Search
Subscribe
Home Blog Page 1276

Itoobiya oo qaadday xukunkii deg-degga ahaa

Yoonis Duraan
-
0
Itoobiya oo qaadday xukunkii deg-degga ahaa

Dowladda Itoobiya ayaa Shalay si rasmi ah u qaadday xukunkii deg-degga ahaa ee Dalkaasi lagu soo rogay horraantii Sanadkan, sida ay sheegtay Wakaaladda Wararka Itoobiya ee ENA.

Baarlamanka Dalka Itoobiya ayaa sidoo kale ansixiyay go’aankii Golaha Wasiirrada ay dhawaan soo saareen, iyagoo ka duulaya baaqii uu Bishii April soo jeediyay Ra’iisul wasaare  Abiy Axmed Cali, ee ahaa inay soo laabteen amnigii iyo kala dambayntii Dalka, lana qaado xaaladda deg-degga ah.

Afar Cisho ka hor ayay Golaha Wasiirrada Dalka Itoobiya isku raaceen in la qaado xaaladda deg-degga ah ee uu Ra’iisul wasaarihii hore Hailemariam Desalegn, kusoo rogay 15-kii February ee Sanadkan, ka dib Hal Sana oo uu Dalkaasi galay qalaanqal

Wasiirka Warfaafinta iyo ku xigeenkiisa oo la kulmay shaqaalaha

Yoonis Duraan
-
0
Wasiirka Warfaafinta iyo ku xigeenkiisa oo la kulmay shaqaalaha

Wasiirka cusub ee wasaaradda Warfaafinta ee xukuumadda Mudane Daahir Maxamuud Geelle  iyo wasiir ku xigeenka Wasaaradda Warfaafinta Mudane Aadan Isaaq ayaa Maanta kulan la qaatay Shaqaalaha wasaaradda Warfaafinta dhaqanka iyo dalxiiska.

Kulankaan oo ahaa mid isbarasho ah oo shaqaalaha Wasaaradda Warfaafinta iyo Madaxda cusub ay isku baranayeen ayaa ugu horayn waxaa ka hadlay Agaasimaha waaxda Shaqaalaha iyo Tababarrada Mudane C/rixiin Ciise Caddoow, isagoo wasiiradda u sharraxay tirada shaqaalaha wasaaradda iyo waaxyaha kala duwan oo ay ka shaqeeyaan.

Wasiirka ku xigeenka wasaaradda Mudane Aadan Isaaq ayaa uga mahadceliyey shaqaalaha soo dhoweynta diirran ee ay u sameeyeen iyo howsha culus oo ay u haayaan Dalka iyo Dadka Soomaaliyeed.

Mudane Daahir Maxamuud Geelle, Wasiirka Wasaaradda Warfaafinta ayaa sheegay in wasaaraddu ay ku shaqayn doonto  Laba Tiir oo udub dhexaad u ah guusha Qarannimada Soomaaliya.

“Labada arrimmood ee aan xoogga saari doonnaa ayaa kala ah sidii aan uga shaqeyn lahayn nabaddeynta iyo kor u qaadidda aragtida dowaldda ee nabad ku wada noolaanshaha dalka, halka Tiirka labaadna uu yahay in ay is akhbalaan bulshada Soomaaliyeed, taas oo fure weyn u ah mideynta shacabka Jamhuuriyadda”, ayuu yiri wasiirka warfaafinta.

Shaqaalaha ayaa lagula dardaarmay in ay dhowraan ammaannada ay Qaranka u hayaan, isla markaana  hoggaanka cusub ee wasaaradda uu la imaan doonaan isla xisaabtan ku saleysan caddaalad iyo hufnaan.

Ugu dambeyn wasiirka oo ay su’aallo weydiiyeen qaar ka mid ah shaqaalaha ayaa ballan-qaaday in ay u istaagi doonaan sidii loo horumarinta lahaa Warbaahinta, kaabeyaasha wasaaradda farriinta shaqaalahana uu gaarsiin doonnaa madaxda sare ee Dalka.

