Wasaaradda Warfaafinta, Dhaqanka iyo Dalxiiska Xukuumadda Federaalka Soomaaliya ayaa ka qeyb gashay shirka guddiga dhaqanka ee Urur Goboleedka Iskaashiga Dhaqaalaha Bariga Afrika (EAC). Shirkan oo diiradda lagu saaray arrimaha waxbarashada, sayniska, iyo iskaashiga dhaqaalaha, ayaa muhiimad gaar ah u leh xoojinta xiriirka dhaqameed iyo horumarinta iskaashiga gobolka.
Agaasimaha Guud ee Wasaaradda, Mudane Cabdullaahi Xayir Ducaale, oo ka qeyb galay shirka, ayaa faahfaahin ka bixiyey muhiimadda shirkan, isagoo xusay in Soomaaliya ay ka go’an tahay in ay kaalin muuqata ka qaadato horumarinta dhaqanka, waxbarashada, iyo sayniska ee gobolka Bariga Afrika.
Wuxuu sidoo kale tilmaamay in iskaashiga noocan oo kale ah uu fursad u yahay in la xoojiyo xiriirka dalalka xubnaha ka ah EAC, lana horumariyo adeegyada bulshada ee muhiimka u ah kobaca dhaqaalaha iyo horumarka bulshada Soomaaliyeed.
