Muqdisho(SONNA) Madaxweyne Ku-xigeenka dawlad Goboleedka Puntland ahna kusimaha Madaxweynaha Eng. Cabdixakiin Xaaji Cabdullahi Cumar Camey ayaa maanta 01 September 2017 salaadda ciiddul adxaha la oogey shacabka caasimadda  Garoowe.

Salaadda Ciiddul-Adxa ayaa lagu dukaday Garoonka diyaaradaha Mire Awaare ee magaalada Garowoe, halkaasi oo si wada jir ah ay Salaadda ugu oogeen madaxda Puntland iyo dadweyne kale.

Madaxweyne Kuxigeenka Puntland ahna ku simaha madaxweynaha C/xakiin Xaaji C/llahi Cumar Camey ayaa shacabka Puntland u direy hambalo ku aadan munaasabadda ciidda,isagoo ku amaanay dowrka ay ka qaateen amniga iyo xasiloonida.

“Puntland waxaa ka jira horumar ballaaran’taasina waxaa qeyb weyn ka qaatay shacabka Puntland,waxaana ugu baaqayaa in ay sii xoojiyaan dadaalkoodi ku aadan dhanka horumarka”, Ayuu yir Mudane Camey.

Waxaa uu soo hadal qaaday dhibaatooyinka ka dhashey diidmada lacagta Shillin Soomaaliga taasi oo uu ku tilmaamay in ka maamul ahaan aysan waxba ka ogeyn, islamarkaana ay wax ka qaban doonaan arrintaasi,isagoo dhanka kale Dowladda Soomaaliya u jeediyay baaq ku aadan xal u helidda dhibaatooyinkaasi laxiriira dhanka lacagaha.

Mas’uuliyiinta iyo ganacsatada Puntland ayuu ugu baaqey in ay hormuud ka noqdaan dhiiro gelinta isticmaalka lacagta Shillin Soomaaliga ah.

Muqdisho(SONNA):–Madaxweynaha Jamhuuriyadda Federaalka Soomaliya Mudane Maxamed C/llaahi Farmaajo oo qeyb ka mid ah maalintiisa Ciidda la qaatay lana qadadeeyay Cudubyo ka tirsan Ciidan Xoogga Dalka ayaa ku ammaanay doorka Ciidamada oo isugu jira Difaaca Dalka iyo garab istaaga Shacabka.

“Waxaan maanta halkan idin kugu imid in aan idin soo booqdo aan arko sidaad u nooshihiin, idin la ciido waxaan idiin sheegayaa in aa tihiin astaantii Qaranka ilaalinaayay Madaxda Dalka ,waajibaadka idin saaranna uu yahay mid Culus”ayuu yiri Madaxweynaha JFS

Madaxweyne Farmaajo ayaa arin xusuus mudan ku tilmaayay talaabadii dhawaan uu qaaday Ururka 60-aad ee Ciidamada Xoogga Dalka oo qeyb ka mid ah mushaarkooda ay ugu hibeeyeen Qoosas dan yar ah.

“Runtii waxaan aad idin kugu mahad calinayaa sidaad usu xilqaanteen ayaan dhaweed oo aad mushaaradiina ugu goyseen dadka masaakiinta ee liinta, waxayna muujineysaa in aad quluubta kala socotaan dadka Masaakiinta ah, waan howsha laga rabo in uu sameeyo qofka Ciidanka ah”ayuu raaciyay Madaxweyne Farmaajo

Qaar ka mid ah Saraakiishii iyo Ciidamadii la Ciiday Maxamed C/llaahi Farmaajo ayaa muujiyay niyad samida ay ku abuurtay waqtiga uu siiyay Madaxweynaha Maanta oo Maalin Ciid ah.

Dhiira galinta waa talaabooyin had iyo jeer uu qaado Madaxweynaha JFS Mudane Maxamed C/llaahi Farmaajo, waan qeyb ka mid ah qorshaha Qarka uu dib ugu dhisayo Ciidamadda Xoogga Dalka.

Baydhabo(SONNA):–Shacabka magaalada Baydhabo iyo Madaxda Maamulka Koonfur Galbeed ayaa saaka markii uu waagu baryey u dareeray masaajidda iyo goobo kale, si ay ugu soo tukadaan salaada ciidul Adxaa.

Salaada ka dib wadooyinka magaalada Baydhabo waxaa isugu soo baxay dadweyne fara badan oo ku labisan dhar qurux badan oo noocyo kala duwan leh, waxayna iskugu hambalyeynayeen munaasabada ciiddul Adxaa.