         

Shir looga hadalyay mashaariicda Dalka oo Muqdisho lagu qabtay

Yoonis Duraan
-
0
Shir looga hadalyay mashaariicda Dalka oo Muqdisho lagu qabtay

Ra’iisul Wasaare ku xigeenka Dalka mudane Mahdi Maxamed Guuleed ayaa maanta shir gudoomiyay shir looga hadlayo Mashaariicyada horumarineed ee Dalka laga fuliyo iyo u diyaar garowga shirka ka dhici doona Magaalada Brussels ee cariga Belgium-ka Bishan dhammaadkeeda, kaasi oo lagu qabtay Magaalada Muqdisho.

Shirkan Waxaana ka qeyb-galaya qaar ka mid Golaha Wasiiradda Xukuumadda Federaalka Soomaaliya, Madax ka socota Maamul-Gobolleedyada iyo Beesha Caalamka.

Shirka Waxyaabaha sida weyn looga hadlayo ayaa waxaa ka mid ah muhiimada ay u leeadahay Mashaariicda hormaruneed ee hadda laga wado dalka iyo qorshayaasha lala hortagi lahaa Shirka looga hadlayo Arrimaha Soomaaliya ee ka dhacaya Dalka Belgium-ka inta u dhaxeysa, 25—26 bishan June 2018-ka.

Xukuumadda Soomaalia ayaa dhawaanahaanba dadaal iyo diyaargarow ugu jirtay qaabkii iyo qorshayaashii lala hortagi lahaa shirka loo asteeyay inuu ka dhaco Magaalada Brussels ee Dalka Belgium-ka inta u dhaxeeysa 25 ilaa iyo 26-ka Juun ee sanadkan, kasoo looga hadli doono arrimaha Soomaaliya, waxaana ka qeybgali doona Wufuud ka kala socota Xukuumadda Soomaaliya, Maamul-goboleedyada Dalka iyo Xubno ka kala socda Beesha Caalamka.

Dibad baxayaal ku tilmaamay Netanyahu “Dembiile dagaal” xilli uu Socdaal ku tagay Paris

SNTV
-
0
Dibad baxayaal ku tilmaamay Netanyahu “Dembiile dagaal” xilli uu Socdaal ku tagay Paris

Dibad baxayaasha careysan oo isagu soo baxay waddooyinka magaalada Paris ee caasimadda Faransiiska ayaa ku baaqayay in Ra’iisul wasaare Netanyahu loo aqoonsado dembiile dagaal.

Carada ka dhanka ah siyaasadaha Israa’iil ayaa cirka isku sii shareeraya xilliga booqashada Netanyahu ee uu ku tagay dalka Faransiiska.

Booqashada R/wasaaraha Israa’iil Benjamin Netanyahu ayaa waxaa soo wajahday dhaleeceeyn uga timid tiro badan oo mudaaharaadayaal ah kuwaasi oo ku baaqayay in loo aqoonsado dembiile dagaal kadib markii uu Netanyahu booqashadiisa oo loogu magac-daray socdaalka caasimadaha Yurub, taasi oo uu ku gaaray magaalada Paris.

“Waxaan halkan u joognaa inaan xasuusino Netanyahu iyo dunida daraasiinta falastiiniyiinta ee aanan hubeysnayn kuwaasi oo ay dileen ciidamada Israa’iil bishii lasoo dhaafay,” sidaasi waxaa yiri Antoine oo ah arday 19 jir ah.

Ujeedada booqashada rasmiga ah ee Netanyahu ayaa waxa ay tahay in uu madaxweynaha faransiiska Emmanuel Macron uu taageero ugu helo arrinta Iiran iyo sidoo kale in la billaabo mashruuca dhinaca cilmi sayniska iyo dhaqanka ee u dhaxeeya Faransiiska iyo Israa’iil.

