Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa si rasmi ah ugu hambalyeeyay shacabka Soomaaliyeed guusha weyn ee ay gaareen kadib markii Soomaaliya ay si buuxda ugu guuleysatay xubinnimada Golaha Amaanka ee Qaramada Midoobay (QM) kadib 54 sano oo ka maqneyd.
Madaxweynaha ayaa ku tilmaamay guushaan mid taariikhi ah oo muujinaysa horumarka siyaasadeed, amni, iyo diblomaasiyadeed ee Soomaaliya, isaga oo xusay in xubinnimadan cusub ee Soomaaliya ee Golaha Amaanka ee QM ay tahay tallaabo weyn oo ku wajahan danaha iyo amniga Soomaaliya iyo guud ahaan Geeska Afrika.
“Guusha Soomaaliya ee Kursiga QM waa guul weyn oo aan ku faaneyno. Tani waxay muujineysaa in Soomaaliya ay si rasmi ah ugu biirtay safka dalalka ka qeybqaata go’aan qaadashada arrimaha amniga iyo xasilloonida caalamiga ah. Waa guul ummadda Soomaaliyeed oo dhan leh, waana mid aan ku xusno taariikhda.” ayuu yiri Madaxweyne, Xasan Sheekh Maxamuud.
Madaxweynaha oo Shacabka ku Dhiirrigeliyay dalaalkooda.
Madaxweyne Xasan Sheekh Maxamuud ayaa sidoo kale shacabka Soomaaliyeed ugu baaqay inay sii wadaan taageerada iyo ka qeybqaadashada dhammaan dadaallada lagu xoojinayo nabadda, amniga, iyo horumarka dalka. Isaga oo sheegay in xubinnimadan cusub ee Soomaaliya ee Golaha Amaanka ay fursad u tahay inay Soomaaliya kaalin muuqata ka qaadato go’aanada muhiimka ah ee la xiriira amniga caalamka.
“Xubinnimadda Soomaaliya ee Golaha Amaanka waa fursad aan ku horumarin karno xiriirka caalamiga ah ee Soomaaliya, waxaanan si wadajir ah ugu adeegaynaa danta guud ee shacabka Soomaaliyeed iyo kuwa ku nool gobolka,” ayuu hadalkiisa sii raaciyay Madaxweynaha.
Xubinnimadda Soomaaliya ee Golaha Amaanka
Golaha Amaanka ee Qaramada Midoobay waa hay’adda ugu muhiimsan ee ka mas’uulka ah ilaalinta nabadda iyo ammaanka caalamka. Xubinnimadda Soomaaliya ee Golaha Amaanka waxay si rasmi ah uga mid noqotay xubnaha ka qeybqaata go’aanada muhiimka ah ee ku saabsan arrimaha amniga iyo xasilloonida adduunka. Soomaaliya ayaa xubin ka noqotay Golaha Amaanka iyadoo wajahaysa caqabado cusub oo amni iyo siyaasadeed ah, laakiin waxay sidoo kale ka faa’iidaysanaysaa taageerada beesha caalamka iyo xiriirka xooggan ee ay la leedahay dalalka xubnaha ka ah Golaha.
