Benaadir – Somali National Television – sntv.so

Guddoomiyaha Hay’adda Qaxootiga iyo Barakacayaasha Qaranka oo shir la yeelatay madaxda Hay’adaha Qaxootiga iyo Barakacayaasha Maamul Gobaleedyada iyo Gobalka Banaadir.

Muse Abdullahi Cirro — Mon, 25 Mar 2024 14:38:10 +0000

Shirka oo ku qabsoomay qaab fugaan arag ah (ZOOM Meating) ayaa waxaa looga hadlay qodobo ay ku jiraan sidii loo sameyn lahaa qorshe hawleed mideysan oo ay u dhanyihiin dhamaan Maamul gobaleedyada iyo gobolka Banaadir, iyada oo la iska kaashanayo sidii wax loogu qaban lahaa Qaxootiga iyo Barakacayaasha ku nool gudaha dalka.

Guddoomiyaha Hay’adda Qaxootiga iyo Barakacayaasha Qaranka Marwo Safiyo Xasan Maxamed ayaa ka warbixisay waxyaabihii u qabsoomay, waxayna sheegtay in sharcigii Qaxootiga iyo magangalyadoonka uu saxiixay Madaxweynaha Jamhuuriyadda, isla markaana ay dooneyso in sida ugu dhaqsiyaha badan loo bilaabo hirgalintiisa waxayna xustay in mardhow la bilaabi doono sidii luuqadaha Qalaad loogu Turjumi lahaa sharciga, si deeq-bixiyaashu ula jaanqaadaan.

Sidoo kale guddoomiye Safiyo ayaa xustay in sharciga barakacayaasha isna uu meel fiican maraayo, kaasi oo hadda horyaalla Mudanayaasha Golaha Shacabka baarlamaanka Soomaaliya.

“Sharciyadaan ayaa wax badan ka taraya sidii loo maareyn lahaa deeqaha iyo waxqabadka dadkeena nugul ee barakacaaysha ah, waxaana ka dhalan doona in ay hay’adaha dowladda ee heer faderaal iyo heer gobalba in ay awood u yeeshaan la xisaabtanka iyo jiheynta qorshayaasha wax loogu qabanaayo bulshadeena Soomaaliyeed ee ay saameysay isbadalka cilimilada,” ayay tiri Gudoomiye Safiyo.

Kulanka maanta ayaa Sidoo kale waxa looga hadlay sidii looga shaqeyn lahaa fulinta balan-qaadyadii shirkii GENEVA ee 2023 iyadoo loo abbaaraayo qorshe Wadajir ah.

Waxyaabaha kale ee kulanka looga hadlay ayaa waxaa ka mid ahaa Sidii lagu abbaari lahaa xalka dadka barakacyaasha ah, iyada oo lagu saleynaayo baahida dadkeena iyo sidii dhaqaaale loogu abuuri lahaa, iyada oo lagu salaynaayo deegaan walba iyo baahiyaha ka jira.

Inta uu socday kulankaan ayaa laysla meel dhigay in dadka Qaxootiga ah loo abuuro nolol lamid ah yaraan middii ay ku haysteen xeryaha qaxootiga dalalkii ay kasoo laabteen, sida Caafimaadka Hooyada iyo Dhalaanka iyo waxbarashada ubadka.

Shirka ayaa waxaa looga hadlay sidii wax looga badali lahaa qorsha hawleedka 5ta-sano ee soo socoto Hay’adda Qaxootiga iyo Barakacyaasha qaranka si loogu daro balan qaadyadii GENEVA ee 2023.

“Xafiisyada Madaxweynaha Qaranka iyo Raisul Wasaaraha XFS waa ay ka go’antahay in sharcigaan la meelmariyo iyo in xal rasmi ah loo helo Barakacyaasha gudaha dalka, maadaama dadku ay sii kordhayaan marba marka ka dambeysa” ayay hadalkeeda ku dartay gudoomaha hay’adda Qaxootiga iyo Barakacyaasha qaranka.