Dibad baxyaasha ayaa waddooyinka ka muujiyay sidii in ay xoogga saaraan sida ay Israa’iil ula dhaqanto dadka Falastiin iyo talaabooyinka howlgalada ay ciidamada Israa’iil ka fulliyeen xadka marinka Qaza.

Sawir uu ka muuqdo wiil 21-sano jir oo katirsanaa kooxda caafimaadka Falastiin kaasi oo uu toogasho ku dilay askari Israa’iili ah 1-dii bishan June ayaa astaan looga dhigay halku-dhigyada ay wateen dibadbaxayaasha  iyadoo lagu qoray “Israa’iil waa dilaa, Macron waa gacansiiye”.

WAR-MURTIYEEDKA GOLAHA AMNIGA QARANKA

SNTV
-
0
WAR-MURTIYEEDKA GOLAHA AMNIGA QARANKA

Baydhabo (SNTV)- Golaha Amniga Qaranka ayaa kulankoodii joogtada ahaa ku yeeshay magaalada Baydhabo, 3-5 Juun 2018. Shirkaas oo ka dhacay Xarunta Madaxtooyada, Koonfur Galbeed ee Baydhabo waxaa looga hadlay arrimaha Amniga Qaranka, waxaana shir-guddoomiyey Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo.

Waxaa sidoo kale, shirka ka soo qeyb galay Raiisul Wasaaraha Xukuumadda Federaalka Soomaaliya Mudane Xasan Cali Khayre, Madaxweynaha Puntland Mudane Cabdiweli Maxamed Cali Gaas, Madaxweynaha Jubaland Mudane Axmed Maxamed Islaam, Madaxweynaha Koonfur-Galbeed Mudane Shariif Xasan Sheekh Aadan, Madaxweynaha Galmudug Mudane Axmed Ducaale Geelle Xaaf, Madaxweynaha Hirshabelle Mudane Maxamed Cabdi Waare, Guddoomiyaha Gobolka Benaadir ahna Duqa magaalada Muqdisho, Mudane Cabdiraxmaan Cumar Cusmaan (Eng. Yariisow), Wasiirka 1aad ee Galmudug Sheekh Maxamed Shaakir Cali Xasan, Wasiirka Arrimaha Gudaha, Federaalka iyo Dib-u-heshiisiinta, Wasiirka Amniga Gudaha, Wasiirka Difaaca, La-taliyaha Amniga Qaranka, wasiirada dawlad goboleedyada, iyo Taliyeyaasha Ciidamada Qalabka sida.
Goluhu wuxuu u mahadcelinayaa Madaxweynaha Koonfur Galbeed Mudane Shariif Xasan Sheekh Aadan iyo dhammaan shacabka Koonfur Galbeed oo si habsami leh u marti galiyay shirka. Goluhu wuxuu sidoo kale u mahad celinayaa ciidamada amniga Konfur Galbeed, XDS iyo AMISOM.

1. Arrimaha Amniga:

Goluhu markii uu dhageystay talooyinka ay soo jeediyeen Guddiga Farsamada ee Amniga Qaranka, tix-galiyeenna aragtiyada iyo talooyinka ku saabsan amniga dalka, Goluhu wuxuu isku raacay qodobada hoos ku xusan:

1.1. Madax-bannaanida: Golaha Amniga Qaranku wuxuu adkeynayaa in midnimada, wadajirka iyo madax bannaanida Soomaaliya ay tahay mid lama taabtaan ah.

1.2. Ka hortagga khataraha: Golaha Amniga Qaranka markii uu dhegeystay khataraha amni ee ay argagixisadu ka geysanayaan dalka waxa uu adkeynayaa in la dardargeliyo qalabeynta iyo tayeynta ciidamada qalabka sida, labada heer, lana siiyo tababarro iyo xirfado la xiriira qaababka looga hortagi karo falalka argagixisada.

