Pyongyang(SONNA)  Xukuumadda Kuuriyada Waqooyi ayaa markii ugu horeesay muddo laba bilood ah kadib waxaay tijaabisay gantaal ballistic ah.

Sida ay sheegayaan  Saraakiisha milateriga ee Kuuriyada koonfured gantaalkani ayaa dul maray bariga dalkaasi, kadib markii laga soo ganay meel u dhaw magaalada Pyongyang.

Xeer dheeriyaad ka faalooda arrimaha dalkaasi ayaa sheegay in Pyongyang ay horumarineyso gantaaladeeda, iyadoo uga gol leh inay ku bartilmaameedsato goobaha fog fog sida dalka Mareykanka,kaasi oo uu khilaaf siyaasadeed kala dhexeeyo.

Wasaarada Gaashaandhigga Mareyakank ee Pentagon ayaa sheegtay in tani ay u muuqato inay tahay gantaalada isaga kala goosha qaaradaha, waxaana la sheegay in gantaalkan ay riday Pyongyang uu socday masaafo dhan Kun kilomitir, kahor inta aanu kusoo dhicin badda Japan.

Pentagon-ka waxaa kale oo ay intaa ku dareen in gantaalkani uusan aheyn mid khatar ku ah xullafada Mareykanka iyo waqooyiga Mareykanka toona.

Madaxweynaha Mareykanka Donald Trump oo ka hadlay tijaabada gantalkan ayaa sheegay in tani ay tahay xaalad la xakameyn karo.

Mareykanka iyo wadamo badan ayaa ka walaacsan tijaabooyinka Gantaalada ee Waqooyiga Kuuriya,iyadoo xukuumadda Waqooyiga Kuuriyana ay ka dhaga adeegeyso baaqa Qaramada Midoobey ee ahaa in ay joojiso Gantaaladaasi.

Muqdisho(SONNA):-Madaxweynaha Jamhuuriyadda Federaalka Soomaaliya, Mudane Maxamed Cabdullaahi Farmaajo ayaa maanta madaxda caalamka kala qeybgaley xafladda caleema saarka Madaxweynaha dalka Kenya Mudane Uhuuro Kenyaata oo ka dhacdey magaalada Nayroobi.

Musaasabaddan oo si heer sare ah loo soo agaasimay ayaa waxaa khudbad ku aaddan hiigsiga, horumarka Kenya iyo xirriika uu dalkaasi laleeyahay waddamada kale ee qaaradda Afrika waxaa ka jeediyay Madaxweye Kenyaata, iyadoo ciidammada kala duwan ee Kenya ay halkaasi ku soo bandhigeen dhoolatus lagu maamusayo caleema saarka.

Xafladda caleema saarka Madaxweyne Kenyaata ayaa ka  dhacdey Garoonka Ciyaaraha ee Kazarani waxaana Madaxdii lagu marti qaaday ka mid ahaa Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo, Madaxweynaha Jamhuuriyadda Jabuuti Mudane Cismaaciil Cumar Geelle, Madaxweynaha dalka Uganda Mudane Yoweri Museveni, Madaxweynaha dalka Botiswana Mudane Ian Khama, Madaxweynaha dalka Rwanda Mudane Paul Kagame, Madaxweynaha dalka Tanzania Mudane John Pombe Magufuli, Madaxweynaha dalka Zambia Mudane Edgar Lungu,Madaxweynaha dalka Namibia Mudane Hage Geingob, Madaxweynaha dalka Togo Mudane Faure Gnassingbé, Ra’iisal wasaaraha dalka Itoobiya Mudane Hailemariam Desalegn iyo hoggaamiyeyaal kale oo Afrika iyo caalamkaba ka socday.

i

Garoowe(SONNA) Wafdi ballaaran oo uu hoggaaminayo Wasiirka Shaqada iyo arrimaha Bulshada xukuumadda Federaalka Soomaaliya  Xildhibaan Saalax Axmed Jaamac  ayaa maanta si weyn loogu soo dhaweeyay magaalada Garowe ee Caasimada Dowlada Goboleedka Puntland,ka dib safar shaqo labo maalmood ah ay ku joogi doonaan Garowe.

