Muqdisho Arbaca August 15 (SNTV):- Wasiirka  Wasaaradda Waxbarashadda  Hiddaha iyo Tacliinta sare ee Xukuumada Soomaaliya  Mudane Cabdulahi Goodax Barre, ayaa maanta kormeer ku tagay xarumaha jaamacadda Ummadda sida  Gaheyr iyo shabeelle ee magaalada Muqdisho.

Kormeerka wasiirka ayaa waxaa ku wehelinayay wasiiru dowlaha Wasaaradda Waxbarashadda Mudane Cabdiraxmaan Maxamuud Cabdulle, iyagoo kormeeray qeybaha ay ka kooban tahay jaamacadda Gaheyr.

Guddoomiyaha jaamacadda Ummadda Dr Maxamed Maxamuud Jimcaale ayaa wasiirka waxbarashada mudane Cabdulahi Goodax Barre iyo xubnaha la socday u sheegay in xilligan  si habsami leh ay u socodaan howlaha  waxbarasho ee  jaamacadda.

Wasiirka waxbarashada Soomaaliya mudane Cabdulahi Goodax Barre, ayaa sheegay in ka wasaarad ahaan ay muhiimada koowaad ay siinayaan siddii loo horumarin lahaa jaamacadda Ummadda Soomaaliyeed oo dad badan ay wax ka barteen.

“Waxaan ku farxay howsha la qabtay, waxan rajeynayaa in muddo kooban horumar baaxad leh ku sameyn doonno, dhul badan oo ay laheyd jaamacadda ummadda ayaa dib loo soo celiyay, qaarna wali waa maqan yihiin, waxan rajeynayaa inay gacanta dowladda ku soo noqdaan, ahmiyada koowaad ayay noogu jirta siddii loo horumarin lahaa jaamacadda ummadda” ayuu yiri Wasiir Cabdulahi Goodax Barre.

Wasaaradda Waxbarashadda  Hiddaha iyo Tacliinta sare ee xukuumada Soomaaliya  ayaa boggaadiyay howsha uu qabtay guddoomiyaha jaamacadda Umadda Dr Maxamed Maxamuud Jimcaale.

Muqdisho Arbaca August 15 (SNTV):-Ra’iisul wasaare xigeenka Xukuumadda Federaalka Soomaaliya Mahdi Maxamed Guuleed ( Qadar ) ayaa maanta daah furay Carwada Bandhiga Buugaagta ee Muqdisho taasi oo sanadkiiba mar la qabto.

Bandhiga buugaagta oo sanadkii 4-aad lagu qabanayo magaalada Muqdisho ayaa sidoo kale Munaasabada lagu furayay waxaa goobjoog ka ahaa Guddoomiyaha Gobolka Banaadir ahna Duqa Muqdisho Mudane Cabdiraxmaan Cumar Cusmaan ( Eng: Yariisow). Qoraayaal Soomaaliyeed iyo Bulshada qeybaheeda kala duwan oo soo buux dhaafiyay Hoolka lagu qabanayay Bandhiga Buugagta.

Madasha uu ka dhacayay Bandhigani waxaa la isugu keenay buugaag kala duwan oo ay qoreen Aqoonyahano Soomaaliyeed kuwaas oo ay kusoo bandhigeen Taariikhda Soomaaliya iyo Sheekooyin kala Duwan oo ay ka qoreen Marxaladaha kala duwan ee nolosha la xariira.

Duqa magaalada Muqdisho Mudane Eng Yariisow ayaa kormeeray qeybaha lagu soo bandhigay buugaagta la qoray isagoo iibsaday dhowr buug oo laga qoray Taariikhda Dalka.

Muqdisho Arbaca August 15 (SNTV):- Ra’iisul wasaaraha xukuummadda federaalka Soomaaliya (XFS) mudane Xasan Cali Khayre ayaa kulan la qaatay Madaxa Haweenka Qaramada Midoobay u qaabishan Soomaaliya, Faadumo Dayib oo hordhac u ah wafdi ay hoggaaminayso agaasimaha arrimaha haweenka ee Qaramada Midoobay, Phumzile Mlambo-Ngcuka, oo Soomaaliya booqasho ku imaanaysa maalmaha soo socda.

