Bangiga adduunka ayaa ku dhawaaqay in uu Soomaaliya siinayo lacago deyn ah oo gaaraya 80 Milyan oo dollar, taas oo lagu taageerayo howlaha horumarinta dhaqaalaha dalka, tallaabadan oo ka dhigan guul kale oo Soomaaliya ka xaqiijisay nidaamka maaliyadda dalka.
Warbixin uu soo saaray ayuu bangiga adduunku ku sheegay in maamulka bangigu oggolaaday in 60 milyan oo Doollar oo ka mid ah lacagtan lagu maalgeliyo mashruuca kharashaadka joogtada ah iyo dib u habeynta, halka 20 milyan oo doollarna loo qoondeeyay in lagu xoojiyo awoodda hay’adaha wax soo saarka gudaha iyo maamulka guud ee maaliyadda dalka.
Bankiga adduunka ayaa sheegay in uu filayo in dhaqaalaha Soomaaliya uu sameeyo sara u kac u dhexeeya 3.5 iyo 4.5 boqolkiiba sanad walba muddada u dhaxeysa 2019 – 2022-ka marka uu sii socdo iskaashiga Bankiga adduunka iyo dowladda Soomaaliya ee dhinaca adeegyada bulshada.
Toddobaadkii tagay Bankiga adduunka ayaa sheegay in dhaqaalaha Soomaaliya uu sanadkan korayo 3.1 boqolkiiba, halka uu sanadkii hore ka ahaa 2.3 boqolkiiba.
Dalkeenna Soomaaliya ayaa sanadba sanadka ka dambeeyay xaqiijinaya horumarro dhan walba ah, waxaana ugu xowli badan horumarka dhinaca dhaqaalaha iyo nidaamka maaliyadda dalka.
Tallaabooyinka dowladdu u qaadday dhanka la dagaallanka musuqmaasuqa, dakhli ururinta iyo daahfurnaanta dhanka maaliyadda ah, ayaa horseeday in deeq bixiyeyaasha caalamka iyo hay’adaha maaliyadda dunidu aaminaan dowladda Soomaaliya taas oo albaabada u furtay in uu horumar xowli ku socda xaqiijiyo dhaqaalaha dalku.
