Taliyaha Cusub ee Taliska Ciidanka Asluubta Soomaaliyeed Sarreeye Guud Bashiir Maxamed Jaamac, ayaa maanta kormeeray Warshadda Farsamadda Gacanta ay ku bartaan Maxaabiista Xabsiga dhexe ee Xamar iyo Warshadda Waxsoosaarka Ciidanka Asluubta, halkaasi oo soo indha indheeyey sida shaqada ay u socoto.

Taliyaha oo ay wehliyeen ku xiggeenadiisa iyo Saraakiil kale, ayaa mid mid u booqday Qeybaha ay ka kooban yihiin Warshadahaasi, waxaana uu xog wareystay Madaxda , Maxaabiista farsamadda gacanta barata iyo Ciidanka ka shaqeynaya Warshadda.

Taliyaha Ciidanka Asluubta Soomaaliyeed Sarreeye Guud Bashiir Maxamed Jaamac, ayaa sheegay in Shaqada Warshadda si dardar leh ay ku socon doonto, islamarkaana la ballaarin doono, isaggoo tilmaamay in Warshado kale lagu soo kordhin.

Guddoomiyaha Gobolka Benaadir ahna duqa Muqdisho Mudane Cabdiraxmaan Cumar Cusmaan (Eng. Yarisow) ayaa sheegay in maamulka iyo shacabka Gobolka ay ka go’an tahay sidii ay qeybtooda uga qaadan lahaayeen qorshe-yaasha lagu dar-dar gelinayo xasilinta amniga Caasimadda.

Eng. Yarisow oo guddoominayey kulan ay ka soo qeyb galeen Taliyeyaasha Ciidamada Booliska iyo Asluubta Dawladda Federaalka Soomaaliya, Guddoomiye ku xigeenka Amniga iyo Siyaasadda, Guddoomiyeyaasha 17ka degmo ee Gobolka Benaadir iyo Taliyeyaasha heer degmo ee ciidamada Booliska, Nabad Sugidda iyo Asluubta ayaa xusay muhiimadda ay u leedahay wada shaqeyntu sugidda ammaanka iyo sida ay lagama maarmaan u tahay in la mideeyo qorsheyaasha lagaga hor-tagayo falalka arxan darrada ah ee Alshabaab ay u maleegayaan shacabka.

“Maanta lama joogo xilli la isku fiirsado shaqada iyo in masuul walba uu dhankiisa wax gaar ah ka qorsheeyo ee waxaan taagannahay waqtigii wada-shaqeynta iyo dajinta qorshe wadajir ah oo wax looga qabanayo amniga Caasimadda.” Ayuu yiri Guddoomiye Yarisow.

Guddoomiyaha Gobolka ayaa si gaar ah ugula dar-daarmay maamulka degmooyinka in ay adkeeyaan wada shaqeynta dhanka amniga ee ay la leeyihiin, qeybaha ciidamadda iyo bulshada degmooyinkooda taas oo muhiim u ah qorsheyaasha xasilinta caasimadda.

“Waxaa xaqiiq ah in weli ay jiraan caqabado dhinaca ammaanka ah, kuwaas oo aan la yareysan karin, balse haddii aan sii xoojinno dadaalkeenna iyo wada shaqeynta aan la leenahay bulshada degmooyinka waxaa hubaal ah in lagu guuleysanayo xasilinta amniga caasimadda oo laf-dhabar u ah deganaanshaha guud ee dalka.”

Guddoomiyaha ayaa sheegay in la joogteynayo kulanka oo noqon doonna bille iyo shirarka kale ee todobaadlaha ah ee Guddiga Amniga Gobolka Benaadir, iyadoona sidoo kale dadaal dheer la gelin doono kor u qaadista wacyi gelinta bulshada sidii ay kaalintooda uga qaadan lahaayeen sugidda amniga iyo xoojinta wada shaqeynta ay la leeyihiin laamaha ammaanka.

Shirkaan Waxaa soo Qaban Qaabisay Wasaarada Howlaha Guud iyo Guryenta Dowlada Soomaaliya, Waxaana Ka soo Qayb Galay Mas”uuliyiin Ka Socota Maamul Gobaleedyada dalka,Taliska Ciidanka ilaalada Wadooyinka ee Taraafika loo yaqaano iyo Wakiilo ka socda Midowga Yurub oo shirka maalgelineysa.

Shirkan oo socon doona mudo labo maalin ah ayaa inta uu socda diirada lagu saari doona Howlaha ku Saabsan Dib u Howlgelinta Hay’adda Waddoyinka Soomaaliya.

Agaasimaha Guud ee Wasaaradda Howlaha Guud iyo Guryeynta Soomaaliya Mudane Saalax Cabdi Axmed ayaa furay shirka oo hadda ka socda xarunta SKA ee Garoonka diyaaradaha Aadan Cadde ee magaalada Muqdisho.

Agaasimaha Guud ee Wasaaradda Howlaha Guud iyo Guryeynta Soomaaliya Mudane Saalax Cabdi Axmed ayaa sheegay iney muhiim tahay in ka qeyb galayaasha shirka ay ka faa’ideystaan si ay kaga faa’ideeyaan saaxiibada kale ee aan u suurta gelin iney ka soo qeyb galaan

Madaxweynaha Jamhuuriyadda Mudane Maxamed Cabdullaahi Farmaajo ayaa ugu hambaliyeeyay Amiirka iyo shacabka dalka Kuweyt sanad guuradii 57aad ee ka soo wareegtay xurriyadda dalkas.