1.3. Qorshaha Kala-guurka: Golaha Amniga Qaranka wuxuu ansixyey qorshaha kala-guurka (Transition plan), kaasoo loo arkay inuu yahay qorshe horseedaya in Soomaalidu hanato, kuna filnaato amnigeeda, iyada oo la raacayo tallaabooyinka soo socda;

1.3.1. In si wadajir ah looga mira dhaliyo fulinta wejiga koowaad ee qorshaha kala guurka oo dhigaya qaabka lagu hawlgalinayo Ciidamada Xoogga Dalka Soomaaliyeed iyo ciidamada Booliiska ee labada heer oo ay ka mid yihiin Daraawiishtu.

1.3.2. In ciidamo ka tirsan Daraawiishta Koonfur Galbeed ay qeyb noqonayaan hawlgallada qorsheysan ee lagu furayo waddada muhiimka ah (MSR) ee isku xirta Muqdisho iyo Baydhabo. Hawlgalkan waxaa doorka hoggaamineed qaadanaya Guddiga Amniga ee Koonfur Galbeed, waxayna ciidamada ka amar qaadanayaan Taliska Ciidamada Xoogga Dalka inta hawlgalkaas lagu jiro.

1.3.3. In Guddiga Qaran ee Isku-dhafka Ciidamada la yimaadaan muddo soddon (30) maalmood guduhood ah qorshe hawleedkooda.

1.3.4. In qorshaha kala guurku uu noqdo mid dhammeystiran oo ay ka mid yihiin dadaallada xasilinta, soo kabashada dhaqaalaha, sarreynta sharciga iyo caddaaladda.

1.4. Dhameystirka Qaab-dhismeedka Amniga: Goluhu waxa uu ansixiyay in muddo soddon (30) maalmood gudahood ah lagu hawlgeliyo Xafiisyada Aminga Dowlad-goboleedyada iyo Gobolka Banaadir, si loo dardargeliyo in Golaha Amniga Dowlad-goboleedyada iyo Gobolka Benaadir ay noqdaan kuwo waajibaadkooda shaqo gutaan.

1.5. Goluhu wuxuu isku raacay in muddo lixdan (60) maalmood gudahood ah guddiga farsamadu ay ku fuliyaan Qodobka 1.2 ee go’aankii 6-10ka bishii Febraayo 2018, kasoo qeexaya “Dawladda Federaalku waxay ka caawineysaa ciidamada Booliiska Dawlad-goboleedyada, oo ay ku jiraan Daraawiishtu (hub, saanad, agab ciidan, raashin, daawo, gunno, tababar iyo tayeyn) ee kala qeyb qaadan doona ciidanka Xoogga Dalka Soomaaliyeed hawlgallada lagula dagaallamayo argagixisada.”Goluhu wuxuu ku boorrinayaa ummada Soomaaliyeed in ay u midoobaan la-dagaalanka argagixisada.

1.6. Goluhu wuxuu isla qaatay in Galmudug iyo Puntland, oo aysan joogin ciidamada AMISOM, laga caawiyo hawlgallada ka dhanka ah argagixisada Al Shabaab iyo Daacish oo ku sugan Buuraha Galgala, deegaannada Bariga Fog iyo Koonfurta Galmudug, lagana taakuleeyo saddexda qaybood ee qorshaha kala guurka.

1.7. Goluhu wuxuu soo dhoweeyay isbeddellada wax ku oolka ah ee laga wado CXDS oo ay kamid yihin sida qaab-dhismeedka ciidanka, mideynta tababarka iyo hagaajinta anshaxa iyo adaabta ciidanka iyo sidookale qaabaynta hannaanka dallacsiinta saraakiisha iyo saraakiil xigeennada oo la waafajiyey sharciga dallacsiinta.

1.8. Goluhu wuxuu farayaa Guddiga Dib-u-habeynta Booliiska Federaalka ee hoos yimaada Wasaaradda Amniga Gudaha in ay kusoo dhameystiraan qaabka dib-u-habeynta Booliiska Federaalka muddo sagaashan (90) maalmood gudahood ah.