“Ra’iisul Wasaaraha waxa aan u soo booqday in aan xoojinno wada shaqeynta ka dhaxaysa dawladda federaalka Soomaaliya iyo Xafiiska haweenka ee Qaramada Midoobay. Aad ayaan ugu faraxsanahay sida uu noo soo dhaweeyay uuna noogu dhiirri geliyay shaqada haweenka ee Qaramada Midoobay”, ayay tiri Faadumo Dayib oo ka war-bixisay kulanka ay la qaadatay Ra’iisul wasaare Khayre.

Ra’iisul Wasaare ayaa sidoo kale kala hadlay sidii codka dumarka Soomaaliyeed iyo ka qayb galkooda siyaasadda loo xoojin lahaa, waxa uuna ku dhiirri geliyay in ay sii laba jibbaaraan hawsha lagu horumarinayo dawrka haweenka Soomaaliyeed ay ku leeyihiin dawladnimada.

Muqdisho (SNTV), Wasaaradda Howlaha guud iyo dib u dhiska XFS, ayaa maanta daahfurtay mashruuc gobolada dalka Soomaaliya looga shaqaaleysiinayo in ka badan kun qof.

Mashruuca, ayaa waxaa ka faa’ iideysan doono ku dhawaad 1100 dhalinyaro ah oo la barayo  xirfado ay ka mid yihiin dhismaha iyo kuwa kale oo muhiim ah, waxaana mashruuca wajigiisa koowaad lagu bilaabayaa 400 oo dhalinyaro ah, kuwaasi oo ka kala imaanayo Magaalooyinka Muqdisho,  Kismaayo, iyo Garoowe.

Wasiirka Wasaaradda Dhalinyarada iyo Ciyaaraha XFS Marwo Khadiijo Maxamed Diiriye iyo Wasiirka Wasaaradda Haweenka iyo Xaquuqul Insaanka XFS Marwo Deeqo Yaasiin, ayaa mashruuca ku guubaabiyey in lagu daro gabdhaha iyo wiilasha baahiyaha gaarka qabo iyo dhalinyarada kasoo laabtay tahriibka oo u baahan shaqo abuur.

Wasiirka Wasaaradda Shaqada iyo Arrimaha bulshada XFS Mudane Saalax Axmed Jaamac,  ayaa xusay in wax wanaagsan ay tahay in shaqo abuur loo sameeyo dhalinyaradda,isaggoo xusay in taasi aysan ku xerneen Tirada badnaashaha.

Guddoomiyaha gobolka Banaadir ahna duqa Magaaladda Muqdisho Mudane C/raxmaan Cumar Cismaan Eng. Yariisoow, ayaa  waxa uu xusay in dhalinyaradaan shaqo abuurka loo sameynayo uu yahay bilow wanaagsan, maadaama dalka  uu mudo 30 sano ah ku jiray marxalad adag.

Hay’adaha UN-ka  iyo dalalka deeq bixiyaasha,  ayaa horay u maamuli jiray maareynta mashruucyada laga hirgeliyo dalka, waxaana ugu dambeyn Dawladda Soomaaliya ay  ku guuleystay in dib loo soo celiyo ka go’aan qaadashada iyo maamulida mashruucyada dalka sida uu sheegay Wasiirka wasaaradda Howlaha Guud iyo dib udhiska XFS mudane Cabdifataax Ibraahin Axmed Geeseey.

Muqdisho(SNTV):– Ra’iisul Wasaaraha Xukuumadda Federaalka Soomaaliya Mudane Xasan Cali Khayre oo uu weheliyo Wasiirka Arrimaha Dibadda Soomaaliya Axmed Ciise Cawad iyo mas’uuliyiin kale oo ka tirsan dawladda Federaalka Soomaaliya ayaa galabta xeebta Liido kulan is xog-waraysi ah kula yeeshay wefdi balaaran oo uu hoggaaminayay Wasiirka Arrimaha Dibadda Eritrea Cusmaan Saalax, Waxayna ka wada hadleen xaaladda labada dal iyo xiriirka wanaagsan ee ka dhaxeey Soomaaliya iyo Ereteriya.