Guddoomiyaha Hay’adda Qaxootiga iyo Barakacayaasha Qaranka

Guddoomiyaha Gobolka Banaadir oo Sheegay in Nidaamka Wadomarista uu qeyb weyn ka qaadanayo Badqabka Bulshada

Muse Abdullahi Cirro — Mon, 05 Feb 2024 17:21:20 +0000

Guddoomiyaha Gobolka Banaadir ahna Duqa Magaalada Muqdisho Mudane Yuusuf Xuseen Jimcaale (Madaale) oo ay wehliyaan Taliyaha Ciidanka Booliska Soomaaliyeed iyo Guddoomiye Kuxigeenka Amniga & Siyaasada Gobolka Banaadir ayaa kormeeray qaar ka mid ah Wadooyinka Caasimadda Muqdisho oo loo diyaarinaayo nidaamka wadomarista wadooyinka.

Taliyaha Ciidanka Nabadgalyada Wadooyinka Jeneraal Bishaar Axmed Geedi ayaa mas’uuliyiinta ugu warbixiyay qorshaha hirgelinta xeerka Nidaamka Wadomarista Magaalada Muqdisho oo meel wanaagsan maraya, asigoona sheegay in ay jiri doonto dhaqan gelinta xeerka iyo isla xisaabtan ku aadan ku xad-gudubta Nidaamka Wadomarista.

Duqa Magaalada Muqdisho ayaa sheegay in Qorshaha Nidaamka Wadomarista uu qeyb weyn ka qaadanaayo Badqabka Bulshada, yarenta saxmada wadooyinka iyo bilicda Caasimadda, asigoona ka digay in lagu xad-gudbo goobaha ka dhaxeeya Bulshada.

Ciidanka Sirdoonka Qaranka oo gacanta ku soo dhigay Eedeysane Sayid Cali Macalin oo xaaskiisa ku gubay Muqdisho.

Muse Abdullahi Cirro — Mon, 05 Feb 2024 17:18:39 +0000

Ciidanka Hay’adda Sirdoonka iyo Nabad Sugidda Qaranka oo ku howlanaa sidii gacanta loogu dhigi lahaa eedeysane Baxsad Sayid-Cali Macalin Daa’uud, kaas oo 26 Jan 2024 Degmada Dharkeynley ee Gobolka Banaadir ku gubay xaaskiisii marxuumad Luul Shiikh Cabdi oo ay u geeriyootay gubashadii ayaa ugu dambeyn galabta gacanta ku soo dhigay eedeysane Sayid -Cali Macalin Daa’uud iyo laba eedeysane oo gacan ku siinayay in uu cadaalada ka baxsado.

Ciidanka Nabad Sugidda oo maalmihii la soo dhaafay ku raad joogay eedeysanaha ayaa ugu dambeyn ka soo qabtay deegaanka Caad xilli uu halkaas ku dhuumaaleysanayay.

Eedeysanayaashaan ayaa gacan ku siiyay eedeysanaha 1-aad inuu ku dhuumaalysato dhulka ballaaran ee isku xira Gobolada Galgaduud iyo Mudug Halkaas oo ay suurto gashay in gacanta lagu soo dhigo xilli uu ku sugnaa deegaanka Cadayleey.

eedeysanayaasha kala ah Ingiriis Fanaxeey iyo Cabdirisaaq Macalin Daa’uud (Caluuke), ayaa laga soo qabatay deegaanka Gawaan oo hoos taga Degmada Wisil ee Gobolka Mudug xilli ay ku howlanaayeen fududeynta baxsashada eedeysane Sayid-cali oo la qorsheeynayay inuu doon ku baxsado markale.

Howlgal Khawaarij badan lagu laayay oo saaka ka dhacay Koofurta Mudug.

Muse Abdullahi Cirro — Fri, 05 Jan 2024 09:09:13 +0000

Howlgal qorsheysan oo lagu laayay maleeshiyaad Khawaarij ah ayaa saaka ka dhacay deegaanka Samatar Madow oo u dhaxeeya magaalooyinka Caad iyo Camaara.

Wasiirka Gaashaandhigga XFS Cabdulqaadir Maxamed Nuur ayaa Warbaahinta Qaranka u xaqiijiyay howlgalkaan oo jab xoogga saaka lagu gaarsiiyey Khawaarij isku aruursaneysay deegaankaas.