1.9. Goluhu wuxuu bogaadinayaa hawlgallada sugidda amniga Caasimadda iyo barnaamijka Derisaynta ee ka socda degmooyinka Gobolka Benaadir, wuxuuna qirayaa in degaanada ku dhow Caasimadda ee Shabeellaha Dhexe iyo Shabeellaha Hoose ay qeyb muhiim ah ka yihiin sugidda amniga Caasimadda.

2. Arrimaha Siyaasadda

Goluhu waxaa kale oo uu falanqeeyay qodobada soo socda:

¢ Habka Doorasho ee Jamhuuriyadda Federaalka Soomaaliya 2020-ka.
¢ Wadaagga Kheyraadka Dabiiciga ah (Shidaalka iyo Macdanta).

2.1. Goluhu wuxuu bogaadinayaa waxqabadka Guddiga Wada-xaajoodka iyo Wasaaradaha ka shaqeeya Tubta Siyaasadda Loo Dhanyahay.

2.2. Goluhu wuxuu bogaadiyay horumarka laga sameeyay hawlaha la xiriira dib-ula-falgelidda hay’adaha dhaqaalaha adduunka, gaar ahaan wada shaqeynta ay Xukuumaddu la leedahay Hay’adda Lacagta Adduunka (IMF) iyo Bangiga Adduunka (World Bank) oo uu Goluhu dhiirrigelinayo in lasii adkeeyo wada shaqeyntaas, si wadajir ahna loola dagaallamo musuqmaasuqa, lana joogteeyo nidaamka isla-xisaabtanka.

2.3. Goluhu wuxuu go’aamiyay in si deg deg ah loo mideeyo canshuuraha dalka, sida canshuurta Furdooyinka, macaashka shaqaalaha iyo faa’iidadda ganacsiga.

2.4. Goluhu wuxuu ku heshiiyay in dalka laga hirgaliyo doorasho qof iyo cod ah sanadka 2020 sida ku cad heshiiska habka doorasho ee lagu saxiixay magaalada Baydhabo 5ta bisha Juun, 2018.

2.5. Goluhu wuxuu soo dhaweeyey isla markaasna bogaadiyey horumarka laga sameeyey wadatashiyada caqabadaha ka hor imaan kara doorashooyinka, iyo daraasaadka Diiwaangalinta Cod-bixiyeyaasha. Wuxuuna Goluhu faray in Guddiga Madaxa bannaan ee Doorashooyinku soo dhammaystiraan kala xulashada nidaamka diiwaan galinta.

2.6. Goluhu wuxuu isla qaatay in hawlaha dib-u-eegista Dastuurka la sii dardar-galiyo, laguna soo gabagabeeyo sannadka 2018-ka, ayada oo qodabadda dib-u-eegista loo kala hormarinayo sida ay u kala muhiimsan yihiin.

2.7. Goluhu wuxuu heshiis ka gaaray Lahaanshaha, Maamulka, iyo Wadaaga Khayraadka Dabiiciga ah ee dalka sida ku cad heshiiska Wadaaga Khayraadka Dabiiciga ah ee lagu saxiixay Magaalada Baydhabo 5ta bisha Juun 2018.

2.8. Goluhu wuxuu faray Guddiga Farsamada (TC) ee Golaha Amniga Qaranka in ay soo gudbiyaan Hannaanka Caddaalada iyo Asluubta shirka xiga ee la qabanayo bisha Agoosto iyadoo laga amba qaadayo go’aamadii shirkii Wasaaradaha Cadaaladda ee ka dhacay magaalada Jowhar bisha Jannaayo 2018.

2.9. Goluhu wuxuu go’aamiyay in la hawlgaliyo xubnihii ay dawlad gobaleedyadu u soo magacaabeen guddiyada dib uu eegista dastuurka.

