Duqeyn lagu burburiyey baabuur siday Qaraxyo

0
5

Ciidammada Difaaca  Soomaaliya iyo saaxiibbadooda ayaa duqeyn ku burburiyey Baabuur ay Al-shabaab ku soo diyaariyeen Qaraxyo ay la damacsanaayeen caasimadda.

Saraakiil ka tirsan hey’adaha amniga ayaa xaqiijiyey in duqeyntan ay dhacday habeennimadii Axadda, waxaana laga geystay xaafado ku yaalla degmooyinka Saakoow iyo Bu’aale oo ka tirsan gobolka Jubbada Dhexe.

Duqeynta ayaa sidoo kale lagu burburiyey laba xarumood mid qaraxyada lagu farsameynayey iyo xarun malleeshiyada Al-shabaab lagu tababari jiray.

Dad goob-joogayaal ah ayaa laga soo xigtay in ay maqleen dhawaaqa ilaa 7 Gantaal iyo rasaas, sidoo kalena degmada Bu’aalle laga arkayey holaca ay sideen Gantaallada oo bartilmaameed gaar ah lahaa.

Wararkii u dambeeyey ayaa sheegaya in Al-shabaab khasaaraha gaaray uu ballaaran yahay, ayna jirto dhimasho iyo dhaawac daran.