Goor dhow la soco faah-faahin ku saabsan howlgalkaan iyo Khasaaraha kala duwan ee gaaray Khawaarijta.

Ciidanka xoogga dalka oo Khawaarijta ka sifeeyey deegaano ka tirsan Shabeellada dhexe iyo Galgaduud.

Muse Abdullahi Cirro — Wed, 13 Dec 2023 13:21:36 +0000

Ciidanka xoogga dalka gaar ahaan Guutada 24aad ee khalid binu waliid ayaa maanta Howlgalo kasameysay Hoowdka u dhaxeeya Cali heele iyo Daarunimco halkaas oo ay ka ceyriyeen Maleyshiyaad Khawaarij ah oo si dhuumaaleysi ah ku soo galay.

Taliyaha Guutada Khaalid Binuwaliid Maxamed Dhagaweyne ayaa Warbaahinta Qaranka u xaqiijiyay in Ciidamada Maleyshiyaadka Khawaarijta ka sifeeyeen tuulooyonka Buurmuqle, Labi oow Xasan iyo deegaano kale kuwaas oo ahaa Dhul howd ah oo khawaarijta gabaad ka dhiganaysay.

In ka badan 33 Khawaarij ah oo lagu dilay Galbeedka xarardheere.

Muse Abdullahi Cirro — Thu, 07 Dec 2023 09:01:58 +0000

In Ka badan 30 Khawaarij ah ayaa lagu dilay howlgal qorsheysan oo Ciidanka deegaanku saaka ka fuliyeen deegaan dhanka Galbeed kaga beegan degmada Xarardheere ee gobolka Mudug.

Howlgalka oo ka dhacay deegaanka Baraag Gurgurrte oo ahaa fadhigii ugu weynaa deegaankaas ee Khawaarijta ayaa waxaa fuliyey ciidanka deegaanka oo uu horkacayay Guddoomiyaha degmada Xarardheere Maxamed Yuusuf oo Warbaahinta Qaranka u xaqiijiyey in 33 Khawaarij lagu dilay howlgalka isla markaana taliskoodii iyo saanad ciidanku la wareegay.

Howlgalka ayaa dhacay salaaddii subax ka dib markii ciidanku ka war heleen abaabul weerar oo cadowgu maleegayay.

Kulan looga hadlayey taariikhda degmada Cabdicasiis oo lagu qabtay degmadaas.

Muse Abdullahi Cirro — Fri, 27 Oct 2023 07:57:10 +0000

Xog’hayaha guud ee maamulka Gobolka Banaadir Mudane Feysal Caraale Afrax ayaa xalay ka qeyb galay madal loogu magacdaray talo wadaag, taas oo lagu soo bandhigayay taariikhda Degmada Cabdicasis ee magaalada Muqdisho, waxaana kasoo qeyb galay, qaar kamid guddoomiyaasha degmooyinka, guddoomiyaasha ururada Haweenka iyo Dhallinyarada iyo xubna ka socday hey’addaha Heritage iyo interpeace.

Degmada cabdicasis oo kamid ah degmooyinka qadiimiga ah ee caasimadda ku yaala islamarkaana ka mid ah degmoyinka ugu faca weyn ee Dalkeena Hooyo ayaa lagu soo bandhigay wax yaabaha ay caanka ku tahay, sida dhismooyinka qadiimiga ah, xeebta Liido, Sports-ka iyo ilbaxnimada.

Xog’hayaha guud ee maamulka Gobolka Banaadir Mudane Feysal Caraale Afrax ayaa ku dardaarmay muhiimada ay lee dahay in lasoo bandhigo goobaha qadiimigaha iyo waxyaabaha ka turjumaayo taariikhda wanaagsan ee ummadeena.

Madaxweyne Cali Guudlaawe oo magacaabay Wasiiro

Muse Abdullahi Cirro — Wed, 25 Oct 2023 07:08:14 +0000

Madaxweynaha Dowlad gobaleedka Hirshabeelle mudane Cali Guudlaawe Xuseen, ayaa soo saaray Wareegto ku taariikheysan 24, Oktoober, 2023, taasi oo ku saabsan magacaabis Wasiirro.