Siraaji Xaaji-Baydhabo

Muqdisho(SONNA) Iyadoo ay maanta tahay maalin farxadeed islamarkaasina Caalamka Islaamka looga dabaaldegayo Munaasabadda Ciidul-Adxaa, ayaa  Masjidda Waaweyn ee Magaalada Qaahira ee Dalka Masar waxaa saakay si wadajir ah looga tukaday Salaada Ciidul-Adxaa oo ahayd munasabad qiima weyn u leh dhamaan shucuubta islaamka.

Jaaliyadda Soomaaliyeed ee ku nool qaahira caasimadda Masar iyo qaar kamid ah ajaanibta kale ee muslimiinta ah oo kunool dalkaasi gaar ahaan Caasimadda Qaahira ayaa saaka iyagana Salaadda Ciiddul Adxa ku oogay garoonka weyn ee suuq Sayaaradka halkaaso ay tahay goob aan sidaasi uga fogeyn xaafadaha ay Soomalida dagan yihiin.

Dadka ayaa waxa wejiyadooda ka muuqday farxad iyo reynreyn, waxaana ay isugu hambalyeynayeen munaasabadda ciida, iyadoona ciidani ay dadka muslimiinta ah ee ilaahay wax siiyay uga faa’iideystaan in ay ka farxiyaan dadka danta yarta ee aan waxba heysan.

Ugu dambeyn Soomalida ku dhaqan magaalada Qaahira ee dalka Masar waxa ay umadda Soomaaliyeed ay lee yihiin ciid wanaagsan, iyagoo umadda Soomaaliyeed meel kasta ay joogaan u rajeynayaan inay munaasabadda ciiddul Adaxa sanadkan sanadkiisa ku gaaraan Nabad, Basha Bash iyo Barwaaqo.

Wariyaheena Masar Mowliid Xasan Cabdi

Khartoum(SONNA):–Kumanaan kun oo ka mid ah Shacabka magaalada Khartoum ayaa saaka markii uu waagu baryey u dareeray masaajidda iyo goobo kale, si ay ugu soo tukadaan salaada ciidul Adxaa.

Jaaliyadda iyo Ardayda Soomaaliyeed ee ku dhaqan Dalkane Suudaan gaar ahaan Magaaladda Khartoum, ayaa Salaadii ciida ee manta waxaa ay muslamiinta kale ee walaalahood ah kula tukadeen goroonka kubadda cagta ee ku yaala gudaha Jaamaadda Afrika.

Salaada ka dib ayaa waxaa wadooyinka magaalada Khartoum isugu soo baxay dadweyne fara badan oo isugu jira Rag, Haween iyo Caruur intooda badan ku lebisan dhar qurux badan oo noocyo kala duwan leh, waxayna iskugu hambalyeynayeen munaasabada ciidda.

Guud ahaan magaalada Khartoum ee Caasimadda Dalka Suudaan ayaa is weyn looga dareemayay damaashaaka iyo dabaaldaga munaasabada ciida Al-adxa.

Muqdisho(SONNA) Go’aan ka soo baxay maxakamadda sare ee dalka Kenya ayaa lagu sheegey in maxakamadu ay diidey natiijada doorashadii uu ku guuleystay Uhuru Kenyata.

Guddoomiyaha maxkamadda sare ee dalkaasi Kenya David Maraga ayaa sheegay in ay ogaadeen in wax isdabomarinno badan ay dhaceen, wuxuuna amray in 60 maalmood gudahood lagu qabto doorasho xalaal ah.

Afar ka mid ah lixdii garsoore ee dacwadda uu ay gudbiyeen mucaaradku qadayay  ayaa isku raacay in lagu celiyo doorashada, iyaga oo sheegay in doorashadii 8 Agoosto aysan u dhicin si waafaqsan dastuurka Kenya.

Uhuru Kenyata ayaa 1.4 milyen oo cod ah kaga guuleystay doorashadii ka dhacday Kenya, sida uu sheegey Guddiga doorashada dalkaasi, iyadoo markiiba ay ka soo horjeesteen qolyaha mucaaradka ah,waxayna sheegeen mucaaradka  in la jabsaday hanaankii combiyutarada guddiga doorashada laguna shubtay natiijada.

Magaalooyinka dalka Kenya ayaa waxaa ka soconaya banana baxyo lagu taageerayo go’aanka maxakamaddu ay gaartay,taageerayaasha Rail Odinge ayaa sameynaya banana baxyo ayagoo ku dhawaaqaya guul guul iyo ereyo kale.

Muqdisho(SONNA) Madaxweynaha Jamhuuriyadda Federaalka Soomaaliya mudane Maxamed  C/llaahi Farmaajo ayaa saaka salaadda ciidul Adxa Masjidka Shuhadaa ee Madaxtooyada Somaaliya  kula tukaday dadweyne farabadan.

