Kismaayo (SNTV): –Ra’iisul Wasaaraha Xukuumadda federaalka Soomaaliya (XFS), mudane Xasan Cali Khayre, ayaa magaalada Kismaayo kulan xog-waysi ah kula yeeshay dhallinyarada ku nool magaalada.

Ra’iisul Wasaare Xasan Cali Khayre oo dhallinyarada u sheegay in hoggaanka dalku uu muhiimmad gaar ah siinayo arrimaha dhallinyarada ayaa uga jawaabay su’aalo ay ka waydiiyeen xiriirka dawladda dhexe iyo dawlad gobaleedyada, qorshaha amniga, waxbarashada, caafimaadka, doorashooyinka, Shaqo abuurka dhallinyarada, Kobcinta dhaqaalaha, maal-gashiga, iyo barnaamijka Cafinta daynta lagu leeyahay dalka.

Dhammaan mas’uuliyiinta dawladda federaalka iyo dawlad gobaleedyada ayuu sheegay Ra’iisul Wasaaruhu in laga doonayo wada shaqayn buuxda ayna mas’uuliyadi ka saarantahay u adeegidda bulshada Soomaaliyeed meel waliba oo ay joogaan, isaga oo intaa raaciyay in ummadda Soomaaliyeed kula xisaabtamayaan inta ay xilka hayaan waxa ay dhisaan iyo waxa ay qaldaan.

Ra’iisul Wasaare Khayre ayaa sheegay in Sugidda amniga ay ku xirantahay hagaajinta dhaqaalaha, siyaasadda, arrimaha bulshada, isaga oo intaa raaciyay in shaqo la’aanta dhalinyarada, musuqa, qabyaaladda, nin jeclaysiga ay qayb ka qaadanayaan amni darrada, loona baahanyahay in laga wada shaqeeyo hannaankii wax looga qaban lahaa.

Mudane Xasan Cali Khayre ayaa dhallinyarada uu kulanka la yeeshay u sheegay in dawladdu ay dib-u-habayn ballaaran ku wado dhaqaalaha, ciidanka qaranka, siyaasadda iyo horuamrinta arrimaha bulshada si loogu guulayso himilada ummadda Soomaaliyeed, loona jeexo waddadii horumarka dalka.

Ra’iisul Wasaare Xasan Cali Khayre ayaa dhallinyarada u cadeeyay in hagaajinta mustaqbalka ummadda Soomaaliyeed ay ku xirantahay sida waxbarasho tayo leh dalka looga hir-geliyo, arrintaasna ay dawladdu dadaal badan gelinayso.

Kismaayo; –Ra’iisul Wasaare Xasan Cali Khayre ayaa maanta magaalada Kismaayo ee xarunta KMG ee Dawlad gobaleedka Jubaland uga qayb galay munaasabadda Daah-furka Mashruuca Horumarinta Dhaqaalaha Goballada dalka ee (ILED)

Munaasabadda lagu daad-furayay mashruucaan oo muhiim u ah umadda Soomaaliyeed ayaa waxaa goob joog ka ahaa madaxwaynaha Jubaland, Wasiirka Wasaaradda Qorsheynta DFS iyo Wasaaradaha Qorsheynta Dowladd gobaleedyada, wakiilka midawgaYurub ee Soomaaliya.

“Muhiim ayey ii tahay in aan arko hindisaha nuucaan oo kale ah, sababta oo ah laf-dhabarta siyaasadaha dalkeenna waa in aan hagaajinno dhaqaalaheenna. kobcinta dhaqaalaha waxa ay noo tahay muhiimadda koowaad”, ayuu yiri Ra’iisul Wasaare Xasan Cali Khayre.

Midawga Yurub ayaa mashruucaan ku bixinaysa 83 Milyan Yuuro, waxa uu qayb wayn ka qaadanayaa kobcinta dhaqaalaha dalka iyo shaqo abuurka dhallinyarada Soomaaliyeed.

Wasiirka Wasaaradda Qorsheynta DFS, Jamaal Maxamed Xasan, ayaa mashruucaan u saxiixay dawladda, dhanka midawga Yurub iyana waxaa u saxiixay Fulgencio Garrido Ruiz oo ah Wakiilka Midawga Yurub ee Soomaaliya.

Kismaayo (SNTV) –Ra’iisul Wasaaraha xukuumadda federaalka Soomaaliya (XFS), mudane Xasan Cali Khayre, oo maanta kormeeeray xarumaha wasaaradaha Jubaland ee arrimahha gudaha, maaliyadda, Dalxiiska, kalluumaysiga, xanaanada xoolaha, Hawlaha Guud iyo Dastuurka, ayaa sheegay in yagleelidda qorsha shaqo oo dadka oo dhan u adeegaya uu muhiim u yahay mustaqbalka ummadda Soomaaliyeed iyo wada shaqaynta dawladda federaalka iyo guud ahaan dawlad gobaleedyada xubnaha ka ah.

Kormeerka oo ay Ra’iisul Wasaaraha ku wehliyeen madaxwaynaha Jubaland, wasiirrada amniga iyo Kaluulaysiga XFS, taliyeyaasha ciidanka Booliiska iyo milateriga ayaa qorshihiisu ahaa u kuur gelidda shaqooyinka ka socda wasaaradaha, caqabadaha iyo baahiyaha ka jira.

“Waxaan aad ugu faraxsanahay hadda in aan leenahay nidaan cusub oo lagu shaqeeyo, maadaama marka aan kulligeen hal dal wada nahay, dawlad nahay Soomaaliyeed, dad Soomaaliyeed u adeegno, horta waa inaan si waxa yar ee aan haysanno loogu bixiyo sida ugu habboon ugu hufan, dadkana loo gaarsiiyo waa in aan leennahay qorsha shoqo oo u adeegaaya dadka oo dhan”, ayuu yiri Ra’iisul Wasaare Xasan Cali Khayre.

“Maadaama dawladdu ay leedahay nidaam ay ku shaqayso aanna billaawnay dawlad gobaleedyada dhan in aan u drino wasiirro iyo hawl-wadeenno, waxa aan rabnaa in xafiiska Ra’iisul Wasaaraha iyo wasiirrada ila scoda iyo adinku aad keentaan qorshayaal wax ku ool ah si marka aan laabanno aan ula laabanno shaoqooyin aan qaban karno oo aan isku ognahay adinka iyo annaga”, ayuu raaciyay Ra’iisul Wasaaruhu.

Ra’iisul Wasaare Xasan Cali Khayre oo shalay soo gaaray magaalada Kismaayo ayaa lix kamid ah wasaaradaha uu maanta kormeeray oo leh xaruma cusub oo ay ku shaqeeyaan waxa uu Ra’iisul Wasaaruhu dhagax dhigay sannadkii 2017-kii, xilligaas oo Kismaayo lagu qabtay shirka golaha wasiirrada.