomaaliya.

Muqdisho-(SNTV)-Wasiirka Wasaaradda qorsheynta, maal-gashiga iyo horumarinta dhaqaalaha ee DFS Amb; Jamaal Maxamed Xasan, Agaasimaha qorsheynta, Asad Yuusuf Qanyare iyo madax sare oo ka tirsan Wasaaradda, ayaa Maanta kulan la tashi ah oo ku saabsan qorshaha horumarinta Qaranka waxay Xafiiskiisa kula yeesheen Guddoomiyaha Maxkamadda sare ee Soomaaliya Garyaqaan ; Baashe Yuusuf Axmed.

Inta uu kulanka socday ayaa waxay madaxda Wasaaraddu halkaasi ku soo bandhigeen warbixin la ku saabsan qorshaha horumarinta Qaranka ee 9-aad, waxyaabaha u soo qabsoomay iyo waxyaabaha qabyada ka ah oo ay la tashi kala sameynayaan, gaar ahaan ku dhaqanka sharciga, kor u qaadidda hay’adaha garsoorka iyo siddii loo heli lahaa nidaam caddaaladdeed oo dhammeystiran.

Agaasimaha qorsheynta,  Asad Yuusuf Qanyare, soo jeediyey warbixintaasi, ayaa sheegay in qorshaha horumarinta Qaranka ay hore la tashiyo ugala soo sameeyeen Maamul-gobaleedyada Dalka iyo qeybaha kala duwan ee Bulshada, isla mar ahaantaana ay soo qoreen baahiyahii kala duwanaa ee ka jiray Dalka, waxaana uu Carrabka ku dhuftay in ay qorshahaas ku soo koobeen Saddex ahmiyaddood oo kala ah ku dhaqanka sharciga iyo siyaasad loo dhan yahay, korodhka dhaqaalaha iyo amniga.

Waaxda maal-gashiga ee Wasaaradda qorsheynta, ayaa iyaguna waxay halkaasi ku soo bandhigeen warbixin la xidhiidha qorshahooda ku aadan siddii dhiirri-gelin looggu sameyn lahaa maal-gashadayaal Dalka ka hir-geliya maal-gashi kor u qaada heerka dhaqaale ee Dalka, waxaana ay Guddoomiyaha Maxkamadda la tashi kala sameeyeen siddii loo heli lahaa sharciyad iyo diyaarinta ku dhaqanka sharciga si maal-gashadayaashu ay ugu soo dhiirran karaan Dalka.

Guddoomiyaha Maxkamadda sare, Baashe Yuusuf Axmed, ayaa sheegay in uu si weyn ugu faraxsan yahay in Wasaaradda qorsheyntu ay la tashiyo kala soo sameyso qorsheyaasha horumarinta iyo maal-gashiga ee Dalka, waxaanu intaa raaciyay in qorshaha horumarinta Qaranka uu ahmiyad weyn u leeyahay bahda Garsoorka, taas oo uu tilmaamay in ay baahi weyn u qabaan sidii horumarin looggu sameyn lahaa, isaga oo halkaas ka soo jeediyey talooyin ku aaddan qorshaha horumarinta Qaranka, gaar ahaan baahiyaha kala duwan ee ay qabaan ka garsoor ahaan .

Muqdisho-(SNTV)-Waxaa Magaalada Muqdisho lagu soo gaba-gabeeyay kulan soconayay Saddex Cisho, kaas oo looga hadlyayay doorka Dhallinyarada , aqoonyahanada iyo ganacsatada Soomalaiyeed ay ka qaadan karaan horumarinta dhaqaalaha, wax soo saarka dalka iyo sidii sare looga qaadi lahaa barashada xirfaha la xiriira Seyniska, Tecnologiyadda, engineering iyo Xisaabta.

Kulanka oo ay qaban-qaabadiisu lahayd Somali stem society, ayaa waxaa ka qeyb galay Wasiirro Xildhibaanno , aqoonyahanno iyo marti sharaf kale ayaa waxaa loogu dooday sida ugu habboon ee looga qeyb qaadan karo wax soo saarka Dalka iyo muhiimadda ay leedahay barashada xirfadaha kala duwan ee maaddooyinkaasi, kuwaas oo qeyb weyn ka qaata wax soo saarka iyo horumarka Dal kasta.

Madaxa Ururka Somali stem society, Sacdiyo Siyaad, ayaa ka hadashay doorka ay Dhallinyarada Soomaaliyeed ka qaadan karaan sare u qaadidda horumarka Dalka , waxanay da’yarta ku boorrisay in ay bartaan maaddooyinka iyo wax yaabaha muhiimka u ah koboca dhaqaalaha.

Xildhiban; Xuseen Carab Ciise , oo ka mid ah golaha Shacabka Baarlamaanka Federaalka Soomaaliya ayaa sheegay in ay soo dhoweynayaan barnaamijyada wax tarka u leh Bulshada, isagoo intaa raaciyay in ay tallaabadani tahay mid u baahan in hore loogu socdo.

Gabagabadadii kulanka ayaa waxaa goobta lagu soo bandhigay fursado hal abuur shaqo ah oo ay ku tartamayeen shairkado ,si dalka maal gashi looga sameeyo, waxaana ku guuleystay mid ka mid ah shirkadahii ku tartamay, iyadoo uu maal galintuna sameeyay Bankiga I BS- BANK.