2.10. Goluhu wuxuu go’aamiyay in la dardar geliyo wadaxaajoodka arrimaha federaalka si loo dhamaystiro hannaanka awood qaybsiga ee ku qeexan Qodobada 53-54 ee Dastuurka.

2.11. Goluhu wuxuu soo dhaweynayaa hindisaha lagu abuurayo Golaha Dhaqaalaha Qaranka.

Goluhu wuxu si wadajir ah tacsi tiiraanyo leh ugu dirayaa Xildhibaannadii iyo dhammaan dadkii ku geeriyooday weerarradii xaqdarrada ahaa ee ka dhacay Degamada Balcad ee Gobolka Shabeellaha Dhexe.

DHAMMAAD

Kim iyo Trump oo kulankooda lagu qaban doono Jasiiradda Sentosa 12-June

SNTV
-
0
Kim iyo Trump oo kulankooda lagu qaban doono Jasiiradda Sentosa 12-June

Kulankani oo si aad ah loo wada sugayo ayaa lagu wadaa in ay yeeshaan labada hogaamiye ee dalalka Mareykanka iyo Kuuriyada Waqooyi Kim Jong-un iyo Donald Trump.

Shirkan oo lagu tilmaamay shir madaxeed ayaa si hordhac waxaa la shaaciyay in lagu qaban doono dhismo hotel oo kuyaala deegaanka jasiiradda Sentosa oo kutaala dalka Singapore, sida uu sheegay Aqalka cad ee dalka Mareykanka.

Shir madaxeedka labada hogaamiye ayaa daaha laga rogay inuu yahay kii koowaad ee noociisa ah oo ay yeeshaan labada madaxweyne ee Kim John-Un iyo Donald Trump oo haatan xilka haya.

Shirka labada madaxweyne oo la tilmaamay inuu qabsoomo abaara 12- bishan Juune ee sanadkan 2018-ka ayaanan weli la helin xogta rasmiga ah ee la halmaasha sida ay wax ku billaaban doonaan oo xagga wadahadalada ah.

Donald Trump ayaa shaaca ka qaaday talaaladii lasoo dhaafay in ay si wanaagsan u socdaan.

Madaxweynaha dalka Mareykanka ayaa sheegay in ay jiraan wada xiriir ka dhaxeeya labada dhinac oo kusaabsan wadahadallada, Trum ayaa sheegay in ay muhiimad gaar ah ay leeyihiin wadahadallada.

Balse jasiiraddaas ayaa sidoo kale taariikh u leh, burcad badeed, dhiig ku daata iyo dagaal.

Jasiiradda Sentosa ayaa ah jasiiradaha fac weyn oo ku caan baxday taariikho isagu jira dagaal iyo falalka burcad badeedka oo waa soo maray, waxa ay ka kooban tahay lixdan iyo saddex, waxaana jasiiradda bad ahaan lagu qiyaasay shan boqol oo hektar, halkaasi oo uu dhaqaale badan kasoo galo dalka Singapore sababta oo ah dalxiiska ayaa u raaxo taga maxaayeelay waxa ay leedahahay doomo loo adeegsado siyaabo kala gedisan waxaana sidoo kale kuyaala meelo lagu cayaaro cayaaraha Golf-ka.

Xoghayaha Aqalka Cad ugu qaabilsan dhinaca xiriirka saxaafadda Sarah Sanders ayaa boggeeda Twitter-ka kusoo qortay in shirka uu ka dhici doono dhismaha hoteelka oo lagu magacaabo Capella.

Qaraxyo Foolkaano horleh oo hakad-geliyay howsha baadi goobka Guatemala iyo 192-qof oo lala’yahay

SNTV
-
0
Qaraxyo Foolkaano horleh oo hakad-geliyay howsha baadi goobka Guatemala iyo 192-qof oo lala’yahay

Ugu yaraan 192 qof ayaa la la’yahay iyadoo kumanaano kun oo qof ay ka barakaceen xilli howshii baadi goobka ay gebi ahaanba istaagtay markii ay billaabmeen qaraxyo foolkaano horleh oo ka dillaacday Guatemala.