Madaxweynaha ayaa sheegay in shacabka Soomaaliyeed ay farxadda la qeybsanayaan walaalaha Kuweyt oo u dabaal dagayay maalintan qiimaha badan ee xornimada ay ka qaateen gumeystihii Ingiriiska.

Madaxweyne Maxamed Cabdullaahi Farmaajo ayaa bogaadiyey xiriirka soo jireenka ah ee ka dhaxeeya labada dal iyo sida markasta ay uga go’antahay kor u qaadistiisa.

Madaxweynaha oo uga mahad celiyey shacabka iyo dowladda Kuweyt sida joogtada ah ee ay u garab istaagaan Soomaaliya, ayaa u rajeeyey horumar dheeraad ah iyo farxad waarta.

Guddoomiyaha Gobolka Benaadir ahna duqa Muqdisho Mudane Cabdiraxmaan Cumar Cusmaan (Eng. Yarisow) ayaa xafiiskiisa ku qaabilay Xog-hayaha Guud ee Dawladaha Hoose ee dalka Turkiga Mudane Hayrettin Gungor iyo wafdi uu hoggaaminayey.

Guddoomiyaha ayaa uga mahadceliyey Dawladda Turkiga kaalinta ay ka qaadatay dib-u-dhiska kaabayaasha dhaqaalaha ee gobolka Benaadir iyo dadaalka dheer ee ay ku bixisay bilicda iyo qurxinata Muqdisho.

Kaddib, munaasabad kooban oo soo dhaweyn ah oo loogu sameeyey Xarunta Dawladda Hoose ee Xamar, Xog-hayaha iyo wafdigiisa waxa ay maamulka Gobolka ka wada hadleen xoojinta xiriirka iskaashi ee ka dhaxeeya Dawladaha Hoose ee Turkiga iyo dhiggooda Gobolka Benaadir. shaqo abuurka dhallinyarada iyo sidii ay khibaradaha shaqada isu weydaarsan lahaayeen shaqaalaha Dawladaha Hoose ee labada dhinac.

“Muhiimad gaar ah ayey noo leedahay booqashada maanta ay noogu yimaadeen wafdigan, sababtoo ah waxa ay saldhig u tahay howlaha dar dar gelinta aan ku sameynayno shaqada Dawladaha Hoose ee degmooyinka Gobolka iyo sidii aan u daadajin lahayn adeegyada asaasisaga, maadaama dawladda Turkigu ay kaalin muhiim ah ka qaadatay dib u dhiska magaalada Muqdisho.” Ayuu yiri Guddoomiye Yarisow.

Xog-hayaha guud ee dawladaha hoose ee dalka Turkiga ayaa dhankiisa uga mahad celiyey maamulka iyo bulshada Gobolka sida diirran ee ay u soo dhaweeyeen, isagoona tilmaamay sida ay uga go’antahay dhankooda in ay kaalin muhiim ah ka qaataan horumarinta bilicda Caasimadda Muqdisho, kaabayaasha dhaqaalaha iyo kor u qaadista fursadaha shaqo ee dhallinyarada gobolka Benaadir.

Kulanka waxaa Guddoomiyaha Gobolka Benaadir ku wehelinayey Ku Xigeennadiisa Arrimaha Bulsha Marwo Basmo Caamir Axmed, Maamulka iyo Maaliyadda Mudane Xuseen Maxamed Nuur, Amniga iyo Siyaasadda Mudane Maxamed Cabdullaahi Maxamed (Tuulax).

Dhinaca Turkiga waxaa kasoo qeyb galay Safiirka Turkiga u fadhiya Soomaaliya Mudane Olgan Bekar iyo saraakiil ka tirsan Dawladaha Hoose ee dalka Turkiga.

Ujeedada socdaalka wafdigan ayaa qeyb ka ah mashaarciida horumariineed ee Dowlada Turkiga ka waddo dalka iyo sidii loo dardargelin lahaa.

Wasiirka howlaha guud iyo Dib uu Dhiska Xukuumadda Soomaaliya Eng Saadiq Abdullaahi Cabdi ayaa  ugu horeyn kahadlaay imaanshiyaha wafdigan wuxuuna sheegay in ay u yimaadeen sidii horumarin looga sameyn lahaa mashaariicda horumarineed ee dalku ay ka wadaan Walaalaha Turkiga.

Xoghayaha Guud ee Midowga Dowladaha Hoose ee Dalka Turkiga ayaa kaga mahad celiyay sida wanaagsan ee loogu soo dhaweeyay magaalada Muqdisho,isagoona balaan qaday in mar walibo ay noqon doonaan kuwa sii wadda mashaariicda horumarineed ay ka fuliyaan Soomaaliya.

Wafdigan ayaa booqday xarumaha wasaaradda Howlaha Guud iyo sidoo kale Gobolka Banaadir,isagoo la kulmay mas’uuliyiinta maamulka Gobolka iyo kuwa wasaaradda Howlaha Guud,waxaana qeyb ka ahaa Danjiraha Turkiga u fadhiya Soomaaliya.