Muqdisho (SNTV) Howlgal ciidamada Booliska Soomaaliya ay ka sameeyeen Isgoyska Buur Cali Janaale oo kala qeybiya degmooyinka Kaxda iyo Dharkeynley ee gobolka Banaadir ayaa lagu dilay 2-ruux iyadoo lagu soo qabtay 8-ruux oo kale oo ahaa Burcad dadka wadadaasi isticmaala dhac u geysan jiray, sida ay sheegeen Saraakiisha Ciidamada Booliska Soomaaliya.
Qaasim Axmed Rooble Afhayeenka Ciidanka Booliska Soomaaliyeed kana mid ahaa Saraakiisha howlgalkaasi hogaaminayay ayaa warbaahinta u sheegau in ragaan la dilay qaarkoodna gacanta lagu dhigay ay ahaayeen Burcad wadada u gali jirtay dadka, islamarkaana dhac u geysan jiray.
Goobta howlkani laga fuliyay waxaa soo kormeeray Guddoomiye kuxigeenka Amniga iyo Siyaasada maamulka Gobolka Banaadir mudane Maxamed Cabdullaahi Maxamed (Tuulax) isagoo u mahadceliyay ciidamada howlgalkaasi fuliyay ee ka hortagay dhibaatada shacabka lagu haayay,,
Maxamed Cabdullaahi Maxamed ( Tuulax) ayaa sidoo kale tilmaamay in maamulka gobolka Banaadir uusan u dulqaadan doonin cid kaste oo caqabad ku ah amniga Caasimadda.
