Xukuumada Federalka Soomaaliya oo Heshiis Dhinacyo badan ah la saxiixatay Midowga Yurub.

0
7

Dowladda Federalka Soomaaliya ayaa Wajigii labaad ee heshiiska Barnaamijka lagu horumarinayo dhaqaalaha dalka, la Saxiixatay Midowga Yurub kaas oo la sheegay in ay ku baxayso lacag gaareysa 98.2 Milyan oo Euro.

Ra’iisul wasaaraha Jamhuuriyada Federalka Soomaaliya Mudane Maxamed Xuseen Rooble ayaa goobjoog ka ahaa saxiixa heshiiskan oo dhinaca Dowlada uu u saxiixay Wasiirka Qorsheynta JFS Mudane Jamaal Maxamed Xasan iyo Safiirka Midowga Yurub ee Soomaaliya Mudane Nicolas Berlanga.

Heshiiskan ayaa Arrimo badan oo Hormarineed looga wada hadlay waxaana muhiimada ay saareen labada dhinac barnaamijka Kaabayaasha Dhaqaalaha ee Dalka oo ay dowladdu sheegtay inuu wax badan ka taridoono koboca dhaqaalaha ee Dalka.

Ra’iisul wasaare Max’ed Xuseen Rooble oo heshiiska ka hor shir guddoomiyay wada hadalo balaaran oo ay isugu yimaadeen Golaha Wasiirada Xukuumada Federalka Soomaaliya iyo Ergo ka socotay Midowga Yurub ayaa sheegay in ay mihiim tahay xoojinta iskaashiga labada dhinac iyo dardar gelinta doorashooyinka Dalka.

Si kastaba Midowga Yurub ayaa Dhowr mar  oo hore Soomaaliya ugu deeqay lacago badan oo wax looga qabanayo Xaaladaha Bini’aadanimo iyo dib usoo kabashada dhaqaalaha Dalka uu u geystay Cudurka Safmarka ah ee Covid-19.