Saraakiisha dalka Guatemala ayaa sheegay in ugu yaraan 192 qof lagu la’yahay 75 qofna ay ku geeriyoodeen kadib markii uu qarax foolkaano oo loogu magac daray Fuego ay ku dhufatay dalka Guatemala maalintii axaddii ee lasoo dhaafay.

Khasaaraha foolkaanada ayaa sidoo kale saameeyn kuyeeshay deegaannada kuyaala dhulalka sare kuwaasi oo gebi ahaanba la sheegay in la arki waayay kadib markii ay isu bedeleen dhoobo dambas, folkaanada kadhashay.

Shaqaalaha samatabixinta ayaa gawlgab noqday talaadadii kadib markii ay foolkaano horleh ka qaraxday halkaasi, taas oo cirka ku shareertay uuro iyo sidoo kale dhagxaan dhalaalay kuwaas oo kusoo hoobanayey meelaha ay foolkaandu ka qaraxday.

Dad ka badan 1.7 million oo qof ayaa la sheegay in ay waxyeelaysay, halka in ka badan 3,000 laga daadgureeyay.

Khuburo ku xeel dheer foolkaanooyinka ayaa shaaciyay in foolkaanada ay gaarayso 10-KM oo dhinaca hawada ah taasi oo lama filaan ku noqotay dadka dalka Guatemala.

Kismaayo oo ku biirtay wareegga 3-aad ee tartan aqooneedka

SNTV
-
0
Kismaayo oo ku biirtay wareegga 3-aad ee tartan aqooneedka

 

Muqdisho (SNTV)- Habeenkan caawa ah waxaa ku wada ballansanaa tartan aqooneedka bisha Ramadan degmooyinka xeebaha dhaca Xamar-weyne & Kismaayo  oo ka kala tirsan goballada Benaadir & Jubbada-Hoose.

Tartameyaasha Degmada Xamar-weyne ee Gobolka Banaadir waxaa la weydiiyey 7- Su’aal, waxa ay ka jawaabeen Labo su’aal,  mana jirin wax ka faa’iideysi ah oo ay heleen, wadarta guud ee dhibcaha tartameyaasha Degmada Xamar-weyne ay heleen waxay noqotay 4- dhibcood.

Tartamayaasha Degmada Kismaayo ee Gobolka Jubbada Hoose waxaa dhankooda la weydiiyay 7- su’aal, waxa ay ka jawaabeen afar  su’aal, mana jirin wax su’aal oo ay ka faa’ideysteen, wadarta guud ee dhibcaha ay heleen tartameyaasha Degmada Kismaayo waxay noqotay  8-dhibcood.

Tartamayaasha Degmada Kismaayo ee Gobolka Jubbada Hoose ayaa caawa u soo gudbay wareegga saddexaad ee tartanka, halka tartamayaasha Degamda Xamar weyne ay ku biirtay degmooyinka ku haray wareegga 2-aad.

Tartanka ay tabineyso warbaahinta Qaranka isla markaana uu taaba gelinayo maamulka gobalka Benadir waxaa habeen dambe  foodda is dari doono, tartamaayasha degmooyinka Boosaaso & Deyniile oo ka kala tirsan Gobollada Bari iyo Banaadir, waana habeenka ugu dambeeyo  wareegga labaad ee tartanka.

Guddoomiyaha Gobolka Banaadir oo Booqday Qaar kamid ah Xarumaha Maamulka Koonfur Galbeed ee Baydhabo

SNTV
-
0
Guddoomiyaha Gobolka Banaadir oo Booqday Qaar kamid ah Xarumaha Maamulka Koonfur Galbeed ee Baydhabo

Baydhabo(SNTV):-– Duqa Muqdisho ahna Guddoomiyaha Gobolka Banaadir Mudane Cabdiraxmaan Cumar Cusmaan (Eng. Yarisow) oo maalmihii u danbeeyey ku sugnaa magaalada Baydhabo, halkaas oo ka dhacayo shirka Amniga Qaranka ayaa kormeer ku tagay qaar kamid ah Xarumaha Maamulka Koonfur Galbeed ee magaalada Baydhabo.