Wasiirka Shaqada iyo  Shaqaalaha, Dhalinyarada iyo ciyaaraha puntland Cabdiraxmaan Sheekh Axmed  Cabdullaahi  iyo Masuuliyiin ka tirsan Puntland  iyo Maamulka Gobolka Nugaal   ayaa Wasiir Saalax iyo Wafdiga uu hoggaaminayay kusoo dhaweeyay garoonka diyaaradaha Konoco, wuxuuna soo dhaweyn ka dib  kormeer ku soo maray  Garoonka cusub ee loo dhisaayo Caasimada Garowe, waxuuna warfidiyeenka uu uga waramay ujeedada ay u yimaadeen puntland.

Wuxuu sheegay Wasiir Saalax Axmed jaamac inuu aad ugu farax sanyahay soo dhaweynta diiran ee loo sameeyay

“Aniga oo ku hadlaya magaca wafdiga iyo Wasiirada  kala duwan ee Shaqada iyo Shaqaalaha  Dawlad Goboleeyada, Agaasimaha Guud ee Wasaaradda Shaqada iyo Arrimaha Bulshada oo igu wehliya safarkan  waxaa raali  ka nahay sida aad inoogu soo dhaweyseen magaalada Garowe ee Caasimada Puntland”. Ayuu yiri Wasiir Saalax.

Dhinaca kale Wasiir Saalax ayaa sheegay in berito uu Garowe ka furmi doono (Shirka dib u Eegista iyo ka wadatashiga Sharciga  Shaqaalaha  Rayidka ee L11) oo ay soo diyaarisay  wasaaradda Shaqada iyo Arrimaha Bulshada dawladda Federaalaka Soomaaliyeed.

Koofur Afrika (SONNA), Safaaradda Soomaaliya ay ku leedahay wadanka  Koofur Afrika iyo Jaaliyadda Soomaalida ah ee dalkaasi ku nool, ayaa munaasabad loogu mahad celinayey  dowladda Turkiga taageerada ay siiyaan Soomaaliya ku qabatay magaaladda Pretoria, waxaana  kasoo qeybgalay Safiiradda Turkey iyo Somalia u fadhiya Koofur Afrika iyo Jaaliyadda Soomaaliyeed ee ku nool magaalooyinka wadankaasi.

Jaaliyadda Soomaalida ah, xafladaasi  qudbado kala duwan ka jeediyey,  waxaana ay ka hadleen xiriirka walaahaha Turkiga iyo sida ay Soomaaliya mar walba ula garab taaganyihiin caawinaadda, iyagoo sidoo kale sheegay in Soomaali meel walba ay joogto ay ilaabi doonin abaalkooda.

Safiirka Turkiga u fadhiya K/Afrika, Ambassador Elif Çomoğlu Ülgen oo Xafladda ka hadashay, ayaa sheegtay in ay aad ugu faraxsantahay casha sharaftan ay u sameeyeen Jaaliyadda Soomaalida ah, iyaddoo sheegtay  taasi inay ka dhigantahay walaaltinimada ka dhaxeeysa labada shacab.

“ Waxaan idinkaga mahadcelinayaa si qalbi furan  dhammaan fariimaha aad caawa ina soo gaarsiiseen, waxaa sidoo kale aan ballanqaadayaa in aan gaarsiiin doona shacabka iyo Madaxweynaha dowladda Turiga, waxaan sidoo kale idin ballanqadayaa in mar walba ay walaalaha Turkiga idin garab taaganaan doonaan” ayey tiri Amb Elif Çomoğlu Ülgen.

Sidoo kale Safiirka dowladda Soomaaliya ee Koofur afrika, Danjire Jamal Barrow, ayaa isna dhankiisa sheegay in Turkiga uu mar walba caawinaad la garabtaagan yahay Dowladda iyo shacabka Soomaaliyeed, taasina ay taariikhda qori doonto,waxa uu tusaale u soo qaatay xasuuqii 14 Oktoobar Muqdisho ka dhacay  in dhaawacyadii  ugu badnaa loo qaaday Turkiga.

Muqdisho (SONNA), Shirkaan oo  looga hadlayey ka hortaga fikirka xagjirka ah, ayaa waxaa si wadajir ah u shir guddoomiyey Wasiirka wasaaradda warfaafinta, dhaqanka iyo dalxiiska Xukuumada federaalka ah ee  Soomaaliya, mudane C/raxmaan Cumar yariisoow iyo Safiirka Dowladda Sweden ee Soomaaliya, Danjire Andreas Von Uexkull.

waxaa ka qeyb galay shirkaasi wasiiro ka tirsan xukuumadda Soomaaliya, qaar kamid ah Safiiradda wadamada caalimka u jooga Soomaaliya , wakiilo caalami ah  iyo  xubno matalayey maamul gobaleeyadda Dalka ka jira.