Madaxweynaha Jamhuuriyadda Federaalka Soomaaliya Mudane Max’ed C/llaahi Farmaajo oo khudbad dher jeediyay salaadii Ciidda kadib ayaa soo hadal qaaday dagaalka ka dhanka ah maleeshiyada Al-Shabaab, isagoo xusay in dhawaan ay labilaabi doono howlgalo hor leh oo gobolada dalka looga sifeynayo Shabaab,madaxweynaha ayaa sidoo kale soo hadal qaaday arrimo ay kamid yihiin dhismaha gudiga adeega garsoorka iyo amhiyadda uu u leeyahya dalka.

Madaxweynaha ayaa gacan qaaday qaar ka mid ah dadweyne farabadan oo uu salaadda ciidda kula tukaday Masjidka Shuhadaa, wuxuuna shacabka Soomaaliyeed mar kale ugu hambalyeeyay munaasabadda cuudul Adxa.

Mudane Max’ed C/llaahi Farmaajo  ayaa ka dalbaday shacabka Soomaaliyeed in ay caawiyaan dadka danyarta ah, ayna la shaqeeyaan dowladda F. S. si loo sugo ammaanka guud ee dalka.

Muqdisho(SONNA) Madaxweynaha Dowlad Goboleedka Jubbaland Mudane Axmed Maxamed Islaam ayaa maanta qaar kamid ah dadweynaha ree Kismaayo kula tukaday Xarunta Madaxtooyada Salaada Ciidul Adxa.

Madaxweyne ku xigeenka koobad Mudane Maxamuud Sayid Aadan xubno katirsan labada gole ee Dowlada iyo dad shacab ah ayaa kamid ahaa dadka uu Madaxweynahu kula tukaday qasriga Madaxtooyada.

Madaxweyne Axmed Maxamed Islaam wuxuu sheegay in Bulshada Soomaaliyeed uu u rajaynayo Nabad iyo Barwaaqo in ay ku gaaran xiligan xiligiisa isagoo ugu baaqay in ay isku naxariistaan oo ay Midooban.

Isagoo ka hadlayay dhibaatada mudada badan ragaadisay wadanka ayuu Madaxweynahu sheegay in wax walba oo dhacay ay dad Soomaali ah masuul ka yihiin loona baahan yahay in aan Allah u noqono oo aan is cafino si dhibku inooga yaraado.

“Waxa kaliyah ee maanta aan dhibka kaga bixi karo waa in aan gacmaha is qabsano oo aan is cafino” ayuu yiri Madaxweyne Axmed Maxamed Islaam

Sidoo kale Madaxweynahu wuxuu ka digay in Soomaalidu ay wakhtigan wajahayso dagaal dhulka la xiriira taas oo qaab qabiil loo adeegsanayo.

“Maalmahan dadka aan qaabilayay waxa ugu badan ee ay isku haystaan waa dhul waxaan dareemayaa in dagaalka inoo dhiman uu dhulka ku salaysnaan doono” ayuu yiri Madaxweynahu.

Hay’adaha Cadaalada ayuu ku booriyay in ay dhameeyaan muranada dhulka la xiriira kahor inta aan lasoo saarin hananka bixinta dhulka oo uu xusay in Xukuumadu ay gacanta ku hayso.

Waxaa kale oo Madaxweynahu sheegay in dadka Madaxda ah looga baahan yahay in masuuliyada ay qaadeen ay dadka ugu cadaalad falaan hadii taas la waayana aysan Dowladnimadu horay u soconaynin.

Madaxweynaha Jamhuuriyadda Federaalka Soomaaliya mudane Maxamed  C/llaahi Farmaajo ayaa saaka salaadda ciidul Adxa Masjidka Shuhadaa ee Madaxtooyada Somaaliya  kula tukaday dadweyne farabadan.

Madaxweynaha Jamhuuriyadda Federaalka Soomaaliya Mudane Max’ed C/llaahi Farmaajo oo khudbad dher jeediyay salaadii Ciidda kadib ayaa soo hadal qaaday dagaalka ka dhanka ah maleeshiyada Al-Shabaab, isagoo xusay in dhawaan ay labilaabi doono howlgalo hor leh oo gobolada dalka looga sifeynayo Shabaab,madaxweynaha ayaa sidoo kale soo hadal qaaday arrimo ay kamid yihiin dhismaha gudiga adeega garsoorka iyo amhiyadda uu u leeyahya dalka.

Madaxweynaha ayaa gacan qaaday qaar ka mid ah dadweyne farabadan oo uu salaadda ciidda kula tukaday Masjidka Isbaheysiga, wuxuuna shacabka Soomaaliyeed mar kale ugu hambalyeeyay munaasabadda cuudul Adxa.

Mudane Max’ed C/llaahi Farmaajo  ayaa ka dalbaday shacabka Soomaaliyeed in ay caawiyaan dadka danyarta ah, ayna la shaqeeyaan dowladda F. S. si loo sugo ammaanka guud ee dalka.