Guddoomiyaha Gobolka Banaadir oo weheliyo Wasiirka Warfaafinta ee Maamulka Koonfur Galbeed ayaa ugu horeyn booqday xarunta Wasaaradda Warfaafinta, iyagoo sidoo kale kormeeray Xarunta Warbaahinta Maamulka.

Wasiirka Warfaafinta iyo wacy-galinta Bulshadda Koonfur Galbeed Soomaaliya Ugaas Xasan Cabdi Maxamed ayaa uga mahadceliyey Guddoomiyaha kormeer uu ugu yimid, waxuna sheegay in hadda oo uu yahay Guddoomiyaha Gobolla Banaadir iyo waqtigii uu joogay Wasaaradda Warfaafinta Soomaaliyaba uu saaxiib dhow la ahaa warbaahinta qeybaheeda kala duwan.

Mudane Eng. Yarisow ayaa dhankiisa ku boggaadiyey Wasiirka iyo shaqaalaha Warfaafinta ee Koonfur Galbeed shaqooyinka muhiimka ah ee u hayaan shacabkooda, isagoo xusay in xili walba uu diyaar u yahay gacan siinta Warbaahinta oo laf-dhabar u ah isku xirka iyo horumarinta bulshada.

Dhinaca kale, Duqa Muqdisho Mudane Cabdiraxmaan Cumar Cusmaan aya kulan gaar ah la qaatay Madax Dhaqameedka magaalada Baydhabo ee Maamulka Koonfur Galbeed, waxana ujeedka kulanku ahaa sidii bulshooyinka ku dhaqanka Caasimadda Soomaaliya iyo kuwa Maamulka Koonfur Galbeed ay iskugu xirmi lahaayeen si la iskaga kaashado horumarka iyo wacyigelinta Bulshada maadaama labada Maamul deegaanadoodu isku xiran yihiin.

Taliyaha Ciidanka Booliska Soomaaliyeed oo kormeeray Saldhiga Booliska magaaladda Baydhabo

SNTV
-
0
Taliyaha Ciidanka Booliska Soomaaliyeed oo kormeeray Saldhiga Booliska magaaladda Baydhabo

Baydhabo (SNTV), Taliyaha Ciidanka Booliska Soomaaliyeed S/guuto Bashiir Cabdi Maxamed Ameeriko oo ku sugan magaaladda Baydhabo, halkaasi oo uu u tagay ka qeyb galka shirka Golaha amniga Qaranka, ayaa maanta kormeer shaqo ku tagay Xarunta Taliska qeybta Booliska Koofur galbeed iyo Saldhiga Booliska magaaladda Baydhabo ee Xarunta Gobolka Baay.

Taliyaha, ayaa u kuur galay sida ay u socdaan howlaha shaqo ee Talisyadaasi, waxaana halkaasi kusoo dhoweeyey Saraakiil iyo askar Ciidanka Booliska qeybta Koofur galbeed ka tirsan.

S/guuto Bashiir Cabdi Maxamed Ameeriko, Taliyaha Ciidanka Booliska Soomaaliyeed, ayaa khudbad dheer u jeediyey Ciidanka ka howlgala Taliska qeybta Booliska Koofur galbeed iyo Saldhiga Booliska Baydhabo, waxaana uu kula dardaarmay in shaqada la dardar geliyo, isaggoo xusay in asakarigii shaqo wanaagsan qabtaa Qaranka abaal marin uu siin doonno.

1...1,2751,2761,277...1,709Page 1,276 of 1,709

© 2023 Telefishinka Qaranka Soomaaliyeed