Wasiirka wasaaradda warfaafinta, dhaqanka iyo dalxiiska Xukuumada federaalka ah ee  Soomaaliya, mudane C/raxmaan Cumar yariisoow, ayaa shirkaasi markii uu soo idlaaday kadib warbaahinta Qaranka la wadaagay qodobadii kulanka lagu go’aamiyey.

“Shirkii muhiimka ahaa ee la dagaalanka fikirka xagjirka ah, ayaa maanta qabsoomay oo aan uga hadleynay siddii shirka 4 December uga dhacaya Muqdisho warbixin looga siin lahaa howlaha ka qabsoomay, waxaa shirkaan lagu go’aamiyey istiraatiijiyadii oo dib u eegis lagu sameeyey ee heerka Qaran oo la ansixiyey, sidoo kale qorshe howleedkii lixda billood la qaban lahaa ee la diyaariyey ee la hordhigi lahaa shirka 4 December ayaa la diyaariyey, marka runtii shaqo wanaagsan ayey maanta aheyd, waxaan aad ugu mahad celinayaa Hay’addaha Dowladda Soomaaliya, beesha caalamka iyo dhammaan xubnihii dowlad goboleedyada ka socday, tanna waxay ku timid dadaal muddo soo socday” ayuu yiri Wasiir Eng Yariisoow

Muqdisho (SONNA) Guddiga Difaaca Baarlamaanka Soomaaliya ayaa Maanta booqday Saldhiga Dowlada Turkiga ee Magaalada Muqdisho, halkaas uu ka socdo tababar tayo sare leh oo la siinayo ciidamo gaaraya 400 oo isugu jira Saraakiil, Saraakiil xigeen iyo ciidamo.

Guddoomiyaha Guddiga Difaaca Baarlamaanka Soomaaliya Xuseen Carab Ciise ayaa kulan la qaatay Saraakiisha Dowlada Turkiga ee Tababarka bixineyso, isagoo ka dhageystay Warbixin ku saabsan habka Tababarka uu socdo.

Xuseen Carab Ciise ayaa la hadlay Ciidamada Tababarka uu u socdo, isagoo ku dhiiri galiyay inay ka faa’iideystaan Tababarkan heerkiisu uu sareeyo, maadaama ay yihiin geesiyada difaaci doona dalka, lana dagaalami doono cadowga umadda Soomaaliyeed ee Al shabaab.

Sidoo kale Guddoomiyaha Guddiga Difaaca ayaa kulan gaar ah la qaatay Saraakiil Soomaali oo ka mid ah Macalimiinta bixineysa Tababarka, waxayna warbixin dhinacyo badan taabaneysa ka siiyaan sida tababarka u socdo, dhinkiisa Guddoomiyaha wuxuu u sheegay Saraakiisha in howl wanaagsan ay u hayaan Qaranka Soomaaliya lagana doonayo in ciidamada ay si joogta ugu bogaadiyeen si Wadaniyad iyo dal jaceyl ku jiro inay u qaataan tababarka, isagoo sheegay in tababarka ciidamada la mideyn doono si loo helo ciidamo Tababar isku mid ah qaba..

Guddiga Difaaca Baarlamaanka ayaa gaba gabadii mid mid u kormeeray qeybaha Cuntada, Jiifka, Tababarka iyo Fasalada ay ku wax ku bartaan ciidamada.

Muqdisho (SONNA) Wafdi uu hoggaaminayo Guddoomiyaha golaha Wakiilada qaranka ee Jamhuuriyadda Jabuuti oo maalmahan booqasho rasmi ah ku joogay dalka ayaa maanta dib ugu laabtay wadanka Jamhuuriyadda Jabuuti.

Wafdiga ayaa waxaa garoonka diyaaradaha caalamaiga ah ee Aadan Cadde  kusii sagootiyay kusimaha madaxweynaha Jamhuuriyadda Soomaaliya ahna Guddoomiyaha golaha shacabka Mudane Maxamed Sheekh Cusmaan Jawaari,Guddoomiye kuxigeenka koowaad ee golaha shacabka Mudane C/wali Sheekh Ibraahim Muudey iyo sidoo kale xildhibaano ka tirsan Baarlamaanka dalka.