Qoraal ka soo baxay Xafiiska Madaxweynaha Hirshabeelle ayaa u qornaa sidan:

Markuu arkay: Qodobada 56aad iyo 57aad ee Dastuurka Dowladda Hirshabeelle.

Markuu arkay: In ay lagama maarmaan tahay dardargelinya Shaqada baaxada leh ee Xukuumadda.

Markuu Tixgeliyay: Aqoonta, kartida iyo Waayo-aragnimada mudanayaasha loo Magacaabay Xilalka hoos ku xusan.

Markuu la tashaday: Madaxweyne Ku-xigeenka Dowladda Hirshabeelle.

WUXUU MADAXWEYNAHU SOO SAARAY XEERKAAN

Qodobka 1aad

1- Waxaa Mudane Abuukar Axmed Cali (Dhaga-gaab) loo Magacaabay Xilka Wasiiru dowlaha Madaxtooyada Dowladda Hirshabeelle.

2- Waxaa Mudane Cabdixamiid Maxamed Cali loo Magacaabay Xilka Wasiirka Hub-ka Dhigista iyo Dhaqancelinta Maleeshiyaadka Dowladda Hirshabeelle.

3- Waxaa Mudane Cabdifitaax Jaamac Warsame loo Magacaabay Xilka Wasiir Ku Xigeenka Wasaaradda Qorsheynta Dowladda Hirshabeelle.

guddoomiye ku xigeenka guddiga Qaranka ee Shaqaalaha rayidka ah oo la guddoonsiiyey shahaadada kaarka aqoonsiga Qaranka.

Muse Abdullahi Cirro — Mon, 23 Oct 2023 17:53:02 +0000

Kusimaha Guddoomiyaha ahna Guddoomiye Kuxigeenka Guddiga Ee Shaqaalaha Rayidka ah Mudane Cali Mumin Mudey oo maray dhammaan habraacyada diiwaangelinta Qaadashada Kaarka Aqoonsiga Dadweynaha (National ID) ayaa maanta Xarunta Guddiga Shaqaalaha lagu guddoonsiiyey Shahaaddada Kaarka Aqoonsiga.

Guddoomiye Kuxigeenka Guddiga ayaa u mahadceliyey Xubnihii ka socday Hay’adda Aqoonsiga & Diiwaangelinta Qaranka ee NIRA, isaga oo Alle uga baryay in uu u fududeeyo shaqada muhiimka ah ee Diiwaan galinta guud ahaan dadka Soomaaliyeed iyo Kuwa sida Sharciga ah ku jooga dalkeena.

Sidoo kale, qaar ka mid ah Xubnaha & Howlwadeennada Guddiga Shaqaalaha Rayidka ah ayaa qaatay shahaaddooyinka Kaarka Aqoonsiga kuwaas oo Todobaadkii hore maray Nidaamka diiwaangalinta Muwaadiniinta.

Sida uu qorshuhu yahay waxaa dhawaan si toos ah u bilaaban doonta diiwaan galinta Muwaadiniinta Soomaaliyeed ee qaadanaaya Qaadashada Kaarka Aqoonsiga Dadweynaha (National ID) oo lagu bilaabi doono Shaqaalaha Dowladda.

guddoomiye ku xigeenka guddiga Qaranka ee Shaqaalaha rayidka ah oo la guddoonsiiyey shahaadada kaarka aqoonsiga Qaranka.

Horjooge Khawaarijta ka tirsanaa oo lagu qabtay Koofurta Mudug.

Muse Abdullahi Cirro — Fri, 20 Oct 2023 12:01:43 +0000

Horjoogihii Khawaarijta u qaabilsanaa aruurinta lacagaha baadda ah ee ay ka qaadaan shacabka deegaanka Bacaadweyne ee gobolka Mudug Ismaaciil Aadan Maxamed ayaa lagu qabtay deegaanka Qoriley ee koofurta Gobolka Mudug.

Ciidanka xooga dalka, Daraawiishta Galmudug iyo xoogagga deegaanka ayaa iska kaashadey soo qabashada Dhagar-qabe Ismaaciil oo dhuumaaleysanayay inkastoo uu saraakiisha ciidanka u sheegay inuu doonayay inuu isku dhiibo ciidamada.