Obama oo dhaleceeyay go’doominta Israa’iil ay ku hayso Qaza

Madaxweynihii hore ee Mareykanka Barack Obama, ayaa dhaleceeyay go’aanka Isra’iil ay saadka ugu jartay Marinka Qaza, isagoo ka digay cawaaqib xumada ka dhalan karta go’aankan.

Obama oo xilka madaxtinimada Maraykanka qabtay intii u dhaxaysay 2009 iyo 2017, ayaa yiri: “Go’aanka ay Israa’iil magaalada Qaza kaga jartay cunnada, biyaha, iyo korontada kaliya ma ahan inay ka dhalankarto khatar bini’aadannimo, balse waxay horseedi kartaa inuu sii adkaado ammaanka gobalka”.

Waxa uu intaa ku daray in go’aankaasi uu horseedi karo in ay meesha ka baxdo taageerada caalamka uu siiyo Isra’iil, taas oo laga yaabo inay wiiqdo dadaallada muddada dheer lagu raadinayo nabadda iyo xasilloonida gobolka.

“kumanaan Falastiiniyiin ah ayaa lagu dilay duqeymaha Qaza, kuwaa oo ay ku jiraan carruur iyo dumar, boqolaal kun oo dadka degaanka ahna waxaa lagu qasbay inay ka cararaan guryahooda” ayuu hadalkiisa sii raaciyay Barack Obama.