Ka hor inta aysan wafdigan ka ambabixin garoonka diyaaradaha ee Magaaladda muqdisho ayaa waxa ay la hadleen Warbaahinta ,waxaana Guddoomiyaha Golaha Wakiilada qaranka ee Jamhuuriyadda Jabuuti Mudane Maxamed Cali Xumad uu sheegay inuu ku faraxsanyahay soo dhaweynta ay u sameeyeen shacabka Soomaaliyeed iyo Madaxdooda isagoo sheegay in mudadii dalka ay joogeen ay Arkeen horumarka dowladnimo oo uu dalka ku talaabsanaayo.

Kusimaha Madaxweynaha ahna Guddoomiyaha golaha shacabka Mudane Maxamed Sheekh Cusmaan Jawaari ayaa u sheegay wafdigan in dalka Soomaaliya uu yahay wadankooda oo aysan marti ku aheyn islamarkaana wada shaqeynta walaaltinimada ku dhisan ee labada baarlamaan ay mar walba joogto ahaan doonto.

Wafdigan oo todobaadkii lasoo dhaafay booqasho rasmi ah dalka kuu joogay ayaa intii ay joogeen kulamo la qaatay madaxda dalka iyagoo shalay heshiis iskaashi la saxiixday Labada Aqal ee Baarlamaanka Dalka.

Muqdisho(SONNA) Kadib markii maanta uu soo gaaray magaalada Muqdisho Wafddi ka socda Dowladda Qadar ayaa waxaa ay kulamo la yeesheen Wasiiro katirsan Dowladda Soomaaliya oo ay la saxiixdeen heshiis ku saabsan hirgelinta mashaariic horumarineed,iyadoo uu goob joog ka ahaa Ra’iisul Wasaarah Soomaaliya Mudane Xasan Cali Khayre.

Heshiiskan oo ku kacaya lacag dhan 2 boqol oo milyen oo dollar ayaa Soomaaliya u saxiixay Wasiirka qorsheynta Xukuumadda Federaalka Soomaaliya  halka dowladda Qadarna uu u saxiixay madaxa sanduuqa horumarinta ee dalkaasi.

Mudane Jamaal Maxamed Xasan Wasiirka Qorsheynta iyo horumarinta iyo maalgashiga Caalamiga ah ee Xukuumadda Federaalka Soomaaliya oo u hadlay Dowladda Soomaaliya ayaa ka mahadceliyay taageeradan ay dowladda Qadar u fidinayso shacabka Soomaaliyeed.

Mashruucani horumarinta ayaa waxaa qeyb ka ah dhismaha Waddooyinka ka baxa Muqdisho ee aada magaalooyinka Afgooye iyo Jowhar ee Gobolada SHabeelada Dhexe iyo Shabeelada Hoose.

Wafdiga ka socday Dowladda Qadar ayaa sheegay  in ay qeyb ka qaadan doonaan shaqo abuurka dhallinyarada,sidoo kale dhismayaasha Waddooyinka ayey sheegeen in ay shaqo badan ka heli doonaan Dhallinyarada Soomaaliyeed.

Sidoo kale Wafdiga ayaa sheegay in lacagtaasi lagu bixinayo mashaariic lagu horumarinayo Soomaaliya, kaas oo uu bixinayo Sanduqa  Caalamiga ah ee horumarinta Dalka Qadar.

Muqdisho(SONNA)–Maamulka Gobolka Banaadir ayaa xalay Casha sharaf u sameeyay Guddoomiyaha Barlamanka Dalka Jabuuti.

Casho sharaftaasi ayaa waxaa goob joog ka ahaa k/simaha Madaxweynaha Dalka ahna Guddoomiyaha Barlamaanka Soomaaliya mudane Maxamed Shiikh Cusmaan Jawaari, Guddoomiye ku xigeeenka 1aad ee Barlamaanka Soomaaliya, Xildhibaanada 2-da aqal, Wasiiro, Guddoomiyayaasha Degmooyinka gobolka Banaadir iyo marti sharaf kale.

Munaasabadaasi oo si qurux badan u dhacday ayaa waxaa halkaasi ka hadlay Guddoomiyaha Gobolka Banaadir Thaabit Cabdi Maxamed, isagoo sheegay in wax badan ay ka dhaxeeyaan labada wadan iyo labada Shacab, wuxuuna guddoonsiiyay hadiyad Guddoomiyaha Barlamaanka Dalka Jabuuti.